Ka Naule he Kan Diary III
===================
Voikhat cu Bawino Patrick Brown nih bomb a sermi a chiahtakmi kha kan sersiam. Thantlang lam lei ah Uico pawl motor in an kal tiah thawngpang an kan chimh. Kan umnak in Hakha Khuathar i Thantlang lampial khi minute 20 tluk kal a si.
Thantlang lei ah an lan lai lo an kir ko men lai ti kan zumh caah Bomb va hmanh dingin NG, Tluang te, Phun Sang, Tial Chawn, a min langh ter awk tha lomi pakhat, cun Lai Kulh tiin zaantlai hnu ah cun kan ithawh hna. Khuachung kan luh cu minung an king dih. Pul nih tlunhmi Khuapi tthing pi ko khi a lo. Boruak ka zoh tikah bomb hmanh cu a si thiam lo. Cucaah BOC check gate tu kha kan kah lai tiah kan fuh.
Lai Kulh kha Inwa Bank hnulei in a kalmi lam ah security kan lak ter. Kalay lampi in gate cu fuh kan timh. Uico pawl cu anmah umnak zawn kha mei an vang lo, kannih umnak lei kha mei a ceu. Meter 30 hrawng tiang kan naih hna nain kah awk tha in kan hmu kho hna lo. Lam khat lei kam in kah awk a tha hnga maw tiah meithal he lam cu ka thlingkik lengmang in ka tan i ka va zoh hna nain aa hlei lo.
Asiahcun Bank chungah a ummi Ralhrang pawl tu hi an bank hnulei in kap hna usih tiah kan cawlcanghning kan thlen.
Vanchiat ah kan kalnak lam ah khan Dalan an rak um i Bank kan phak deuh hlan teah Ralhrang pawl cu kan thawngpang theih in meithal he minung pahnih an rak ra.
Lai Kulh nih inn tang in a bawh hna. Kei, NG Lian, le Tluang te kha hmai kan kal. Kei le NG nih KA meithal Kanchin ser kan iput, Salai Tluangte te kha Pistol ka pek. A dang kan hawile nih cycle he a hlat deuh in an kan hngah. An rat cio lo nak a ruang cu meithal kan rak ngei lo.
Bank kan phak nak ah meter 10 tluk lawng aa hlat cang. Holh thawng kan theih. Hnulei ah zaam uh ka ti. Kei le Tluangte mi innleng ah kan ithup manh. NG Lian kha a zaam manh tilomaw zeitik Yeepun (Calvert) ah aa thup. Yeepun tang zong ah cun a lut manh laklawk ti lo i cuticun a kuarhnak pi ahcun a thu ko. Uico pawl nih cun an hmuh, liklak a tho i zei nan tuah a ti hna.
Hika lei in Mino pawl an ra an ti i mah cu kan pu nih va zoh tuah hna uh a kan ti i kan ra an ti. Tuzan biathup (Password) chim uh a ti hna. Cu hna ve zong nih cun an rak chim kho ve lo. Kan Captain pa he bia iruah ta ulaw a tha lai an ti. Nan captain cu zei ah dah nan rel Rungtlang in nanmah pawl nan fel le fel lo ngiat ruah ah thlahmi ka si hih nan captain zong mah bantuk in felfai tein an hruai lomi hna hi a herh ahcun ka bengh lai a ti hna.
Cun a meithal kha KA a thar hlekmak cu si kaw Uico pawl nih cun an zoh cang. NG nih cun ka veithal an ka lunghrinh cang ti a hngalh colh caah mah meithal hi nan hmu bal maw a ti hna. Kan hmu bal lo an ti. Nizan Thantlang peng kahdohnak ah CNA ta kan chuhmi hna a si. Khah rak ka zul uh khika lei ah thawngpang petu an um a dikthliar deuh in kan va hal hna lai tiah a ti i kanmah lei ahcun a rak hruai hna.
Bank mei an van mi nih a ceuhnak le zan khuamui i a mawtnak aa riika a um. A muihnak zawn bak inn leng ah kei le Tluangte kan um. An thawchuah thawng kan theih cang. Ka meithal peng in sawh ning law ka phak lai.Tluang te cu ka hnu ah a dir. Kei kaa cingkadin, ka meithal ka lawt cia. NG cu a muinak a phak bak in kanmah lei ah a ra pei, aa her i a meithal cu a hmeh nain a puak lo ai.
Kha ah khan cun ka dir ve cang. Pakhat nih, yantu yantu pee pee (Ral ral tli tli) tiah a au i an pahnih an tli. Ka meithal zang cu ka hmeh i pakhat cu ka hrilh. Meithal ka puah bak in inntang ah timhcia tein a rak ummi Lai Kulh nih cun auto in a kah hna i a tangmi pakhat cu a liang ah a khen a thaizing ah siizung ah a thi.
NG na thluak hrimhrim a tli kan ti i ka thluak tlik bia silo, ruah zong iruah lo piin ka kaa in mah bia pawl kha an chuak thluahmah ko. PATHIAN nih a ka umpi hrimhrim i a si tiah a rak kan leh. NG Lian hi a hlan tein kan khua zongah a kan tlawng lengmang mi a si. URF kan sii hnu ah khua kan dum ah saupi kan rak um hna.
CNA ah a luh i Bawino a si hnu zongah kan khua lei a kal paoh ah ka Nulepa pal le chawnhbiak loin a um bal lo. Tu bel cu leidai tang hmanh ah fimhlawm tong lo tein Ramtang ah Mihrin fa ve lo bang thu le man in ciam a ser ai ee. Crd-Salai Vakok