CDF-Senthang Nih SAC Ralhrang Bomb Thlakmi Kong Ah Thawngthanhnak An Tuah
=========
2023, May 8, zanlei suimilam 6:00 hrawng ah SAC ralhrang nih CDF-Senthang humhaknak hmunram chung, sualnak ngeilo mipi hna an umnak Khuapi khua cu tinhchih tein Mi-35 in bomb a thlak. Cu hnu ah CDF-Senthang rianṭuannak ah a biapi bikmi (Central Executive Office) zung (Sinai Camp) zong bomb a thlak ṭhan caah CDF-Senthang in (Assistant Secretary General) nih ram le miphun caah a nunnak a pek pin ah minung 4 nih hliamhma an tuar.
Ram le miphun caah nunnak a pe tu pasalṭha cu CDF-Senthang nih upatnak sangbik kan in pek i, tantakmi chungkhar hna zong kan in ngaihchiatpituk hna, tiah Chinland Defense Force-Senthang nih ngaihchiatpinak cathanh an chuah. Hramhram in uknak a la tu SAC ralhrang nih mipi hna cung ah minung lungput zong ngeilo in a tuahmi cu mit in hmuh a si i, mah bantuk a tuahmi le mah zawn lawng ruat, chiaṭha thleidang lo in a tuahsernak cung ah CDF-Senthang nih faakpi in kan doh.
Atu bantuk in CDF-Senthang nih uknak a la tu SAC ralhrang tuahsernak kan dohnak hi kum 2 tluk deng a si cang.
Cucaah SAC ralhrang nih aa tinhmi le aa ruahchannak cu mipi hna he hmunkhat ah ṭangṭi in a hrambongh ding le (Justice Federal) kan hmuh hlan tiang, mipi hriamtlai phu hna simi CDF, PDF hna he a dihdongh tiang kan doh ṭi lai, tiah Chinland Defense Force-Senthang nih cathanh an chuah.
Sagaing ramthen, Ba-mouk (ဗန်းမောက်) peng ah tualchung PDF le SAC ralhrang kahdohnak hmun cu zohfel dingin an a kal mi PDF hna nih ralhrang ruak 6 a rawk ngai cang mi hna cu tha tein an vui piak hna tiah Ba-mouk Revolution phu nih an chim.
Aluan cia April thla chung kahdohnak rak tuah nak hmun cu PDF nih May 8 ah zohfelnak an va tuah tik ah SAC ralhrang ruak an hmuh mi hna cu a tubantuk in an vui piak hna hi a si. “Ba-mouk khua hnulei ah SAC ralhrang he kahdohnak hmun ah mithi ruak an um tiin PDF sin ah thawngthanh nak an kan tuah, ralhrang ruak 6 cu an rawk in an nam ngai cang nain tha tein kan vui piak hna” tiah BR-Team nih an langh ter.
SAC ralhrang kuttang pawl hna cu Sagaing ramthen, Ba-mouk khua, Ka-thar khua le Inndaw khua hna ah lut in inn khangh in an i lak caah tualchung PDF he nifa tin tiawk in kahdohnak a chuak peng tiah khua mi hna nih an chim.mShan ramkulh ah mipi ralhrial hna he i ton ding ah a kalmi ramdang nih an thlahmi palai hna (ASEAN Ambassador) motor cu Hsihseng (ဆီဆိုင်) peng chung ah kahdoh a tong, tiah theih a si.
Shan ramkulh, Taunggyi khuapi in Hsihseng peng, Ye-phyu (ရေဖြူ) khua um ralhrial hna va ton ding ah a kalmi Indonesia le Singapore palai (ASEAN Ambassador) hna cu May 7 ah Hsihseng peng, Nan-Oh (နန့်အော) khua in meters 200 hrawng a hlatnak hmun ah kahdohnak an ton hi a si, tiah BBC nih a langhter. Cu kahdohnak cu caan tlawmpal chung a rau i, hliamhma an tuar hrawlo nain an motor tu cu tlawmpal aa rawk, tiah theih a si.
Hi kong he pehtlai in SAC ralhrang le amah lei ṭangmi hna thangthanhnak nih cun tlangcung hriamtlai le mipi hriamtlai phu hna nih an kahdohmi a si, tiah an langhter ve. Atu bantuk in kahdohnak an tonmi kong ah Indonesia ram nih faakpi in a dohnak kong thawngthanhnak a tuah pin ah Myanmar ram he pehtlai in cabuai cung tonpumhnak hmun ah ceihhmai ding in ASEAN Alternate lutlai, Indonesia President nih a chim.
Kahdohnak an tonnak hmun cu Nan-Oh (နန့်အော) khua in meters 200 hrawng a hlatnak hmun ah a si i, SAC ralhrang kuttang PNO, Pyitusit le SAC ralhrang hna humhaknak hmun zong a si. Mipi hriamtlai phu hna an umnak Karenni (Kaya) ramri in meng 58 tluk a hlatnak hmun a si. Tualchung thawnglatu hna nih “Ramdang palai (ASEAN Ambassador) hna le khua chuahtak in ralhrial mipi hna i tonnak ding cu SAC ralhrang nih duhlonak kong” an langhter.