Kan Nu le kan Pa , Kan Pi le Pu hna nih an phuan ngam lomi bia!!

Nulepa Tampi Nih An Phuan Ngam Lomi Biacah
==============================
Ralkap bomb nih Hniarlawn khuami Pi Chia Hnem an coka ah a tlak i a nunnak a liam cu ngaih a chia hringhran ko. Hakha le a pawngkam ummi nulepa hna cu ihkhun cung i hngilh hmanh ah hna a ngam kho ti lo dirhmun kan phan than cang ko rua.

Miphun dawtu ramtang kan unau hna nih caan sau ngai khuachung i kahdohnak nan rak hrial i Hakha khuami hnangam deuh ngai in rak um a si. Nain, tukar nan hun kah than lengmang hna tikah Mizoram le khuate ah kan zam than ne lai maw tiin vansang a aumi an tampi lai.

Nunnak tiang a thapmi pasaltha nan si caah nan thil tuahmi cung ah hohmanh nih mawhchiat le soisel ngam ding cu nan si bak lo, nain khuachung i kah cu kan hrial piak hram ko u timi hi nulepa tampi an phuan ngam lomi biacah a si.

Ralkap cu uihrut bantuk an si caah kah an ton caan poah ah mizapi lakah meithal le bomb kah khi thlachiat an ruat bal lo, khuachung nan kah hna caan ah a ingtuar tu taktak cu kanmah miphun lila kan si tawn. Thantlang bantuk in Hakha a ciam dih ve sual lai timi zong phan a um.

Mizapi um lonak Timit le Thantlang ah MAH ralkap an tam tuk ko caah zalawng tein anmah pawl khi kan tei piak hmasa ta ko u law, nan tei hna tikah Hakha ummi ralkap zong a herh ning in nan rak thuat ve te hna lai, cutik i a phunzaimi an um sual ahcun keimah hrim nih an cal ka kingh te hna lai. Crd-Salai Lungthlitum

Relchap, Kusale Rual Firkhut le Depde Ruangah Meithal kan ngeih lo, Hriamnam Zalh Piaktu Hna Depde Phete Hlennak Hi Ralhrang Nakin Doh A Har Deuh. Hriamnam Puaisa (Weapon Brokers) le Hriamnam Cawkpiaktu hna hlennak, Eihmurnak, Depde nak le an Phete nak hi Ral sungh tertu an si men lai.

Ram le miphun dawtu hna nih tai rek in an kan hlut mi phaisa ning tein, hriamnam cawk khawh si sehlaw, Ralhrang hi kan thluk cang hna lai. Ramdang in tling tein phaisa hi kan sin ah aphan. Kusale asimi, MPs, Supporters, CDF upa le ralbawi kut ah tampi a vaivuan. Meithal puaisa hi CDF lei puaisa le zuar tu lei puaisa 5-6 nih a miak tampi he an kan hlen ve ve tawn.

Kusale, Puaisa le hruaitu upa hna nih, Phaisa an kan ei dih cu um rih seh, thilri adik mi an kan pek tawn lo. Kan cah hna lio ah kan chimh mi le an kan zuat mi thilri aa dan tuk. Meithal man hi ting 30 sisehlaw, puaisa lubo rual depde nak le Phete nak ruangah let 5-7 tiang in aman a kai. Ting 30 man kha ting 150 in kan cawk hna.

Aman a tam zong ah a thilri hi adik mi siseh law, aa ning dueh rih. Meithal ṭha bak mi, a thar asi an kan ti I, kuan 100 hrawng kan kah ah a rawk ai. M4 meithal hi mah bantuk deuh lawng an si. Tlawmte kan kah ah, pakhatkhat a rawk lengmang caah ral kan doh mi nain, kan meithal kan remh ah can adih deuh tawn.

Hriamnam puaisa lubo rual hi kawlmi le chinmi lawngte an si ko nain, an hrawkhrawl ning le an depde ning hi a dih ko. Chimh pit khi an si. Phaisa pek ta locun an kan, a can ah atu bak hi a herh an kan ti caah, Ramdang in a tlung rih lo kan ti hna, angah lo tu bak hi rak put uh an kan ti. A karh tampi he mi kan cuai hna.

Thaizing ah a ngah lai an kan ti nain thla 1 leng a rau. Ziah kan ti tikah, lam a rawk ee, lampi ah ralkap le Palik an hrang tuk, report tu le Dalaan ka hrial hna, cu ee kha ee, an ti le kan dih ko. Tampi cu phaisa he minung he an hung chuak ti lo.

Hi vialte depde le firkhut hriamnam puaisa lak ah hin a fel mi te an rak um ve ko nain, anmah he I tawn hi a har ngai. Phaisa pek ta lo cun an ti, Phaisa pek ahcun thildik an kan pe nain, puaisa dang nakin aman hi a fak deuh tuk. Puaisa dang sin ah ting150 asi ahcun ting 200-250 hna an si.

Acan belte a rau ngai. Depde puaisa hna nakin an rau deuh. Cucaah dawtu le dawtmi hna nih miphun le ram hnakkar tenh in, an ngeihchun te le, nan kenret le Bukbau chung ta chuak bak in nan kan hlut mi hi, mah ti in ningcang loin an kal dih. Raldoh can ah kan cawk mi Meithal le kuan aphan khawh tawn lo caah vava kan tum can hi a tam deuh tawn.

Puaisa le kusale rual nih an kan hlen can le Raldoh a fak saling can hna aa tawn hi a tam deuh, kan cawk chum te meithal thar tlawmpal kah ah aa rawk, kuan a tap, tbk an si. Cucaah Kutserh meithal in kan doh lawlaw cang hna. Meithal le kuan duh chung in kan pek uhlaw, tiah kan vuivai tuk lio ah, hi Bantukin mi hlentu hna an rak um cu apoi taktak khi asi ko.

Dohthlennak kan tei in, Meithal puaisa le kusale vialte hi kan thiangh hna ah herh men lai kan ti can a tam tuk. Rallokap nih hmunkip ah hehchet tiah an kan namh lio ah, Helicopters le Jet Fighters tiang in an kan phomh lio ah, Meithal le hriamnam, kuan van hai in kan um tluk in a har mi le kan vansang hi a um ti lai lo.

Ralhrang nakin Meithal puaisa, meithal cawk tu kusale rual hi pei ṭihnung deuh an si hi tiah kanmah le kanmah cu kan I ti tawn. Raltuk a cawng liomi PDF cheukhat hmanthlak.96 soldiers – pdf, Rallokap cu Meithal le kuan serhnak Cetzung an ngeih hlei ah Ramkip ah cawk ding in an vak rih. Tayzah le U Pai Co. Ltd nih hriam ṭhaṭha kawl in an cawk piak hna.

An herh ni bak ah duhchung an hmang khawh ve. Hriamnam an kan bawmh khawh lo ah um cang ko seh, NUG cu, kan hngawng lawng a sau mi, kan hngawng a cei pah cang. Lung Retheihnak tu an kan pe deuh lehlam. Cucaah NUG sin in meithal ngah ding kan in ruahchan ti lo. NUG kuttang PDF 157, NUG kuttang lo 250, LDF 400 leng aum tiah NUG nig MOD ah an phuang.

NUG kuttang PDF hi 100000 leng ansi. NUG kuttang lo he cun 200000 kan tlin ko. Rallokap a thluk khawh tuk ding kan si ko. Meithal aum lo ee tiah kan vuivai tawn kha asi fam cuh. Sihmanhsehlaw, NUG nih hi vialte meithal bawmhding cu asi khawh lo ti hi kan theih tuk ko. Tluang tein le eihmur lo tein, Hriamnam cawk khawh nak lam tu hi NUG nih a lam kan kawl piak deuh sehlaw, ti hi nawlpat kan duh mi cu asi.

NUG kusale hi depde le Phete, firkhut ah celh lo bik mi an si. NUG nih an zumh bak mi a dinfel mi Kusale nih hriamnam zalhnak le cawknak hi ṭuanvo an kan lak piak khawh ahcun, kan mah nih Meithal man kan pek ko hna lai, a poi nak aum lo. Mipi nih an ngeih mi vialte an pek sian lio asi.

Sui le Ngun le an ngeih mi hlawnthil vialte an phoih dih I, meithal cawk nak ah an kan pek. An kan hlen dih caah asiko. NUG Vuanci U Nai Htoo Aung nih Meithal puaisa le kusale dinfello pawl cu Upadi ning in dantat le azizut an si lai, Mipi phaisa anmah rumnak ah an hmang mi cu cohlan khawh asi lo, Rampi Tupung case in (Naing Ngandaw titsa phoah hmuh) asi a ti.

Nain nihin tiang hma an lak rih lo, zeitindah dantat an si lai timi Upadi le a can rih khiah mi aum fawn lo. Zumh awk cu an har ngaingai. Apoi nak cu NUG ah mifir le Damiah an rak tam tuk mi hi a poi cemmi cu asi ko.Paucan Dohthlennak hi Puaisa le NUG kusale cawmtu le rum ter tu pei asi hi tiah a ti mi mino thah cawk lo kan si cang.

Mipi nih an ngeihchun te, an kenret le Bukbau bungh in, an hlawnthil Suingun hlawnthil vialte meithal cawknak caah an kan hlut ko nain, Puaisa le NUG kusale nih rumnak ah an hmang dih. Cucaah nihin tiang, Meithal kan ngeih lo, ral kan tei khawh lo mi hi asi.

GZ ralkapbu le mipi cu, kan nunnak le thisen tampi kan pek cang: Kan inn ka lo le kan khua mei an duah dih cang: kan Rawlruk tiang meiduah piak kan si: Nel thuan can le thlawh ṭuan can kan ngeih bak lo nain, Meithal an herh tuk caah, mi kan cuai hna I, kan cawk piak hna. Meithal zong an hlen hna, kan phaisa zong an hlen hna, kan mah tu leiba he kan um.

Meithal le kuan cawk nak ti ti hlah, Puaisa le NUG kusale rumnak asi ti cang uh an kan capo mi zong an um. Innlo le Nel, Sa ṭil, Hlawnthil vialte mipi nih an kan zuar piak hi Kumkhat leng asi cang. Nain Puaisa Le firkhut lubo rual paw le tirawl ah aa cang dih I, Apoituk hrinhran ko.

Puaisa le Kusale rual nih; Heh meithal an kan ti le kan hung zoh cu quality aum ti lo mi, outdate hna ansi, aman taktak ting 20 asi ko nain, ting 150 in an ka cawk tiah an kan hlen rih (M4 Rifle pakhat mu). Adang um cang ko seh. Hmancia AK47 ting 80 man asi lio ah a rawk mi, mah tein kan in remh chawm mi AK47 cu ting 60 hna kan pek hna. Remh khawh loin kan chiah mi hna an tampi rih.

Tuak ko uh, mipi hna; Zeitindah rum loin an um khe lai. Meithal ngah khawh ding GZ mino hna nih phun thum in kan I zuam ṭhan. EAOs hna sin ah kan ralkap thlah in Raldoh pi, an tlun lei meithal he tlung: Raldohnak ah Rallokap sin in meithal lak khawh kan i zuam: Kanmah tein sersiam: Mah tein hriamnam serh awk ah a herh bikbik mi thilri zalhnak le cawknak caah a tlawmbik ting 100 adih.

Puaisa le NUG kusale lubo hna sin in ting 250 kan pek tawn mi M16 meithal pipe kha ting 10 in kan cawk. Kan ser tikah, ting 15 lawng adih. M16 pipe kha, thir pipe in kan tuah ahcun: ting 5 lawng adih. Nain a hmual afak lo. Rifle a tluk lo.

Raldohnak ah pe 150 -300 tiang lawng a kah khawh. Auto le General Meithal pipe bantuk asi lo. Cucaah Meithal pipe lawng kan cawk I, a dang cu kan ser dih. Cu hnu lawng Rallokap cu duhchung kan thah ve hna, Nikhat ah 100 leng hna kan thah khawh cang hna.

Mytel, Telenor tower le tower dang kan hrawk mi in, 60 MM, 70 MM, 120 MM, Launcher, RPG, le bomb phunphun cu kan ser khawh ve cang. Cucun uico rual cu chimhrin lengmang an si ko. 2022 June 30 ah Loklung PDF, Irrawaddy nih Rallokap Sakhan an lak lio an lak chih mi meithal hna.

Karenni PDF tehte khannak: Ramri he aa naihnak ahcun an hlen tuk hna lo. Ramri he aa hlat dueh mi ah hin, hlen le eihmur hi a tam. Chin, Rakhine le cu hna ramri velchum Makui le Sakai PDF cu an hlen tuk hna lo. An upa pawl a eihmur an um lawng ah bawmhnak phaisa hi a vaivuan lai.

CHIN MPs le Kusale rual an firkhut tuk timi belte kan theih pah lengmang ve. Mi dinfel cu MPs le NUG kusale ah an tlawm ve ruah, CHIN RAM hi an kan ti ve. CDF methal an bau zungzal, Ramdang nih punghman an pek lengmang fawn. Upa hruaitu le kusale nih anmah rumnak ah an hmang lengmang fawn.

CHIN Ramdang um mi hna nih MAH le Ralhrang thahnak caah phaisa tampi an kuat ko hna nain, CDF nih meithal tlamtlin in an ngeih khawh rih lo, Kusale rual le MP Lubo rual nih rumnak ah an hmang caah asi. Ramdang ummi CHINMI nih MP lubo rual el NUG kusale cu an cawm hna I, an rum ter hna.

Phekhung PDF nih Battery hmang in an ser mi Launcher (Missile) in No 7, Sakakha (7) Rallokap Sakhan an kap lio. 2022 September. Karenni ahcun tanglei Bantukin an hlen hna. Bawmhnak rian a ṭuan mi nu Mah Thingyi sin in, Thai bak nuai 150 cu Kusale pa nih aa zam pi.

AK47 pakhat le M16 kuan 5 pack kan in cawk piak hna lai tiah an hlen hna. Lam a ṭhalo, Rallokap an hrang tuk, a ti lengmang. A hnu ah a mipum in a tlau. PDF upa pahnih nih kanmah nih kan in kawl piak lai, anti. Phaisa apek hna, an tlau ve.

Dee Daily Care Co. Ltd Director Catherine Aung timi nih Nuai 3450 an hlen hna. Myanmar now in a address ning in phone call an tuah nain cu Nambar cu Thailand ah aum lo tiah computer nih a leh hna. Ramri he aa hlat deuh mi ah hin hlennak hi a tambik ti asi. YDF chungtel ralbawi pakhat cu India ah hriamnam a cawk, kap 2-3 in a miak hna.

An ram phak tikah, YDF, PDF le Piosawṭhi he hriamnam a zuar dih hna. Monzua, Pale, Myaung, Pauk, PRA – Magway le Kani tiang amah sin ah an I peh tlaih dih. Sipuazi tama le puaisa asi ko nain, NUG nih dantat nak an tuah khawh ve lo. Ramri he an I hlat tuk caah, hriamnam zalh a har tuk caah an hlen khunnak hna hi asi.

Cuticun Puaisa le Sipuazi tama, Kusale hna nih nawnnawk in an hlen lengmang hna, Rallokap nih an kan namh cuah mah fawn; PDF sin an phan ter mi meithal nih le a ṭhalo mi le a puak khawh lo mi a tam deuh caah, GZ hna Raldoh an huam ti lo. Cucaah CDF / PDF in mino tampi an I phuah I, Malay, Singapore le Delhi ah an kal tawn hi asi. Karenni, Faruso peng, Rallokap motor thluanpi an kah. Tank 2 le meithal 5 an lak lio.

June 2022 , Meithal le hriamnam an phawrh tikah, Rallokap kutin luat ding ah an ra, ṭihnung le thihnak lam tampi kha an tanh pah in a rami puaisa ansi caah, dinfello nak he rianṭuan asi tiah anmah puaisa hna nih cun an ti ve. Ral kan tei lo nak bik le a poi bik mi cu; hlennak le firnak hi ansi. Mah le mah zong kan I hlen, kan I eihmuar, Ramdang zong nih hlen. Belgium tuah mi M4 thar bak ti asi. Nuai 100 an pek. Tlawmpal an hmang ah a rawk.

Lampi ah Suimilam le thil chiahru a zuar tawn mi pa nih African in a ram meithal asi tiah an kan hlen khawh lio asi. Ramdang mi kha hlen awk ah Puaisa nih an hman hna. Ramdang meithal asi an kan ti, kan cawk, a rau hlan ah a rawk dih. Arawk lo hmanh ah, a thar an kan ti, a thar man in kan, a hlun a rak si. Cuticun, Ramri ahcun, Puaisa l Kusale rumnak kawl nak hmuh ah aa cang.

MAH thluknak caah Meithal cawk nak hmun asi ti lo. Lampi ah thlichia achar mi pa nih Ramdang ah meithal kan cawk piak hna lai an kan ti ahcun, kan zumh colh I, phaisa kan pek colh. A zam I a rum beh, a rak chuak tilo, Cubantuk chan ah kan um.

Jericho khualipi cu ki lak ah ki chiat cem Tuu ki in a tei tu Israel mi cu Ai khuate an tuk ah tampi an thi. Ral an sung. Aakhan nih a fir caah asi. Aakhan nih a sual aa phuan I an thah hnu ah ral an tei. Nihin tiang Israel ram a dir. Israel khi mi ram an chut mi lawng te asi.

Paucan Dohthlennak ah MAH kan thluk khawh lo, ral kan tei khawh lo ahcun, Upa le kusale nih bawmhnak phaisa nan fir dih caah asi lo. Aakhan bantuk cun kan I tuah lailo. Ral tei na duh ve ahcun, Upa le kusale na sinak in rak I ngawl cang. Bawipa a lungtluang sehlaw, ral ka dohpi cang seh, KRIFA le Pathian fapa le asimi CHINMI Nih MAH thluk cang usih. Crd-Zingtincuai Cinzah

Relchap,India ram, Manipur Ramkulh ah Myanmar Rammi Panga Tlaih An Tong!, India ram, Manipur ramkulh, Churachandpur pengkomh Ngathal khua ah phung ning loin a ummi Myanmar rammi panga cu palik nih nizan August 9 ah an tlaih hna, tiah theih a si.

Ṭuanvo ngeitu pakhat nih, “India rammi sinak ID an ngeih lo caah kan tlaih hna,” tiah a chim. A luancia June thla 28 lio zong ah Churachandpur pengkomh ah palik nih inn khat hnu inn khat checkhlatnak an tuah caah Myanmar rammi 20 telh in minung 80 an rak tlaih cang hna.

Rihkhawdar Kahdohnak Ah SAC Ralbawi Pakhat A Thi, Falam Peng SAC Ralkap Sakhan Kahdohnak Ah Ralkap 8 An Thi, Chin ramkulh, Falam peng India-Myanmar ramri Rihkhawdar kahdohnak ah SAC ralbawi lam hruaitu(Battalion commander) Lieutenant Colonel Way Myo Paing cu, Chin hriamtlai phu nih drone in bomb an thlakhnawh caah a thi, tiah theih a si.

“Lieutenant Colonel Way Myo Paing le a ralkap cu Rih ah umhmun khuarmi an si. Nihin August 10 zing ah bomb an thlakhnawh i a thi. A hlan ah Second Battalion commander a rak si i, cu lio in Rih ah a rak um cangmi a si,” tiah ralkap chung mi nih an chim.

Rihkhawdar um SAC ralkap sakhan, Cheu cu nihin August 10 zing sml 2:00 hrawng ah Chin hriamtlai phu nih kan kah caah ralkap 5 an thi, tiah CDM-Siyin nih cathanh an chuah. Lieutenant Colonel Way Myo Paing bomb in an thlak i a thihnak hi, Rihkhawdar sakhan an kah lio ah a si maw si lo ti cu hngalh a si lo.

Rihkhawdar Cheu sakhan kahdohnak ah CDF, CDM-Siyin, PDF Zoland, CNDF le MEDF nih an kah hna i, zing sml 2:00 in 7:00 tiang kahdohnak a chuak. SAC ralkap pali cu Chin hriamtlai phu sin ah hriamnam tel lo in an i ap. Kahdohnak a daih hnu in Jet Fighter pahnih cu an rak zuang i, an i hel. CDM -Siyin in ralkap pakhat aa hliam ve, tiah theih a si.

Falam peng Khuamawi khua tlang par ah ummi SAC ralkap sakhan cu, Mountain Eagle Defense Force MEDF nih August 1,2,3,6 le 7 ah drone in bomb kan thlak i, SAC ralkap 3 nak tlawm lo an thi kho, tiah MEDF nih cathanh an chuah . MEDF nih bomb lung 45 leng in kan kah hna i, SAC ralkap umnak thlam vialte le an i thuhnak khor zong an rawk dih, kanmah lei in a thimi le aa hliammi kan um lo, tiah MEDF nih an langhter.

Vanlawng Kahnak Hriamnam Kan Zal Lio, Tiah NUG Nih An Thanh! National Unity Government(NUG) nih PROJECT DRAGONFLY in hmuhmi phaisa cu vanlawng kahnak hriamnam zalhnak ah kan timhtuah, tiah NUG nih an thanh. Cupinah a herh rih mi thilri le hriamnam kan ngeih khawh nakding ah faakpi in kan i zuam lai, tiah an thanh chih.

PROJECT DRANGONFLY nih ai timhtuah mi a tlamtlin khawh nakding ah a kan bawmtu mipi vialte nan dihlak cung ah lunglawmhnak tampi kan ngei, tiah an cathanh ah cun an langhter chih. SAC ralkap hna nih vanlei kahdohnak an tuah tikah lehrulh cham kho ding in kan i zuam i, a luancia March thla thawk in April thla tiang ah, PROJECT DRANGONFLY in zeimawzat kan hmuh. Cu kan hmuh mi zat cu US dollar $ 20 lakhs hrawng a si, tiah NUG nih an thanh.

SAC Ralkap Le SNA Nih Hpakant Peng Seyin Khua An Khangh! Kachin ramkulh, Hpakant peng, Seyin khua inn 400 hrawng cu SAC le Shanni Nationalities Army(SNA) i bawm in an khangh, tiah khuami hna nih Media ah an chim. Nizaan August 9 zaan sml 11 hrawng in vanlei kahdohnak an tuah hnu ah mei in an khangh, tiah theih a si.

Seyin khua cu inn 400 hrawng umnak khua a si i, a khua ning ti awk in a ciam. SAC le SNA i bawm in an khangh mi a si. Vanlei kahdohnak an tuah pin ah SNA cu an ra i khua chung thilri; cycle le motor tibantuk pawl cu an khomh hna i hmunkhat ah an khangh dih hna, tiah khuami hna nih an chim chap.

Seyin khua pawng i SAC le SNA sakhan cu KIA le PDF tangrual phu hna nih an lak hnu in kahdohnak faak ngai a chuak i, cu kahdohnak ah cun SAC le SNA lei in 15 hrawng an thi. Cu hnu ah Seyin khua an khangh hi a si, tiah khuami hna nih cun an chim chap.

Nihin August 10 Yee Oo Peng Kahdohnak Ah SAC Ralkap 30 Hrawng An Thi, Hriamnam Zun 25 An Chuh Hna, Sagaing ramṭhen, Yee Oo peng Kungthar le Yamaikthar(ကုန်းသာရွာနှင့် ရမိတ်သာ) khua kar kahdohnak ah SAC ralkap 30 hrawng an thi i, hriamnam zun 25 an hna, tiah theih a si.

Nihin August 10 zing sml 7:00 in SAC ralkap pawl cu khuate thianh hlimhnak kan tuah an ti i, inn le lo an hrawh lio ah PDF nih an kah hna. SAC ralkap cu a tlawm bik 30 an thi i, hriamnam zun 25 an laak piak hna. Cucaah Monywa ummi Helicopter le Mi35 nih an rak kah hna pinah bawmtu ralkap zong an chap, tiah theih a si.

August 9 zanlei ah SAC ralkap pawl cu Yee Oo peng kungthar lei ah rallam an sial i, nihin zingka ah kahdohnak a chuak colh. Cu kahdohnak ah cun Yee Oo PDF le Depeyin PDF hna i bawm in an kah hna. “Nihin zingka ah kahdohnak a chuak. An Battalion ning ti awk in an thih caah Monywa Na Ma Khah in Helicopter le Mi35 in an kan kah i, hnu kan kir chung. Kanmah lei in ralkap 2 an nunnak a liam ve,” tiah PDF hruaitu pa nih a chim.

“Ralkap pawl cu zahan zan sml 10:00 hrawng ah hmun pakhat, Moesone(မူးဆုံ ) lei ah a chiah hna. Cuka in hriamngan tam ngai an kah. Zinglei ah Kungthar lei an kal i ralkap 30 hrawng an si lai, an dihlak in an thi dih,” tiah tualchung mi khat nih a chim.

Hproso Peng Kahdohnak Ah SAC Ralkap 11 An Thi: Karenni ramkulh, Hproso peng, Sulaku khua lei ah nizan August 9 ah rallam a sialmi SAC ralkap pawl cu Central Division Special Operations Group(CDSOG) le PDF ṭangrual phu hna nih an kah hna caah ralkap 10 nak tlawm lo an thi, tiah theih a si. Cu kahdohnak ah cun Central Division Special Operations Group nih sniper in SAC ralkap 11 kan thah hna, tiah CDSOG nih cathanh an chuah.