Kan miphun ralkap kut ah Saya Vabielo a thi

Kan miphun ralkap kut ah Saya Vabielo a thi
===========
Pyine vawleicazin zung(Hakha) ah duh-usi a tuanmi Saya Vabielo(Sabawngpi khuami, Mara) cu CDM tuah ding ah September 27, 2021 ah amah lawng in khua ah a tlung. Nain, lampi ah CDF-Thangtlang nih an tlaih i nithum hnu September 30 ah a thi cang tiah a chungkhar nih thawng an theih.

‘Bia kan halnak ah a tlu i a thi’ tiah CDF-Thantlang nih an kan ti tiah chungkhar lei nih an chim. A ruak hi CDF-Thantlang nih Zophei-CDF bawmh an hal hna i Zophei-CDF nih Rezua tiang an va thlah, Rezua ah Mara-CDF nih an rak lak ti a si.

Saya Vabielo cu kum 45 a si, fa 5 a ngei i anupi le a fale cu an khua ah an um. Matupi ah caan saupi cozah rian a tuan i Hakha ah an thialnak hi kum khat hrawng lawng a si rih. Dam lonak pipa a ngeimi cu a si lo tiah a chungkhat nih an chim.

A ruak an zoh tikah a lu a kuainak zong a um. Cu a hma cu a tluknak in maw a si asilole a dangdang in dah a si timi cu chungkhar lei in an thei kho lo. CDM a tuah lo tiah an ruah caah maw an tlaih asilole dalan bantuk ah an ruah caah dah an tlaih timi cu CDF-Thantlang lei nih fianternak an tuahmi a um rih lo.

Upatmi CDF-Thantlang hruaitu hna, Pu Sang Kian(Tlangpi, anupi Zephai) hi Thantlang peng fimcawnnak zung cazi lutlai a si i chungkhar harsat ruang ah CDM a tuah kho lo, a fanu 2 lawng CDM an tuah khawh. CDM a tuah lomi CDF nih an tlaih cio hna caah Pu Sang Kian zong CDF minung 6 hrawng nih a zamnak Tlangpi ah an rak lak ve. A fale nih a thil zong tha tein an timh piak i an kalter ve ko. Amah zong nih phunzai lo tein a zulh ko hna.

Khua lonh ah CDF ralkap nih an nau pakhat he an chiah tak chung hna i anmah cu khuachung ah wine an ding ta. An rit hnu ah an hruaitu pakhat nih Pu Sang Kian cu ‘CDM na tuah duh lo’ tiin a velh, cuti a velh lio ah cun thil chanh ding a ra thanmi Mang Thawng(Farrawn khuami, Pu Sang Kian a fanu vapa) nih a hmuh hna i a thlauh(phone an i chawn i khua lonh ah kan um ko a ti caah thil an chanh a si).

Nain, Mang Thawng(amah hi CDM a tuahmi a si) zong cu a velh ve. Meithal he a si hlei ah a meithal in a hmuaih chih hna caah an let ngam lo, a duh chung in a velh hna i Pu Sang Kian cu a hnarthi a chuak, Mang Thawng(Thawngbawi) cu fak tuk in a velh caah a hmai zong a kuai dih i tuhi a tho kho lo, drip an thlaih lio a si. Pu Sang Kian cu a thi he CDF ralkap nih cun an kalpi i atu hi CDF sin ah a um ko.

Hitluk fak in a velh hna lio ah a hawile CDF ralkap hna nih cun an zoh sawh ko, an thlauh lo. A velhtu CDF ralkap hi mino te a si, a pa zong pastor a si. Security vennak caah a khua le a min tiang cu langhter awk a tha lai lo.
Pu Sang Kian CDM a tuah lomi cu a hman, CDM a tuah lo caah an kalpi i phunzai lo tein a zulh ko hna. Nain, dalan bantuk cu a si hrimhrim lo. A fale nih zeitluk in dah CDF thazaang an pek timi cu nanmah CDF-Thantlang nih fiang tein nan thei dihmi a si ko.

Pu Sang Kian hi keimah ka pa a farnu i a va a si, ka ttang a si. CDM a tuah lomi cung ah kanmah zong nih kan mawhchiat ngai ko. Nain, tlaih in thisen chuah tiang velh a ton hlei ah kan unau Thawng Bawi tiang tho kho lo tiang in a velhmi cung ah a chungkhat kan ngaih a chia hringhran ko. Mah tiangtiang hi cu miphun ralkap pakhat nih a tuah awk a si lo tiah kan ruah.

A si khawh ahcun CDF-Thantlang hruaitu le CNF upa hna nih thil sining kan zohfel piak u law a velhtu kan ralkap hi a herh nan ti ning in dan kan tat piak hram ko u tiah zaangfah kan in nawl ko hna. Nanmah hlei in bochan awk dang kan ngei hna lo. Wine a rimi ralkap pakhat tuahsernak ruang ah miphun ralkap CDF kan in zumh hna nak a zor bak lo, miphun le ram caah nunnak thap in rian nan tuanmi cung ah upatnak sang bik kan in pek zungzal ko hna. Credit: Salai Lungthli Tum