Kan Jerusalem Aizawl Na Cungah Kan I Lawm.

Kan Jerusalem Aizawl Na Cungah Kan I Lawm.
==========
Acuancia kum 2 lio ahkhan Manipur State Churrachandpur khua ah culture day an tuah i, Pu Zoramthanga Mizoram Chief Minister khuallian ah an sawm. Minbung khua ah’ rawi ei’ aa dinpah in, ‘hi tihin bia achim. Kan unau Hoih Tin MLA cu Arakan army (AA) nih an tlaih i, a luatnakdingah ka sikhawhchungin kai zuam i, atu cu achuak cang a ti, Pu Zoramthanga nih a chim duhmi hi, ramri nih kan then hmansehlaw unau kan si, ‘cucaah aa bawmding kan si, ‘tikhi a chim duhmi asi.

Churachandpur khua ah culture day ah,’ hi tihin bia achim than. Miphun tamdeuh umnak tangah a ummi nan si caah lungretheih le vansang nan ton tikah nan jerusalem khuapi Aizawl ah rak chim uh, ‘nan caah zan khuadei innka kan awnh peng ko ati. A chimh duhmi cu; Chinmi or Chinlung chuak unau hna ram dangdang ah ai thenmi mi hna nan khuapi bik cu Aizawl a si, Cucaah nan mah bawmh dingin ready kan si peng a ti duhnak khi asi.

Atutan kan ram abuai leh cangka in Ministry of home affairs India nih Mizoram ah ralzam nan luh ter hna lailoh, ‘tiah order a chuah colh. Mizoram Cozah/MZP le YMA hna nih unau kan si. kan lut ter hna lai. kan tuamhlawm hna lai, ‘tiah India Cozah sinah an va chimh. Cucaah Mizoram ah hna ngam tein kan idor khawhnak hi a si.

Ni hin ni ah Mizoram nih akan tuamhlawm mi hi, a ho phu le bu hna nih nan va chimh hna ruangah asi loh. Chinlung chulkhat chuak unau kan si, ‘an ti ruangah asi. Cucaah kan mah nih kan chimh ruangah, kanmah nih kan tuah ruangah timi biachimh hi kan hrial hna aherh. Cu ti lo ahcun unau dawtnak in a rami lungput kha phu pakhat le bu pakhat credit laknak men ah kan hman sual ahcun a thurhnom mi lungput ah asi khawh ti hi kan philh lo ah atha. Cu lawng asi loh. Dawtnak in a rami lungput zong kha credit kan pek duh hna lo zong asi,’ ti hi kan theih zungzal ah a tha.

Mizoram nih akan bawmhmi hi atlom tilo. Kan mah tu nih chim tlak ngaingai in kan bawmh khawh mi hna a um lo. Chinchap ah harnak an ton lio hmanah kan nin ngaichiat pi hna timi biachim hmanh kan dai tlang tawn. Assam he ramri kong an buai lio ah kan unau Minipur a um mi hna nihcun Mizoram nangmah he hmunkhat ah kan dir tiin cathanh an hun chuah colh.

Thisen ah apel tehmanh aa tlai lomi Mizoram Gorkha Association hman nih Mizoram nan mah he hmunkhat ah kan dir tiin cathanh an hun chuah colh ve. Hi lio caan ah kanmah tu cu dai ziar in kan um. Harnak an ton lio i, daiziar i um ter i kanmah harnak ton vial ah bawmhnak va hal hna khi ningzak asi pin ah kan miphun hmai zong a hngalh lo ngai.

Ka theih sual lo ahcun Assam he ramri kong an buai lio ahkhan Mizoram nangmah he kan dir ve timi kan chuahmi statement ka hmuh rih lo. Statement a chuahmi Bu nan um ahcun ka theihlo zong asi khawh men. Political Party pakhat a simi an haotu min thut in Pu Zoramthanga Chief Minister a tlinhnak lawmhpi mi cakuat lawng ka hmuh, A ngaite ti ahcun Chief minister lawmhpinak cakuat nakin harnak an ton lio ah nanmah he kan dirti timi cakuat khi alet in man anei deuh…miphun hmai zong a hngal deuh fawn.

Maw Chinlung chuak unau hna kan jerusalem khuapi Aizawl na hrum na ai lio ah tuarpi nak bia hmanh kan nin chim lo nain, lungfah lo tein nan kan tuam hlawm caah na cungah kan i lawm. Kan jerusalem ciammam na si. Credit: Van Neih Thang