Kan I Ralrin Deuh A Herh Ko Rua

Kan I Ralrin Deuh A Herh Ko Rua
===============
Nizan ah mi pakhat lawmhpinak ca ka ttial, mi tampi nih a dolh nan i harh lai ti mi fiang tein ka theih cia ko. Hmuh ning, ruah ning(ruahnak) le duh phun,..etc..Mizapi kan i khahnak tampi a um lai bantuk in kan i den lengluang phung awk zong cu a si ko. Keimah he a khat kho lo mi paoh cu ka ral tiin ruahnak(mihrut le mi molh)ruang ah thil ttha lo a chuah tawn i kan i ralrin ngai a herh cang. Comments cheukhat dawhcah lo bia le holh hmuh khawh len an si i ka lung a ttha lo ngai. Bia dawh le bia ttha ttha in comment don ka duh ruang ah a si lo. Asinain thil pakhat khat lehnak(reaction ) tuah kan timh tik ah khua kan ruah ta ve cu a hau hnga. Bia dawhcah lo chim rel hna i mizei nunphung ca hmanh ah thil dawh a si lai in ruat lo. Khrihfa nunzia he zong ai ralkah in ka ruah.

Ramleng um Laimi cheukhat pawl, ပြည်ထောင်စုသမ္မတမြန်မာနိုင်ငံတော် ( the Republic of the Union of Myanmar) ti hmanh zoh lo in a ttial thiam lo ding ko nih a zei paoh ah a thei bik le a hngal bik bantuk in Re~Re~Re~ tiah rak awn tuk tawn hlah u. Theih huaha mi ngeih ttung lo in duh paoh holhrel le thiltuah nan hman tuk ruang ah Lai lei khuate tiang nan buaiter dih cang hih. Cu ti ka ti tik ah sianginn a kai lo le cathiam lo kha kan nihsawh hna bia a si hrim2 lo. Ram ttha phanh le cangka in a fim bik, a thiam bik le a hngal bik phun in a um ter mi pawl kha kan ti duh. Ningcang tein khuasak,tintuk le holhrel a hmang mi le khua le ram tthanchonak caah fak piin a zuam mi tampi nan um, lawmh a um tuk hringhren. Upat hmaizahnak zong kan pek hna.

UK, US, Europe, Australia,..etc… ram ttha phanh, an Vawlei va lamh le cang ka in pup tiah fim si sehlaw an pu an pa chan in a rak um cang mi an mah miphun pawl kha an mui nan hmu ti hna hnga lo. Nangmah le kei kan umnak Vawlei ( Earth) ah hin an um ti nemmam hnga lo, Vawlei dang ah an i tthial dih diam cang hnga. Cawn paoh ah hngalh dih le fim cu a si lo nain cawn ve lo le theih ve lo ahcun thil hi hngalh an har ngai tawn. Ramchung ah a um mi bochan mi kan pa le mifim, mithiam (biaknak ah siseh, ramkhel(politics) ah si hna seh) hna kha nan duh paoh in nan thangchiat,nan soisel (detracts,berate/chided) hna. Micheu le bang nih cun volhpamhnak tiang nan tuah hna, hi pawl hi fak deuh in rak ruat ve tthan tuah u law ti kan duhpiak ngai hna.

Minung a tling dih kho mi a hohmanh an um lo( um khawh phung zong a si lo). A fim tuk ti ruah mi zong nih an hngalh lo mi a um khawh bantuk in a thiam tuk tiah ruah mi zong nih an tuah khawh lo mi thil tampi a um kho ko. Tlamtlin lonak i maimilh piak hi hlawhtlinnak ding caah a tawhtlai a si. I entai/ hnorsuan, i doh( duel) pah in daihnak ser khawh a si lo ti cu zapi theih a si. Toidor nun nih daihnak a chuah pi i daihnak a umnak lawng ah hnangamnak zong a um ve. A khat lo mi ah i theih piak thiam i zuam in a khat mi ah lungkhat thinkhat in hmai kan nor cuahmah ko ahcun ni nikhat cu kan i tinh mi hmun kan phan kho ko lai.
Roland
Japan.