Salai Josua Van Cu A Hawipa Tlamtlin Lo Ruang Ah Aa Ṭhua Ṭhan Lai Lo
=========
UFC Flyweight fighter Joshua “The Fearless” Van cu a ra lai mi 2024, April 7(US- April 6) ah MMA i celh dingin ferter a si cang ko nain a hawipa tlamtlin lo ruang ah aa celh kho ṭhan lai lo, tiah theih a si.
“Keimah he aa thong ding mi pa Brazilian MMA celh thiam Lucas Rocha (kum 23) cu amah lei tlamtlin lonak ruang ah kaa ṭhua ṭhan lai lo” tiah Salai Joshua Van nih a Times Line ah a ṭial. Lungmili Post
Sagaing ramṭhen, Kalay khuapi, Kalay sianghleirun in an hrenmi hna zung ruianṭuan pawl le siangngakchia 100 hrawng cu 2024, March 1 thok in a bu tete in an thlah ṭhan cang hna, tiah tualchung mi hna le Kalay mizapi ralkap hna nih an chim.
A luancia February 26 ah Kalay sianghleirun luhnak um SAC ralhrang chek Gate cu tualchung hriamtlai phu hna nih luhhnawh in an kahdoh i aa hreng mi cachimtu Saya/mah, zung rianṭuan le siangngakchia 130 leng cu Kalay mizapi ralkap hna nih an khamh hna i an hren hna.
“March thla thok in kan thlah ṭhan hna. Zung rianṭuan le siangngakchia hna cu kan thlah ṭhan hna i Kalay sianghleirun in an lu bik le cachimtu Saya/mah pawl tu cu kan hren rih hna. Annih cu CDM i an i tel duh lo caah Upadi he aa tlak ningin dantat an si lai” tiah tualchung hriamtlai phu chungtel pakhat nih a chim.
A luancia 2024, February 21 thok in Kalay peng ah SAC ralhrang pawl le tualchung hriamtlai phu hna karlak ah kahdohnak a faak i atu tiang kap 2 kar ah buainak a faak ngai rih, tiah theih a si.
Chin ramkulh, Chinlung khuapi ah a voi (1) nak Chin ram fim cawnnak kong he pehtlai in tonbiaruahnak le ceihmai ṭinak an ngei kho, tiah Chinland Council, Ministery of Education nih March 27, ah cathanh an chuah.
Cathanh an chuah mi chung ah March 21 in 24 tiang, Chinlung khuapi ah Chinland Council, Ministery of Education hruainak in Chin ram fimcawnnak kong he pehtlai in tonbiaruahnak le ceihmai ṭinak kan ngei kho i pengtlang le khuakip in fimcawnnak lei ṭuanvo ngeitu minung 30 leng an kai kho caah Chin ram chung fimcawnnak 90% a haup khawh, tiah an thanh.
A tutan tonbiaruahnak ah Chin ram Education Policy Draft kan ser khawh i hmailei ṭuan chuah ding rian pawl zong mizapi lungtling tein kan suaisam khawh. Cucaah Chinland Council, Ministery of Education nih dothlennak chung ah fimcawnnak kan sunghnak hnga lo le dothlennak a dih hnu tiang zong pehzulh khawh ding in kan si khawh chung kan i zuam lai, tiah an thanh.
Cun, Chin ram fimcawnnak a tha a der nak hnga lo le Chin ram cu fimthiamnak in kan sersiam khawh nak ding caah ramchung ramleng mizapi nih mah le thil ti khawhnak cio in a lamkip in thazaang chuah ding in, an thanh.
Mizoram peng, Hnahthial khuapi ah Chin ramkulh, Matupi khuapi in ralhrial ngakchia 1 cu ti in a pam, tiah theih a si. March 27, ah ralhrial in Hnahthial khuapi ah khua a sa mi Chin ramkulh, Matupi khuapi, Lawngvan sang in U Yung Bal le Daw Yil Hing hna i an fapa Salai Thang Lian (kum 14) cu khua pawng tiva ah tak kholh ding in a hawipa he an kalnak ah tiva chung ah a tla i a nunnak a liam, tiah theih a si.
“Zing suimilam 11 tluk ah khua pawng tiva ah tak kholh ding in a hawipa he an kal. Zanlei suimilam 1 tluk ah a hawipa he an i tuai lio ah tichung ah a tla i a nunnak a liam.
Tichung a tlak lio ah a hawipa nih a bawmh khawh lo caah a neihnak hmun um khua upa pawl a va auh hna i an chuah khawh tik cu a thaw a rak dih cang,” tiah a mah he aa naihniam mi pakhat nih a chim. Ti in a paam mi Salai Thang Lian ruak cu March 28, zaanlei ah an vui lai , tiah theih a sI.