Kan Chin hriamtlai phu 4 AA sinah training an kai nak kong ah holh lo te khan um ko uh!!

AA Sin Ah Chin Hriamtlai Phu 4 Training Kai Ah An Um
==================
AA sin ah training a la mi phu thum an um tiah min langhter a duh lomi pakhat nih Mindat Times ah a chim. CNA sin ah Training Kai loin AA sin ah training an laakmi hi Chin state ca ah cun tihnung taktak a si a ruang cu bia i kamh mi an nei theo lai zumh a si. AA nih Paletwa cuhkalh a kan timh cuahmah ko bu le Paletwa cu Rekhine ram a si tiah media hmang le thahrum hmang in an kan doh cuahmah lio ah atu bantuk thil an tuah cu Chin mi caah tihnung dirhmun kan phan cang.

Atu AA sin ah training a kai mi hna hi, CDF paletwa tlawmpal le CDF Daai le CDF mindat le MDF MARA an si tiah min langhter a duh lomi pa nih cun a chim. training an va kainak a ruang bik hi Meithal an kan pek theo lai ti mi zong an i ruahchan fawn ti a si. AA nih cun CNA a thazaang a der poh a duh ve caah Chin mi zeitluk in an i tthendarh lai ti mi cu a tuak zungzal i Chin mi chung ah politics chiava tuah a rak i zuam ve.

A luan cia caan ah social media ah a rak lang mi cu AA nih CDF mindat minung 20 cu training dih bak ah hriamtling pe a van thlah hna rak theih a si. Kha hnu cun Mindat nih AA palhnak an hmu kho ti lo i, AA minthatnak lawng te an chim cang. Cu mindat nawl cu i cawn riangmang in MDF MARA le a dang phu hnih nih AA sin ah pehtlaihnak an tuah hi zumh a si. Adang training a va kai mi hna hi an kir rih lo caah AA nih hriamnam a pe ve hna lai maw ti mi cu theih a si rih lo.

Chin ram ahhin hriamtlai tampi an um i, CNA he aa rem lomi phu hi cu anmah zawn lawng a ruat mi le mah peng lawng politics a khel mi an si ti theih a si. Aruang cu Chin miphun dihlak nih kan neihchun hmun tha bik Paletwa hmanh zuar a siangmi hna hriamtlai bu cu zeitin dah tuah an that lai, mizapi nih pahisa bawmh lo hrimhrim ding an si cang ko tiah USA ummi Za Lian Cung nih a timeline ah a tial ve.

A cung lei kong he pehtlai in “Vantha Tha” a ti mi pa nih, ” A khawika an va kai zong an i timhmi ai khat ko caah buai len awk a um loh. Nan kaa kha cip deuh uh. Khawika an va kai zong ah mipi ca thiam thiam an si ko. An kainak hmu le hma ah kha nan buaiawk a um loh. Lam dang tu khan phaisa kawl i zuam.

Nu nih holh lo te khan um ko uh. Hawi Nu sal ttha Nilinh le ruahsur tuar in rethei in kan ram caah, harnak a phunphun tuan in an um lio ah, nan nih zeibantuk thawngpang dah ka thlah lai ti hmanh nan i fiang lo. Bia ah chim ding le chim lo ding a um bantuk in, cathlah zong i ralring deuh uh. Cu lo ah cun Media nih hin mi nan buaiter hna la hih.” tiah commet ah leh nak a tuah. Crd-Vantha Tha

Relchap, CDF Paletwa Kut Ah A Ummi SAC Ralkap Sin Thawngpetu Pakhat Cu A Nunnak A Liam!, SAC ralkap sin thawngpetu pakhat cu tlaih a ton lio ah damlonak/zawtfahnak in a nunnak a liam caah a chungkhar he biaruahnnak kan ngei lai, tiah CDF-Paletwa nih cathanh an chuah. Paletwa peng Wading(ဝါဒိန်) khuakomh, Wading(ဝါဒိန်) khua in SAC ralkap sin thawngpetu Pu Aa Khai(kum 65) cu CDF-Paletwa nih an tlaih i an hren lio, August 19 ah a thi, tiah theih a si.

Pu Aa Khai cu thabat/thawvamh zawtnak a rak ngeicia mi a si, tiah an ṭial. Tlaih a ton hnu i a thih caah Pu Aa Khai a chungkhar he i caihhmainak le biaruahnak kan ngei lai, tiah CDF-Paletwa nih nihin September 8 ah cathanh an chuah.

Pu Aa Khai cu CDF-Paletwa nih cawlcanghnak a tuahmi kong ah SAC ralkap sin thawngpeknak a tuah caah, 2021 June thla chung ah voikhat, 2022 January thla chung ah a voi hnihnak tiin ralrinnak pek a rak si cang nain, SAC ralkap sin thawngpek a ngol hlei lo, tiah an chim. July 13 ah CDF-Paletwa nih an tlaih nain July 16 zaan ah a zaam, July 17 ah an tlaih ṭhan i, a ngandamnak ding caah felfai tein zohkhenh a si ko nain, July 19 zinglei ah a thi, tiah CDF-Paletwa nih fianhnak an tuah.

Pu Aa Khai a chungkhar sin ah pehtlaihnak tuah kan i zuam nain, Paletwa pengchung ah SAC ralkap nih phone line an thah caah pehtlaihnak kan tuah kho lo, tiah CDF-Paletwa nih an langhter.

Karenni Ramkulh In September thla zarhkhatnak Chung Kahdohnak Ah SAC Ralkap 18 An Thi, Karenni ramkulh in September thla zarhkhatnak chung kahdohnak ah SAC ralkap 18 an thi, tiah KNDF nih nihin September 8 ah cathanh an chuah. September thla zarhkhatnak chung ah SAC ralkap hna cu Demoso le Hparuso ah minung thazaang chap in rallam an sial i, motor run in riahcaw thiar khawh an i zuam, tiah KNDF nih an langhter.

Pekhon(ဖယ်ခုံ) pengchung zong ah Pinlaung(ပင်လောင်း) in SAC ralkap motor 40 cu Pekhon hrambunh battalion ah thazaang an chap i, atu cathanh chuah tiang ah Moebye(မိုးဗြ) ah fak ngai in kahdohnak a chuak, tiah an langhter chih.

Demoso peng in Hparuso peng ah riahcaw a phortu SAC ralkap motor 5 cu September 3 zinglei suimilam 4:30 hrawng ah KNDF B-15 nih a thlithip in an kah hna i SAC ralkap motor pakhat a rawk, ralkap 3 an thi, motor dang hna cu hnu an tolh tiah theih a si. Cu ni zaan lei ah cun Hparuso peng Htitawku(းသော်ကူး) khua pawng umhmun khuarmi SAC ralkap hna cu KNDF-B15 nih a kah ṭhan hna caah SAC ralkap 2 an thi ṭhan.

September 4, chunhnu ah Hparuso peng Htipawso(းပေါ်ဆို) le Dawngekho(ဒေါညေးခူ) khua ah umhmun a khuarmi SAC ralkap hna cu Karenni ralkap KA, KNDF/B-4, B-5 le B-15 phufonh nih an kahdoh hna caah SAC ralkap 6 an thi. Cun KNDF B-15 nih Hparuso peng, Kadala(ကဒါးလား) khua pawng umhmun khuarmi SAC ralkap cu an kah ṭhan hna caah ralkap 2 an thi ṭhan, tiah theih a si.

Demoso peng Ngwaytaung(ငွေတောင်) khuathar pawng ah rallam sialtu SAC ralkap hna cu KA le KNDF B-10 phufonh nih an kahdoh hna caah kaphnih kar kahdohnak suimilam 4:00 hrawng a chuak i, cu kahdohnak ah cun SAC ralkap pakhat a thih lengah hliamhma tuar an tam, tiah theih a si. Kahdohnak ah cun SAC ralkap hriamnam zeimawzat kan lak, tiah KNDF nih an langhter.

September 7, Bawlakhe(ဘောလခဲ) le Yuatit khua kar lampi cung, SAC ralkap meng 12 sakhan pawng ah Rua saam ding in a chuakmi SAC ralkap hna cu KA, KNDF B-21 nih an kahdoh hna i SAC ralkap 3 an thi, 2 cu fak ngai in hliamhma an tuar leng ah hriamnam zeimawzat an lakpiak hna, tiah theih a si.

Pekhon(ဖယ်ခုံ) pengchung ah September 3 ah khan Kungsone(ကုန်းဆုံ) khuakomh phungki biakinn tlang cung ah umhmun a khuarmi SAC ralkap hna cu KA, KNDF B-3, B-9, B-11 phufonh nih an kahdoh hna caah SAC ralkap pakhat a rak thi.

Karenni tuanbia chung ah le khuapau dohthlennak caan chung ah Karenni ramkulh chung in nunnak a liammi ralkap dihlak cu nihin September 8 Martyr’s Day ah upatnak sang bik kan in pek hna, tiah KNDF nih an cathanh chung ah an langhter.

Kalay in Yangon Lei A Zuangmi Vanlawng Ticket Man Cu Ks. 20,000 Leng In A Kai, SAC ralkap le tualchung hriamtlai phu kar kahdohnak a fah lengmang chin ruang ah vanlawng lam cu khualtlawng mi tam deuh nih hman a si caah, a hlan nakin Kalay in Yangon a zuang mi vanlawng ticket man cu Ks. 20,000 a kai. Sinain, Yangon in Kalay vanlawng cuan man cu an kai lo, tiah theih a si.

Kalay in Yangon kalnak vanlawng ticket man cu cuhlan ah a sangbik Ks. 163,000 hrawng a si tawn nain, nizaan September 7 in cun singhnih (200,000ks) tiang a phan. Yangon in Kalay kalnak vanlawng ticket man tu cu Ks. 138,200 in an zuar, tiah theih a si.

Kalay in Yangon, KBZ vanlawng ticket hi cuhlan i a man fak bik lio ah Ks 165,000 a rak si nain, atu ah cun Ks. 185,000 a phan cang. Yangon in Kalay lei cu a hlan ah a sangbik Ks. 172,000ks a si i, atu ah cun Ks. 197,000 a phan, tiah theih a si.

Atu bantuk in vanlawng ticket man a kainak kong he pehtlai in vanlawng ticket zuartu pakhat nih cun dollar man a kai tuk caah vanlawng oil man zong a kai i, ticket man a kainak a si, tiah a chim. Thanlwin airlines cu September 10 in aa din cang lai tiah theih a si. Kalay in Yangon vanlawng ticket leng ah Monywa-Homalin vanlawng ticket man zong cu hlan ah cun Ks. 118,000 a rak si nain atu ah cun Ks. 138,000 ah an kai, tiah theih a si.

Monywa-Chaung U Lam Kal Rih Lo Ding In PDF Nih Ralrin Peknak Cathanh An Chuah, Sagaing ramṭhen, Monywa-Chaung U lam cu caan karlak ahohmanh kal rih lo ding in PDF nih ralrin peknak cathanh an chuah. PDF nih cun Laakhruak(Emergency) in caan karlak chung an kham. Nihin September 8 zinglei ah cathanh an chuah i, mizapi hunhimnak ca ah nihin in zulh colh ding a si lai.

Kan cathanh a zul lomi cu humhimnak ṭuanvo kan in la hna lai lo. Khualtlawng motor hna zong harnak chung in nan luat nakhnga nan phanhnak hmun cio in nan i dinh chung naklai zong kan in nawl hna, tiah an langhter. Monywa- Chaung U lam cu a luancia August thla zong ah PDF nih lam an rak kham i, SAC ralkap motor cu bomb on an rak puahhnawh cang hna.

Kachin Ramkulh, Hpakant Peng Kahdohnak Ah SAC Ralkap 8 An Thi: Kachin ramkulh, Hpakant peng, Wayazuat khua pawng ah rallam sialtu SAC ralkap hna cu KIA nih bomb an puahhnawh hna caah SAC ralkap 8 an thi, 4 hliamhma an tuar, tiah tualchung mi pakhat nih a chim.

SAC ralkap pawl cu September 7, zinglei suimilam 7:00 ah KIA nih bomb lung 5 an puahhnawh hna. SAC ralkap bomb puahhnawh an tonnak hmun ah cun ralkap 7 an thi i, 5 hliamhma an tuar, hliamtuarmi hna chung in ralkap pakhat a thi ṭhan, tiah tualchung mi pakhat nih cun a chim. Shan ram chaklei KIA battalion 9 hmunram zong faak ngai a chuah i, SAC ralkap nih vanlei kahdohnak an tuah lengah hriamngan in kahdohnak an tuah tiah KIA nih an langhter.

Tamu Peng Ah Mi Thilri A Chuttu Mino Pakhat Cu PDF-Tamu Nih An Tlaih, Tamu khuapi Nanfarlong(နန်းဖာလုံ) sang le Tamu-Aungzeyar motor lam ah michawkvai thilri chuttu phu chungtel mino pakhat cu PDF-Tamu Battalion 1 nih nizan September 7 ah an tlaih, tiah theih a si.

Tlaih a tongmi pa cu Tamu khua, Myoma 13 sang ah a ummi a si tiah theih a si. PDF nih biahalnak an tuah tikah amah lawng siloin thilri chuttu phu chungtel an min zong a phuan hna. Cu hna zong tlaih ding in kan i zuam cuahmah, tiah PDF-Tamu Battalion 1 nih cathanh an chuah. Tu kum 2022 chung ah Tamu-Aungzeyar motor lam cung ah tualchung mi atu le atu thilri chuh an tong cang, tiah theih a si.

Htawai-Hteekhee Lampi Wartaw pawng Kahdohnak ah SAC Ralkap 12 an Thi!: Tanintharyi ramṭhen, Htawai-Hteekhee motor lampi, Wartaw khua pawng kahdohnak ah, Duh-Tat-Yin-Hmu telhin SAC ralkap 12 an thi tiah Nway-Oo PYOHCiA nih an thanh. September 6 chun suimilam 12 hrawng ah Htawai-Hteekhee motor lampi ah Sha-Ge-Sha Bataillon 1, Kaw-Tu-Lay Army, Nway Oo Guerrilla Force phufonh hna nih, SAC ralkap Khah-Lah-Yah 265 cu an kahdoh hna.

Cu kahdohnak ah cun Duh-Tat-Yin-Hmu telh in SAC ralkap 12 an thi i hliamtuar zong an tam pinah, MA3 lung 4, MM 40 bomb lung 11, Kuan bawm 8, Pistol 1, 60 MM bomb lung 2, Phone le Seh thilri dangdang zong kan lak chih, tiah KTLA ralkap pakhat nih a chim. KTLA, NOGF le tualchung hriamtlai phufonh hna cu, hliamtuar um loin hnu an tolh ṭhan, tiah theih a si.

Yesagyo Peng Ah Umhmun Khuarmi SAC Ralkap Le Pyusawhti Cu PDF Nih Bomb An Puahhnawh Hna Caah Ralkap 2 An Thi, Magway ramṭhen, Yesagyo peng Gway Cho(ဂွေးချို) khua pawng ah a umhmun khuarmi SAC ralkap le Pyusawhti cu nizan September 7 zinglei ah bomb puahhnawh an tong, tiah theih a si. SAC ralkap le Pyusawhti 6 cu umhmun an khuarnak in farlong 5 a hlatnak hmun ah sentari cawngh ding in an kal lioah bomb in kan puahhnawh hna, tiah Yesagyo Revolution Group-YRG in ṭuanvo ngeitu nih a chim.

“Zan sml 8:00 hrawng ah SAC ralkap le Pyusawhti cu sentari cawngh ding in an kal lio ah bomb kan puahhnawh hna i, Pyusawhti 2 an thi,” tiah a chim chap. Cu kahdohnak ah cun Yesagyo Revolution Group-YRG, Shwe Nyar Myae(PDF), KING COBRA People’s Defense Force(PDF), Urban Underground Revolution Force (UURF) phu hna i bawm in an doh hna, tiah theih a si. Yesagyo peng ah umhmun a khuarmi SAC ralkap Khah Lah Ya 258 le Pyusawhti, an dihlak 70 hrawng cu Gway Cho(ဂွေးချို) ah umhmun an khuar i, a pawngkam um khuate ah atu le atu rallam an sial, tiah theih a si.

Monywa Peng Alone Khua Motor Remhnak Hmun Ah Meithal Le Zen- Kuan An Tlaih, Sagaing ramṭhen, Monywa peng Alone(အလုံ) khua Chin Dwin tiva hlei pawng ah a ummi motor remhnak hmun ah nizan September 7 chun ah meithal le zen-kuan an tlaih, tiah tualchung mi hna nih an chim. “Chin Dwin tiva hlei pawng ah a ummi Zaw Win motor remhnak hmun ah SAC ralkap le palik nih checkhlatnak an tuah i, minung 4 an tlaih hna pinah meithal le zen-kuan an tlaih,” tiah mithmutu pakhat nih a chim.

Monywa pengkomh palik he aa naihniam mi pakhat nih, “Thawngpang an theih caah Zaw Win motor remhnak hmun cu checkhlatnak an tuah i, M4-16 zun 1, Rifle zun 1 le kuan bawm 1, 40mm kutser meithal zun 1, 12 tha a ngeimi thalpak zun 1, kutser pistol a tawimi zun 1 le a saumi zun 1, meithal kuan 139, phone 1 le a dangdang thilri kan tlaih hna,” tiah a chim. Monywa peng Alone khua chuah check gate ah a luancia August ah, Yangon in Ye U lei a kalmi khualtlawng an i citmi Express motor chung ah hriamnam le zen-kuan cu SAC ralkap nih an rak tlaih bal cang.

Karen Ramkulh Le Kani Peng Kahdohnak Ah SAC Ralkap 5 An Thi, Karen ramkulh, Myawaddy-Wawlay lampi ah SAC ralkap Tatma 44 kuttang nih, umhmun kauhter ding in an i zuam i, Wawbu(ဝါးဘိုး) hmun in 120mm hriamngan in Myawaddy-Wawlay lampi cu zingzan an kah, tiah theih a si. Myawaddy-Kawkareik lampi ah KNLA le ṭangrual phu hna nih, khualtlawng mi tangka haltu SAC ralkap pawl an cu kah hna caah SAC ralkap 2 an thi, tiah theih a si.

Sagaing ramṭhen, Kani peng ah rallam a sialmi SAC ralkap 100 hrawng cu Kani peng PDF nih an kah hna caah ralkap 2 an thi. Myinkin peng nitlak chaklei ah rallam a sialmi SAC ralkap pawl zong September 6 zing sml 10:00 hrawng ah KNDF B-2, Pah Kah Pha hna i bawm in kan kah hna, tiah KNDF B-2 nih cathanh an chuah.

September 6 zan sml 8:00 hrawng ah Mon ramkulh, Paung peng Cuaichan(ကျွဲခြံ) khua ah SAC ralkap kuttang, Pyituh Sit(ပြည်သူ့စစ်) ralkap 3 cu PDF nih an kah hna caah 1 a thi, 2 hliamhma an pu. Tiah tualchung mi hna nih an chim.

Chin Dwin Tiva Pawng Kahdohnak Ah SAC Ralkap 12 An Thah Hna: Sagaing ramṭhen, Myaung peng Chin dwin tiva thluan in a kalmi tilawng hna cu PDF ṭangrual phu 27 nih kan kah hna caah SAC ralkap 12 an thi, tiah Civillians Defense Security Organization Myaung(CDSOM) nih cathanh an chuah.

September 6 zanlei sml 3:20 in 4:40 tiang PDF ṭangrual phu 27 nih an kah hna i, SAC ralkap 12 an thih pinah 10 cu hliamhma faak ngai an pu. SAC ralkap pawl cu hriamnam, riahcaw le a dangdang thilri tam tuk an sung kho. SAC ralkap lei nih hmun hnih in rallam an sial chap caah PDF ṭangrual phu hna cu hnu an kir, tiah theih a si.

Cu kahdohnak ah cun CDSOM, People Defense Force – Taloke, MGN Ranger, MGN TIGER, MGN 21 Guerrilla Force(MTGR), Monywa People Defense Force – MPDF, Myaung Farmers Revolution Force, Shwe Ao Revolution Force, Chaung U Revolution Army – CRA le a dang PDF phu 9 hna i bawm in an kah hna, tiah theih a si.

Rakhine Ramkulh, Myaypung Peng Nah Tah Lah Zung Ah Bomb A Puak I, SAC Ralkap 15 Hrawng An Thi, Rakhine ramkulh, Myaypung(မြေပုံ) peng Kanthar Htuat Wa(ကံသာထွက်ဝ) sang ummi Nah Tah Lah(နတလ) zung cu nizan September 7 zing sml 11:00 hrawng ah Arakan Army(AA) nih bomb an puah i, SAC ralkap 15 hrawng an thi, tiah tualchung mi hna nih an chim.

Nah Tah Lah zung chung ah SAC ralkap pawl cu atu le atu an lut chuak tawn. Arakan Army(AA) nih bomb an puah lio zong ah SAC ralkap 40 hrawng cu zung chung ah an um, tiah theih a si. “Nah Tah Lah zung chung ah SAC ralkap pawl cu umhmun an khuar. Ralkap 40 hrawng cu zung chung an um lioah bomb puah thawng voi 5 hrawng a thang. Caan tlawmpal a rauh ah SAC ralkap ruak cu an thiar hna i, an kalpi hna,” tiah tualchung mi pakhat nih a chim.

Bomb a puah hnu in SAC ralkap nih hriamngan in an kah thluahmah. Maypung, Myinpia(မြေပုံ၊ မင်းပြား ) pehtlaihnak lam zong an kham dih, tiah tualchung mi hna nih an chim. “Myaypung khua cu a king ngaingai cang. Zaan ah SAC ralkap nih checkhlatnak an tuah lai maw, asiloah harnak pakhat khat an kan pe lai maw tiah ruat in kan thinphang ngai ko,” tiah Pyituh Hluttaw hlun Phe Than nih a chim.

Bomb puahnak in hliamhma a pumi SAC ralkap pawl cu Myinpia ralkap sii-inn lei ah an kalpi hna i khuachung cu humhimnak ṭha tein an laak, tiah teih a si. Cu pinah SAC ralkap pawl cu Myo U khuachung ah September 3 zanlei ah an lut i, meithal voi tam ngai an puah. A thaizing September 4 ah Myo U khuami pakhat zong an tlaih, tiah theih a si.

Kachin Ramkulh, Mogaung Khua Ah Zu Dawr Ngeitu Pyusawhti Hruaitu Cu PDF Nih An Thah, Kachin ramkulh, Mogaung(မိုးကောင်း) khua Zekung sang um, zu dawr ngeitu Pyusawhti hruaitu Maung Soe cu nihin September 8 zing sml 4:00 hrawng ah kan kah thah, tiah UG black K phu nih an langhter. Nihin zingka ah khual riahnak le zu dawr va hun ding in aa timhtuah lio ah KA 2.5 zun 6 in kan kah i, a hmun ah a thi colh, tiah UG black K phu in ṭuanvo ngeitu pakhat nih a chim.

UG black K phu cu Pyusawhti hruaitu pa a inn an va phak ah Pyusawhti Maung Soe nih cun meithal aa cuh ve nain, a laak manh hlan ah an kah thah, tiah theih a si. Pyusawhti hruaitu Maung Soe cu SAC ralkap thawngpetu a si pinah PDF an si tiah a zumhmi hna cu a tlaih hna i, a hrem lengmang hna caah hi bantuk an an kah, tiah theih a si. Maung Soe thah a ton lecangka in SAC ralkap pawl cu an kal colh lo. Khua ceu hnu lawng ah Pyusawhti hruaitu pa inn ah cun an kal. Maung Soe cu Zekung sang ah inn zaa uktu pakhat zong a si, tiah theih a si.

Binlin Peng Ah Ralbawi Hlun le Pyusawhti Hruaitu Hla Win Thein Cu PDF nih An Thah: Mon ramkulh, Bilin peng ah ralbawi(Major) hlun Vice Chairman, Pyusawhti hruaitu Hla Win Thein cu tualchung hriamtlai phu nih an thah, tiah tualchung mi hna le Bilin UG phu sinin theih a si. Nihin September 8 zing sml 8:00 hrawng ah Bilin peng Kantharyar No.7 sang ummi, ralbawi hlun Pyusawhti hruaitu, Hla Win Thein cu an kah, tiah theih a si.

Ralbawi hlun(Major) Hla Win Thein nih cun hramhram uknak duh lo lamzawhnak ah aa telmi hna cu SAC ralkap sinah a puan hna i, a tlaihter lengmang hna caah kan kah thahnak a si, tiah UG phu nih an langhter. Pyusawhti hruaitu Hla Win Thein thah a ton hnu in SAC ralkap nih Bilin khua luhnak le chuaknak an kham dih, tiah theih a si.