Kalaymyo Ah Drone Hrawk Khotu Seh A Phan, Thawngpang Dang
========
Nizaan, 4 May 2023 ah Kalaymyo ah drone jammer asilo mi Drone hrawk khotu seh a phan tiah theih a si! Cu pinah cu seh lei thiamsang Engineer zong an phan tiah Chinland Scout Network nih a thlithup thawng an theihmi cu an langhter.
Nai hrawng hi Chinram ah Drone hi Helicopter hrawh, Armour Tank hrawhnak, SAC ralkap leilawng 30 hrawhnak ah Chin ralkap hna nih Drone hi santlai ngai in an hman khawh caah atu bantukin Drone hrawk khotu seh le engineer an chiah hi a si lai zumh a si.
Cucaah Chin ralkap hna nih Drone hi tam deuh le a tha deuhmi an ngeih, an hman khawh lengmang a herh tuk! Drone cawknak ah a khua in thazaang chuah cio hna usih. Myanmar ramchung ah COVID zawtnak hrik a kai thar cu May 5 zan suimilam 8 tiang ah minung 208 sin ah hmuh an si than nak kong ngandam zung nih thanh ca an chuah.
2023 May 4 zan suimilam 8 hnu in May 5 zan suimilam 8 tiang (suimilam 24) chung ah COVID hrik kai le kai lo minung 11,091 sin ah check hlatnak an tuah i cuchung ah minung 208 sin ah zawtnak hrik hmuh chuah an si. May 4 ah COVID zawtnak hrik kai thar minung 195, May 3 ah minung 155 le May 2 ah minung 119 sin ah zawtnak hmuh chuah an si i, ni khat hnu ni khat zawtnak hrik hmuhchuah mi hna a kai lei a panh deuhdeuh tiah kan theih.
Ayerawaddy ramthen, Bogalay peng Pa-de-kaw khua hlei pakhat ah umhmun khuar in khualtlawng sin ah tangka hal lengmang tu hna SAC ralhrang kuttang palik hna cu tualchung PDF phukomh nih an kah hna caah palik Sergeant pakhat a thi i meithal zunkhat zong an lak piak hna.
May 4 zan suimilam 8 tluk ah PDF-Bogalay le Irrawaddy Black Shark UG hna i bawm in an kah hna hi a si, meithal MA3 zun 1, kuan 13 le phone zong kan lak chih tiah May 5 ah Pogalay PDF nih thanhca an chuah. Hi kahdohnak ruang ah pawngkam khua hna ah SAC ralhrang nih sualnak ngeilo mipi check le tlaih khih an tuah khawh caah ralring tein um kal dingkong PDF nih ralrin peknak thawng an thanh.
Thailand ram Chin-yan pengkomh ah phungning lo Myanmar mi kum 5 ngakchia telh in minung 30 hna cu Thailand ram palik tuanvo ngeitu hna nih an tlaih hna. Aluan cia May 3 zan suimilam 9 tluk ah motor pahnih in ramri lonh in an luh lio ah an tlaih hna hi a si. An tlaih mi hna hi kum 24 in kum 45 kar Pa minung 9, kum 18 in kum 40 kar Nu minung 10, kum 5 in kum 15 kar ngakchia minung 11 an dihlak minung 30 an si.
An tlaih mi hna hi, Thailand ram chung luhkhawh nak card a nei mi an si ko nain an luh khawhnak hmun le hma ri an lonh caah an tlaih hna hi a si. An tlaih mi hna hi Shan ramkulh chaklei um mi deuh an si hna. Aluan cia April thla chung lawng ah Thailand ram phungning lo lut Myanmar mi minung 400 leng tlaih an tong tiah Thailand ram Media pakhat nih a langh ter. Hi thla chungah voi 12 phungning lo lam in an rak lut i minung 185 cu Rakhine ramkulh in a ra mi an tam.
Myanmar ram buai ruang ah hlawhfa awk rian a har i mitam deuh cu Thailand le Malaysia ram hna ah phungning lo in a kal mi an tam. Thailand ram kalnak ah minung pakhat nih Myanmar tangka sing 16 in sing 40 tiang Puaisa sin ah an pek hna tiah kan theih.