Kalay Peng Thlanglei Ah Kahdohnak A Fak I SAC Nih Phone Line Pawl An Phih!
==========
Sagaing ramṭhen, Kalay peng thlanglei ah kahdohnak a fak i SAC nih phone line pawl an phih tiah khuami hna nih Khit Thit ah an chim. September 27 zinglei sml 8:00am thawk in Kalay peng thlanglei ah a um mi Myaukkhinyan, Kutka, Hanthawady, Ciantha lei in SAC ralkap, pyusawthi pawl nih Ciantha khua thlanglei ah a um mi Aungthayar, Aungmingalar, Hmandaw le Tintha khuate lei ah PHAW mawṭaw 8 in an luh caah kahdohnak a chuak i phone line an phih hi a si.
“Kalay peng thlanglei ah September 26 zinglei thawk in September 27 tiang kahdohnak a fak, PHAW mawṭaw 8 in an rak lut, kahdohnak dirhmun hi a fah caah kaphnih lei a thi mi theih a si rih lo. Hramhram in uknak lak a si hnu ah cuka lei hmunhma pawl kha phone line an phih.
An rak luh bak in phone line a tlau” tiah cuka hmunhma a ṭhudir mi nih Khit Thit ah an chim tiah Khit Thit nih a langhter. Atulio hi SAC ralkap nih Kalaymyo khua ah mi chek le thazang chapnak hna an tuah tiah theih a si.
Kalaymyo Peng Thlanglei Kahdohnak A Fah Caah Phone Line Ralkap Nih An Thah. Sagaing ramṭhen kalay peng thlanglei kahdohnak a fah caah SAC ralhrang nih phone line an phihkhar tiah tualchungmi nih an chim. September 27, zing suimilam 8:00 ah thok in KalayMyo thlanglei Kokar hanthawati kyanthar khua hna ah SAC ralhrang le Pyusawhti hna cu rallamsial in an luh caah kahdohnak fak a chuak phone line zong an phihkhar tiah theih asi.
September 26 ah thok in 27 tiang kalayMyo thlanglei ah kahdohnak a fak SAC ralhrang motor 8 he rallamsialin an rak lut kahdohnak hmun ah h;liamtuarmi le nunnak liammi anum le umlo kan thei fiang kho lo an langhter.
Chaung U Ah SAC Ralkap Nih Vanlawng In Kahdohnak An Tuah Ruangah Minung 9 Nunnak A Liam! Sagaing ramṭhen, Chaung U peng Minte, Minkhaung le Makyihkua khua hna cu SAC ralkap nih September 26 chunhnu ah raltuknak vanlawng in a kah i, PDF ralkap 3 le tualchung mi 6 nunnak a liam, hliamhma fak a pu mi zong an um, tiah tualchung mi nih an chim.
Tutan SAC ralkap nih vanlawng in kahdohnak a tuahnak khua hi Chaung U le Pakokku motor lampi kam um khua an si. SAC ralkap hna cu helicopter 4 in an zuang i, cu chung ah pakhat nih kahdohnak a tuah, a dang 3 nih SAC ralkap 70 renglo a ṭhumh hna, tiah tualchung mi nih an chim.
“SAC ralkap nih vanlawng in kahdohnak an tuah ruang ah, nihin September 27 zinglei tiang ah char rih lo mi ruak hi 15 in 20 tluk tiang hrawng an um rih, cu chung ah tualchung mi 6 hi kan fehter khawhmi a si,” tiah tualchungmi pakhat nih a chim. Helicopter 3 nih a ṭhumh mi ralkap hna nih nizaan September 26 zaan ah innkip an luhhnawh i thilri an thlokpiak hna, nihin September 27 tiang ah khuachung in an chuak rih lo, tiah a chimchap.
SAC Nih Uknak An Laak Hnu Ah NLD Party Chungtel 2000 Hrawng An Tlaih Hna. SAC ralkap nih uknak an laak kum hnih le cheu chung ah hlutdaw palai hna telh in NLD party chungtel 1910 tlaih an tong, tiang HRDT NLD nih cathanh an chuah. Cu chung ah minung 1269 cu hren an si rih tiah nihin, September 27 ah tuahmi NLD party dirhcam kum 35 tlin caan hmannak ah HRDT NLD nih an langhter.
Hren lio mi NLD party chungtel 1269 chung ah hlutdaw palai 73 an i tel. Tlaihkhih a tongmi party chungtel hna hi pa 1077 le nu 192 ah an si.
“SAC nih mizapi ruahchannak vialte an hrawh bantuk in NLD party zong hrawk ding in timh ciammam tein an kan doh” tiin NLD party central committee chungtel Dr. Khin Saung nih a chim. Ram pumpi ah NLD party zung hna cu voi 160 tiang an kah i an hrawh. Hlutdaw palai 182 telh in party chungtel 372 hna umnak inn le dumhau hmun 390, an ngeihmi rian 64 le motor 16 cu an chuhpiak hna. Cu pinah hlutdaw palai pathum telh in party chungtel 100 thah an tong, tiah HRDT NLD nih an thanh.
Thantlang Kahdohnak Ah Kaphnih Lei A Thi Mi An Um, SAC Ralkap 13 Sizung An Phan. Chin ramkulh, Thantlang khua kahdohnak ah CNF/CNA hruai mi Chin hriamtlai phufonh lei in 1 a nunnak a liam, 1 aa hliam i SAC ralkap a thi mi zat dirhmun a fiang in theih a si lo nain ralkap 13 cu hliamhma he Hakha sizung an phan tiah CNF chimphuannak nawl a ngeitu Salai Htet Ni nih Khonumthung Burmese ah a chim.
“Thantlang kahdohnak ah kanmah lei 1 a nunnak a liam. Hriamtlai 1 aa hliam. SAC lei 13 an i hliam ve i Hakha sizung an phan. Anmah lei a thi mi zat theih a si rih lo” tiah Salai Htet Ni nih a chim. September 25 ah a cang mi Thantlang khua kahdohnak ah CNF,CNA lei in Corporal Salai Ling Hung a nunnak a liam.
SAC ralkap nih Thantlang khua uk kho ṭhan ding in CNF/CNA le CDF pawl an tlaihnak hmunhma pawl cu September 20 ah a doh hna i kaphnih karlak kahdohnak hi zarhkhat leng a chuak aa peh rih tiah theih a si. Thantlang kahdohnak ah SAC nih Hakha khua in hriamngan kah a bawmh hna i kahdohnak hmunhma ah ralkap thazang a chap tiah theih a si.
Thantlang khua chung ah a um mi SAC battalion telh in a pawngkam sakhaan 5 leng ah khuachung hmunhma dang ralkap sakhaan hme 2 le Hakha-Thantlang karlak Auto Tower tlang hna cu a luancia August 27 le 28 ah CNF/CNA hruainak in Chin hriamtlai phu 4 fonh nih an kah hna. Kahdohnak chung ah SAC ralkap 30 leng an thi i 50 leng an rak i hliam. Chin hriamtlai phufonh lei in 15 an nunnak a liam ve i meithal le kuanzen pawl an lak khawh tiah CDF-Thantlang nih a rak thanh.