Kahdohnak Thawngpang Fonh!
==================
Taninthary ramṭhen, Dawei peng, Dawei ah SAC ralkap 5 nih an rak i cit mi mawṭaw cu an kah caah lamkam ah aa let i Warrant Officer telh in ralkap 3 an thi tiah Dawei Guerrilla Revolutionary Force – DGRF nih thawng a thanh. July 12 chun sml 2:45pm hrawng ah Taninthary ramṭhen, Dawei peng, Zaha khuate pawng ah SAC ralkap 5 nih an rak i cit mi ralkap mawṭaw cu DGRF – C02 nih an bawh i an kah hna caah mawṭaw a mawngtu an khen i an mawṭaw cu lamkam ah aa let tiah theih a si.
DGRF – C2 nih an tei deuh ko hna nain ralkap lei bawmhnak a rat caah an kir ṭhan tiah theih a si.
Kahdohnak chung ah Corporal Kyaw Kyaw U, Warrant Officer 1 telh in 3 a hmun ah an thi i 2 sizung an phan tiah theih a si. Kahdohnak a dih ah SAC ralkap pawl an rak phan i Htan-Yi dawr an khangh leng ah minung 2 zong an thah hna tiah theih a si.
Sagaing ramṭhen, Myinmu peng, Khuatkwin khualu ah kahdohnak a chuak i kahdohnak chung ah SAC ralkap 30 hrawmg mithmuh ah an thi tiah Kyaukse pengkomh B01 nih cathanh an chuah. July 13 zinglei sml 4:00am hrawng ah Myinmu peng chung mipi inn a khang mi SAC ralkap pawl cu Ngakin khua ni chuahlei an kal lio ah PDF phufonh nih an kah hna i SAC ralkap 30 hrawng a hmun ah a thi,
tampi an i hliam caah Helicopter in thazang a rak chap ṭhan hna tiah theih a si. Kyaukse pengkomh B10, Zero Guerrilla Force, Shwebo pengkomh B 19, B15 hna bawm in kahdohnak an tuah i mipi hriamtlai lei him tein an kir kho tiah theih a si.
Kachin ram, Laiza khua, KIA Headquarters pawng ah riahcaw a phor mi SAC ralkap pawl cu KIA nih an kah hna caah SAC lei a thi mi an tam tiah KIA lei thawngzamh nih an langhter. July 12 zinglei sml 10:30am hrawng ah SAC ralkap Infantry 318, 385 in thazang 200 leng SAC ralkap pawl cu KIA Headquarters umnak Laiza khua pawng,
Nansanyaung khuate lei ah riahcaw le hriam bawmhnak pek ding in an kal lio ah Kyapu khuate le Kanzu khuate karlak ah KIA phu nih an kah hna caah kaphnih karlak kahdohnak a chuah hi a si. Kahdohnak chung ah SAC ralkap lei a thi mi an tam i a thi mi ralkap pawl cu htaw-la-gyi, le Four Wheel in Waimaw lei ah an kalpi hna tiah theih a si.
Chin ramkulh, Tonzang khua B.E.H.S a hngak mi SAC ralkap pawl an kah hna i 1 a thi, 60MM zuun 1 le meithal zuun 1 an lak khawh tiah CDF-Tonzang nih thawng an thanh. July 13 zinglei sml 10:00am hrawng ah Tonzang khua, B.E.H.S a hngak mi SAC ralkap pawl CDF-Tonzang nih an va kah hna caah ralkap 1 a thi, 1 aa hliam. 60MM telh in Auto meithal 1 an lak khawh tiah theih a si.
Cu Tonzang sianginn ah SAC ralkap Squad 1 nih sianginn an hngah i CDF-Tonzang nih sianginn awn lo ding tiah ralrinnak an thanh ko nain SAC nih rian an khinh mi Tonzang peng fimcawnnak bawi nih CDF-Tonzang ka doh hna lai tiah aa chalh caah an doh hna hi a si i siahngakchia pawl an him tiah an langhter. Kahdohnak chung ah CDF-Tonzang hriamtlai pawl him tein an kir kho tiah theih a si.