Kachin ramkulh chungah ralhrang phu pawl cu phomh than an tong!

KIA Hriamtlai Phu Le Ralhrang Pawl An I Phomh Than Caah!
=========
Putao Peng Chungah SAC Ralhrang Le KIA An I Kap! SAC ralhrang ralkap le KIA le PDF fonhmi phu karlak ah Putao peng chung Suam Pi Yam khua pawng Sin Kat Taung ah Febuary 18 zanlei sang sml 3:00 hrawngah an i kap tiah theih a si.
Sml cheu tluk meithal puah thawng kan theih hnuah hriamngan puah thawng zong kan thei tiah Suam Pi Yam khuami mipa pakhat nih The 74 Media ah a chim.

Bomb puah thawng theih a si nain tutan cu kahdohnak a faktuk lo tiah amah nih a chim. Atu ahcun meithal puah thawng zong a dai ngaingai cang tiah amah nih a chim. Suam Pi Yam khua ah a ummi SAC ralhrang ralkap sakhan cu Febuary 1 ah KIA le PDF fonhmi phu nih an laak hnuin SAC ralhrang ralkap nih helikopter hmangin bomb a thlak tiah theih a si.

SAC ralhrang ralkap i bomb thlaknak ruangah Febuary 3 ah khan Suam Pi Yam khuami minung 5 hliam an tuar pinah minung umnak inn 8 an rawk dih tiah theih a si.

Kayin Ramkulh Ah SAC Ralhrang Nih A Thazaang Tam Taktakin Kahdohnak Tuah! Karenni ramkulh ah SAC ralhrang ralkap nih a thazaang tam khawh chungin kahdohnak tuah dingin an lut tiah KNDF/B-02 nih Febuary 18 zaan ah cathanh an chuah.

SAC ralhrang ralkap hna cu He Hu khuapi in ralhrang ralkap motor 40 leng, Taung Gyi khuapi in ralhrang ralkap motor 30 leng, Ka Law khuapi in ralkap motor 60 leng, Pue Bue khuapi lei in tank rual he Kayin ramkulh leiah kahdohnak tuah dingin an lut.

Kahdohnak tuah dingah a kalmi SAC ralhrang ralkap hna cu lampi in kan rak kahdoh hna nain mipi vengtu lei thazaang a der tuk. Ramkulh hme te simi Karenni cu SAC ralhrang ralkap nih a thazaang tam taktakin kahdohnak tuah aa timh cang caah mipi nih meithal le kuanfang cawk nakah phaisa kan bawm u tiah nawlnak an tuah.

Karenni ramkulh cu a hme tuk, an kan kulh dih ko lai, Internet line zong a tha tuk ti lo caah tu zarh chung hrimhrim ah a si khawh chungin bawmnak kan pe hram u. Karenni phu a simi paoh sinah bawmnak pe cio u. Raltuknak thilri he pehtlai in a man an fak tuk tikah sing (1) nan kan bawmh hmanhah AK kuanfang (20) lawng a cawk kho. Cucaah mipi nih a si khawh chungin bawmnak kan pe hram u tiah KNDF/B-02 nih nawlnak an tuah.

SAC ralhrang ralkap nih Kayin ramkulh cu vanlawng zongin kahdohnak a tuah pinah hriamngan zongin a hleihluat hmangin kahdohnak an tuah.

Pale Ah SAC Ralhrang Ralkap Rual Cu PDF Fonhmi Phu Nih An Kah Caah Ralhrang (15) Tluk An Thi! Pale khuapi in a chuakmi SAC ralhrang ralkap cu Pukpar khua le Tamarpin khua karlak ah Febuary 17 chun sml 1:00 hrawngah Saya San-PDF fonhmi phu nih an kah hna caah SAC ralhrang ralkap (15) tluk an thi tiah theih a si.

Ralhrang ralkap (60) hrawng umnak hmun cu kan va kahdoh hna tiah Saya San-PDF phu ah tuanvo ngeitu pakhat nih The 74 Media ah a chim. Panga lawng an um tiah kan kal hnawh hna nain ruahlo piin (60) lengkai kan hmuh hna tikah hnulei kir loin kutin chehmi bomb in kan puah hnawh hna tikah SAC ralhrang ralkap rual cu a khenh hna tiah amah nih a chim.

Cu SAC ralhrang ralkap rual cu PDF fonhmi phu nih nihnih chung ngiathlainak an tuah hnuah an va kahdoh tiah theih a si. Kahdohnak caan chungah SAC ralhrang nih Puk Par khua in kum 20 tluk simi Mg Hein Zaw Lat cu a lu ah meithal in an kah that tiah amah nih a chim.

Motorcycle a laak nakah SAC ralhrang ralkap he an i tong sual i, a lu ah an kah that, a thluak zong a chuak dih tiah amah nih a chim. SAC ralhrang ralkap le Saya San-PDF fonhmi phu karlak ah Sml 3:00 chung fak taktakin an i kap hna hnuah Saya San-PDF fonhmi phu leikap ah hliam tuarmi umloin an i zukphiak kho tiah theih a si.

Sagaing ramthen Pale peng chung Yi Phyu Kung khua ah a ummi SAC ralhrang ralkap le Buesawtyi phu raltuk cawnnak sakhan zong Febuary 14 ah khan mipi vengtu PDF nih luhhnawh in an kah hna caah kahdohnak a fak ngai tiah theih a si. Credit: The Federal Times