Ka Thinphan Ka Celh Ti Lo

Ka Thinphan Ka Celh Ti Lo
=================
A nak le a raang, a sen le a dum, a aihre le a hring a lang thluahmah cang. Mi zei dah,” Tuuphaw eih Cenghnia”, a si ti zong a fiang thluahmah cang lai. Nihnin kan caan cu,” tuu le meheh”, tthen caan kan phan. Pu le tu, pa le fa, ni le ttang, tta le far, u le nau zong kutdong in i sawh caan a si. I huat ruang ah a si lai lo. Thil dik a si ( thil ttha chuak seh) ti ruah mi ngeih ruang tu ah a si lai. “Meheh lu i thlai in, uico sa zuar hmang”, pawl zong an lang thluahmah cang lai. A kik mi nih a kih khawh chung kik(freeze) tiang in an kik lai i, a lin mi zong alh hluahmah tiang in an lin ve lai.

2010 hlan tiang cu Tupi hmawng tang pawpi le lobua thu(hling le so) lak ah cenghngia rual he kan rak tlong. 2011 hnu in,” tuu lawng tlonnak nelrawn”, ah kan i tthial. Cu hmun ah,” tuuphaw eih cenghnia”, zong a tli in an ra ve. Tuu le cenghngia lawng hmanh tthen si lo in,” a phun a hler le hler lo tiang(အစစ်နဲ့အတု),” tiang in tthen caan a si. Cenghngia nih tuuphaw eih cenghnia lila zong kha, an ral khun hna i, tuu zong nih an ral chin chin ve hna( na kik ah kik law law, na lum ah lum law law ti a si).

Samaria mittha pa bantuk in ruah mi U Kyaw Thu(mizaw fak le mithi zualhawmtu) le Farasi tlawngbawi bantuk, Thura Aung Ko(ralkap chan thok in USDP, NLD tiang minister of religious affair/သာသနာရေးဝန်ကြီး an kan ttuan piaktu) zong an hmual phoh an si cang. Caan khat chuak tthutden sang cung tthu i, caan tawi te chung ah a thau menh ngai mi pawl mi cheu khat (ministers/ဝန်ကြီးများ, parliaments/လွှတ်တော်ကိုယ်စားလှယ်များ,Sipin/စည်ပင်ဥက္ကဋ္ဌများ, tenders/ contractors pawl le pehtlaihnak a ngei mi) pawl zong a rauh hlan ah an ttial a lang ve colh lai.

Ka siter chun ahhin ka thinphan hi a celh in ka celh ti lo. Ka lungre a thei tuk cang. Nem dulh in ka tthut tawnnak ka sofa tthutden zong an i bingbo cang i ka tthut tik ah ka taw a rem kho ti lo. Ka suitthi hrual nih ka hnawng reh an ka timh i, ka hna tawnh nih ka hna an ka sih. Ka bankhih(khimh) nih ka ban an ka reh tuk cang. Mitkuh thaw tein ka hngilh tawnnak maktaduai in sermi ka ihkhun zong an i thui(a hnin)tuk cang i ka mitkuh sia a rem ti lo. A zei a si hmanh ah kan tuh bantuk in zun tthan caan a phanh ahcun zun ttan cu pei a haoh fom cu.

CDM kong ah ralkap le palek nakin micheukhat pawl ttih kan nung deuh. Hi hi kan i remh a hau. Mah lungtho tein a tuah mi kha cawnglawm ko hna u sih law, a tuah kho ve rih lo mi zong thangchiat, soisel, hmual phoh tibantuk ngol cang hna u sih. Minung paoh nih kan nunnak le kan paw ca( paw cawmnak rian) hi a biapi bik ah chiah cio a si. CDM a tuah mi nih,”ruahchan mi a ruang tampi ngeih in an tuah bantuk in, a tuah kho lo mi zong donkhantu a ruang tampi ruang ah an tuah kho ve lo”, ti hi kan i fian a herh. Za ah za CDM nih teinak a hmuh ding hi fiang sehlaw mizei paoh an i tel dih ko lai. Minung ruah ning,hmuh ning le intuar ning a dang cio ti philh hna hlah u sih.

Naa pi(buffalo) hmai tingtang tum ti mi bia bang, a si kho lo ding zong au tuk ti hlah u sih. A si kho mi tu ah thazaang tam deuh chuah khawh i zuam tu hi kan teinak a si lai. R2P tiah kan au len mi zong hi New York in rak thlah mi, “Responsibility to Protect“, humhim ding ah ttuanvo/ ကာကွယ်ပေးရန်တာဝန် pawl rat lo in. Naypyidaw in thlah mi, “Reaction to Punishment“, dantat ding ca lehrulhnak/ ပြစ်ဒဏ်တုံ့ပြန်မှု tu hna an ra sual lai maw ti hna phan a um. A zei a si hmanh kan himnak cio ding ah fimkhor tein tthut diar thiam i zuam hi a ttha bik.

Cu a si caah, pumpaak hlawknak, party pakhat thawnnak ca men lawng si hin lo in, Rampi(နိုင်ငံ) ca tu ah ruat deuh hna u sih law, thil ttha a chuah zau nak ding caah thazang chuah hna u sih. A ttha hnem lo ding tuahsernak cu pakpalawng men an si dih ko lai. Thlacamtu zong nih rampi hrang tu i hmaithlak in thlacam hna u sih. Hmual a ngei ding thlacamnak a si ttung lo ahcun a caan na pek mi lawng kha a miak na hmuh ko lai. “Mi kut in rul tlaih le cakei kua purh”, i tim hna hlah u sih. Ka i thimmi lam a dik lawng lawng ah tinhmi hmun ah kan phan kho lai. A rauh hlan ah kan ram dai cang hram ko seh!

အာဏာရှင်စနစ်ကျဆုံးရေး(အဆုံးသတ်ရေး) The fall of dictatorship (end). ၂၀၀၈ ဖွဲ့စည်းပုံအခြေခံဥပဒေပြင်ဆင်ရေး( ဖျက်သိမ်း) Amendment 2008 constitution ( abolish/ repealed) ဖက်ဒရယ်ဒီမိုကရေစီပြည်ထောင်စုတည်ဆောက်ရေး( build federal democratic union). Credit: Ronald Thang