Ka palh si le ka ngaithiam u

Ka palh si le ka ngaithiam u
*****************************
Tutan lam zawh i duh lonak langhternak ah Pathian rianṭuantu kan pale tampi an i tel ve timi kan theih pah lengmang i keimah pumpak in upatnak kan pek hna. Hi kong a chimtu bik hi keimah ka si men lai caah Pastor te thangchiatnak si hngin loin, si kho seh ti i bochan tuk bia a si ko timi nan ka theihpiaknak lai zaangfah kan nawl ko hna. Si kho seh tiin ka ruahmi pakhat ka chim rih ko lai. Ka palh si le ka ngaithiam ko u. A mah te hna nih ka ti ruam hlah u ti zong kan nawl ko hna.

Rangoon ah a ummi Khrihfabu kip Pastor vialte le Khrihfabu leng i a ummi Pathian rianṭuantu Evangelist vialte, Baibal sianginn i Baibal cachimhtu saya te viate le siangngakchia vialte, ngakṭah a zohkenhtu Pastor vialte khi a tlawm bik minung 1000 cu an si ko lai dah. Khi vialte minung khi hmunkhat ah voikhat tal hi catar a phunphun i put ve hna sehlaw, Tuluk tanzung(embassy), US tanzung le UN zungah bia va chim ve hna sehlaw, minung thinlung ah zeitimaw in hmual a ngei ngai ve ko hnga tiin ka ruah. Cun, palek nih mipi lam an kham lio hna khi Pastor te nih hmaisuang in bia va ruah kho ve hna sehlaw, hmual a ngei chinchin hnga ti zong ka ruat ngai tawn.

Hiti ka ti tikah Pastor te a cawnpiakmi le ruahnak a pemi hna ka lo ngaite. Pastor te ka cawnpiak hna a si hrimhrim lo. Ruahnak ka pek bia hna zong a si hrimhrim lo. Keimah ka hmuhning te kha a si ko i, bochan tuk bia le limhang ngeihter bia deuh a si ko tiin ka ruahpiak sawh ko u.

A fim bal lai lo dah; Min Aung Hlaing khi a fim bal lai lo dah. A va fim ko zongah kanmah nanmah bantuk pawl nakin a fim deuh hlei bal lai lo tiah ka ruah ko. A biachim le a mit-au hrimhrim zoh tikah kanmah pawl nakin a fim deuhnak ding a lang hrimhrim lo. A fimnak khi Khrihfabu pakhat i Khrihfa upa a ṭuan kho ding tiang lawng a si ko lai dah. Cu hmanh cu member 1000 hrawng a simi Khrihfabu ah Khrihfa upa ṭuan sehlaw, Chairman aa cuhnak ah le midang a thangchiatnak hna ah Khrihfabu a buaiter peng ko lai dah. Kawlram pi khi Khrihfabu pakhat ah maw a rel hnga zeidek! Perhkalh