KA NU NIH A KA LIAM TAK NI; Ngaih A Chia Tuk Hringhran Ko E!!

Ka Nu Nih A Ka Liam Tak Ni!
=================
Na nu a nunnak a liam cang, na nu a thi cang timi au-aw hi nu le nih a liam tak cang mi hna lawng nih kan theih mi bia a si bantuk in kan theih duh lo bik mi biafang zong a si. Cu caan thawkin cun kan tuar ning a fah zia, tah duh zong ah mitthli zong a luang kho lo e. Nu le nih liamtak tuar a har ning.

Mi hmai ah thang piin tah ka duh zongah ka aw a chuak kho ti lo e. Cucu ka nun caan, caan khat ah harsaknak ka ton mi vialte laak ah ka philh khawh lomi le a har khun ka timi ni le caan cu a si e. Cu ni thawk in cun chikhat te ka vawlei mei a kang dih mi a lo i, chunmui a tlung mi ko khi a hluan e. Ka zaanmang a chia.

Ka pum chungah kan lungfah tuarnak thlanti he a khat dih. Ka taksa a lum, i ka taksa a lin. Ka khuaruah a har vansang hram in ka um. Ka luu le ka thluak chungah mi au-thawng bantukin ka hnathlam in ka hun theih, Cucu zei bia dah a si “Ka nu” timi biafang au-thawng a si e.

Cu ni ah cun ka pawngkam minung zong zoh loin ka nu ruak cu pom (kuh) in ka tah cuahmah lio ah, ka thinlung le ka ruahnak nih theihhngal mi biafang a ngei. Cucu zeidah a si, ” Thaizing thawkin ka nun caan hi zeitindah ka hman cang lai, nun man ka ngei ti maw?, kei cu ka nu tiah auh awk ka ngei ti lai lo.” timi bia hi a si e.

Tlawmpal ah ka minung pum kan taksa cu a hung thang deuh i, rian ka tuan kho phaisa ka hmu, A sinain rawl khengkhat hmanh ka Nu tiin rawl dangh kan duh ko nain, dangh ding Nu ka ngei ti lo e. Ka pawngkam ah an ka um pitu Nu kan ngei ti lo e. Ka ca kheng cungah mithli he ka khat e.

Ka khupthi rual hoi hna nih “Ka Nu” tiin auh awh an ngeih hna lio ah, Ka khupthi rual hoi hna nih “Ka Nu” tiin an nu le an auh mi hna ka theih caan poah ah, kei ka nu hi tah khuaikaa dah a um tiin ka nu kong ruatin khuazaa ka cul ton e. Cu ni ah cun mi zeihmanh nih theih piak loin ka mithli cu a ha (luang) dih ko e.

Kan dawt mi hna nih an kam liam tak zongah caan a hun rauh deuh cun philh an si ko, timi ah hin “Ka nu” cu a tel lai lo dah, Philh khawh hrim a si lo e. Zeiruangah ti a si ah cun a thinsen he hrinmi dawtmi fa ka si pinah ka hngakchia lio in ka thanlian tiang an ka dawtu, hnuk an ka dinhtu, a mah nih ei siang lomi hmanh rawl a ka danghtu ka nu cu zeitindah ka philh khawh h lai.

A sinain a taktak ah ka nu cu um ti hlah hmanhsehlaw, Ka pawngkam ah kam um pi ti hlah hmanhselaw, ka thinlung chungin cun ka nu a nung rih ko e., Nu kn ngei rih ko e. Ka thinlung chungin ka nu kuh kan duh rih ko hna e. Kan hnathlam ah cun ka nu a nung rih ko e. Cucu nu nih liam tak cang mi kan caah tuar a fah zia a si. kan tuarnak a fah zia hi hmur le kaa, biafang in phuan len zongah a tlinh kho hrimhrim lo e.

Hi bantuk tuarnak hna hi, Nu a ngei rih mi hna nih cun an theithiam lai lo i, an i fiang lai lo. Cu caah na nu a nun lio te ah daw ko. Na Nu nih na pawngkam ah an um pi lio te ah hin daw ko. Minung cu kan nun caan a khiak kho lomi kan si. Kan nun caan, caan khat ah nu ngei rih mi hna nih kan nu le te hi daw ko hna usih. A caan a tlai hnu ah naa chiar te lai, a sinain san a tlai ti lai lo.

Relchap, SAC Nih Facebook Le Youtube Hrawh I Media Dang Ser An I Timhmi An Hlawhtling Lo, SAC nih Facebook le Youtube cu hrawh i an aiawhtu ding Media dang ser an i timhmi cu an hlawhtling lo tiah theih a si. SAC nih cun Facebook aiawhtu ah SAC he naihniam in a ummi Myanmar thiamsang hna nih an sermi Soical Network Okay Par hman ding le Youtube aiawh ah Mtube hman dingin an i zuam tiah theih a si.

SAC nih nawlngeihnak an lak hnuin thawngthanhnak ah an hmanmi MRTV le MWD cu Youtube, Facebook le Social Media dang nih an phih piak hna caah SAC nih an tlaih (controlled) khawhmi media platform hman dingin an i zuam hi a si.

SAC nih Facebook aiawh ah hman an timhmi cu Okay Par a si tiah anmah he aa naihniammi hna nih an chim. SAC Cozah i Ministry of Information ah upa pakhat a simi U Myo Myint Maung nih thawngpang kan thanhmi le ṭialmi pawl cu Social Media in hlonh piak kan ton lengmang caah atu bantukin Meida Platform thar ser kan timhnak a si tiah a chim.

SAC nih Youtube aiawh in hman an timhmi cu Mtube a si i hi Mtube Live Streaming Platform serchuahnak ah ṭuanvo a latu cu United Info-Sec company a si tiah theih a si.

Asinain Myanmar ah IT lei thiamsang le company ṭha an um lo caah SAC nih Facebook le Youtube hrawh i Social Media dang ser an i timhmi cu an hlawhtling lai lo tiah zumh a si. An ser khawh hmanh ah Facebook le Youtube bantukin mitampi nih hman dingah an tuah kho lai lo tiah Rangoon i IT lei thiamsang mino pakhat nih a chim.

Yinmarbin Le Kani Peng Ni 12 Chung Kahdohnak Ah SAC Ralkap 40 An Thi, PDF 5 Nunnak A Liam, Sagaing ramṭhen, Yinmarbin le Kani peng, August 19 in August 30 tiang kahdohnak ah SAC ralkap 40 nak tlawmlo an thi, tiah Triple Tow Task phu in ṭuanvo ngeitu Ko Nay Kyi nih a chim.

Ni 12 chung kahdohnak cu Yinpaungtaing(ရင်ပေါင်တိုင်) khua kahdohnak in aa thawk i, SAC ralkap nih helicopter in minung thazaang 200 hrawng an chap leng ah SAC ralkap hna cu civil mi lemcang in kahdohnak ah an i tel caah tualchung hriamtlai PDF chungtel 5 an nunnak a liam, tiah theih a si.

Yinpaungtaing (ရင်ပေါင်တိုင်), Tikune(သီးကုန်), Winkune(ဝင်းကုန်း), Yingandaw(သင်္ဃန်းတော) khua le Yakyi-Kalaywah lampi pawng kahdohnak hna cu an fak ngai i, Winkune (ဝင်းကုန်း) khua pawng a cangmi kahdohnak ah SAC ralkap 30 nak tlawm lo an thi, tiah theih a si.

“Kaphnih kar kahdohnak cu August 19 in thawk a si i, ni 12 chung an rau. Cu kahdohnak ah cun SAC ralkap 40 hrawng an thi i, PDF lei in ralkap 5 an nunnak a liam. Ni 12 chung kahdohnak ah SAC ralkap a thi mi an tam biknak cu Winkune (ဝင်းကုန်း) khua kahdohnak ah a si i, minung 30 hrawng an thi,” tiah Triple Tow Task Force in ṭuanvo ngeitu Ko Nay Kyi nih a chim.

Yinmarbin peng, Winkune (ဝင်းကုန်း) khua kahdohnak ah cun KIA nih an bawmh hna i, ni 12 chung a cangmi kahdohnak ah SAC ralkap nih raltuknak vanlawng zong an hman, tiah theih a si. SAC ralkap hna cu Triple Tow Task Force, Monywa special force, Chindwin Ganungyaza(ချင်းတွင်းဂဠုန်ရာဇာ), Yoemah Fighter, Yinmarbin Local PDF, Dragon Brothers Task Force, Yinmarbin pengkomh battalion 1, Monywa Truth of Force phufonh nih an kah hna, tiah theih a si.

Gangaw Peng Hartongmi Bawmhnak Pekmi Facang Pung 150 Leng Cu SAC Ralkap Nih An Hlonhpiak Hna, Magway ramṭhen, Gangaw peng Shwetaung (ရွှေတောင်) khua a khaangtu SAC ralkap hna nih, an rak khangh cangmi Mauk(မောက်) khua mipi sin ah bawmhnak pekding mi facang pung 150 leng cu an hlonh/vorhpiak dih hna, tiah Yaw ralzaam bawmtu committee nih an thanh.

SAC ralkap hna cu September 6 ah Shwetaung(ရွှေတောင်) khua chung ah an lut i, tualchung mi hna thilri le an inn cu an khanghpiak dih hna leng ah, facang pung 150 leng zong an hlonhpiak dih hna, tiah an chim.
Magway ramṭhen, Yaw hmunram um ralzaam hna ṭhutdirnak, eidin, ngandamnak le fimcawnnak ca ah a herhmi kip cu Yaw ramchung ralzaam hna bawmtu committee YRCIDP nih bawmhnak an pek tawn hna, atu zong ah tampi bawmh an herh rih, tiah ralzaam tawlreltu nih an langhter.

Sagaing Ramṭhen, Myinmu Peng Ah SAC Ralkap Motor 11 Cu PDF Nih Bomb An Puah Hna I Ralkap 12 An Thi!: Sagaing ramṭhen, Nyinmu peng ah nihin September 9, chun suimilam 12:16 ah SAC ralkap motor 11 cu PDF nih voi 2 bomb an puahhnawh hna caah SAC ralkap 12 an thi, tiah theih a si.

“Monywa in a chuakmi SAC ralkap hna cu a voikhatnak ah Htisaung(ထီးဆောင်း) le Ganpia(ကံပြား) kar ah pa-de-ta bomb lung 9 kan puahhnawh hna. Cun, Nabekyu(နဘဲကြူး) le Pyawt(ပျော့) khua kar ah a voihnihnak pa-de-ta bomb lung 5 puahhnawh kan puah ṭhan hna. Voihnih tiang bomb kan puahnak ah SAC ralkap 12 an thi i, a thimi SAC ralkap ruak cu Myinmu lei ah an kalpi hna,” tiah Zero pah-kah-phah in ṭuanvo ngeitu Ko That Kyi nih a chim.

Bʀɪᴛᴀɪɴ Sɪᴀɴɢᴘᴀʜʀᴀɴɢ Nᴜ Qᴜᴇᴇɴ Eʟɪᴢᴀʙᴇᴛʜ Cᴜ Bᴀʟᴍᴏʀᴀʟ Sɪᴀɴɢᴘᴀʜʀᴀɴɢ Iɴɴ, Sᴄᴏᴛʟᴀɴᴅ Aʜ Nɪᴢᴀɴ Zᴀɴᴛ̣ɪᴍ Aʜ Kʜᴀɴ A Nᴜɴɴᴀᴋ A Lɪᴀᴍ! Vawleicung ram kau bik a rak uktu Britain siangpahrang nu Queen Elizabeth II, kum 96 cu nizan September 8, Myanmar lei caan in zanṭim 12 le cheu hrawng ah khan a nunnak a liam.

Queen Elizabeth hi tukum February thla dongh lei ah khan covid zawtnak in a rak zaw i, cu hnu in ngandamlonak nih a tlak. British nih an rak ukpenmi ram hna lentecelhnak ‘Commonwealth Games’ zong ah caan hmang ding a si nain a rak i ṭhulh. A ngandamlonak cu zual lei a panh caah Bamoral Castle(Siangpahrang Inn), Scotland ah i zohkhenh ding in a kal i, Balmoral Castle ah hin Queen Elizabeth cu a nunnak a liam beh.

Vawleicung bawi vialte lak ah a lianngan cemmi pakhat ah ruah mi Queen Elizabeth hi Britain ram tuanbia ah Siangpahrang chan sau bik a si i, kum 70 chung siangpahrang rian a ṭuan. Kum 1926 ah khan London khuapi ah a chuak i, kum 1947 ah Prince Philip(Duke of Edinburg), Greece le Denmark siangpahrang fapa he an rak i um. Kum 1953, kum 25 a si lio ah hringtu a pa King George V nih a thihtak caah Siangpahrang rian a chawn. Nikum 2021 April ah khan a pasal Prince Philip nih mual a rak liamtak cang. Queen Elizabeth a thih hin a fapa Prince Charles cu Siangpahrang a si colh.

Queen Elizabeth a thih kong Buckingham Palace nih an thanh sin in vawleicung khuazakip a cul dih colh i, vawleicung ram hruaitu le minthang tampi nih Siangpahrang nu an uinak kong an taar cio. British phungning ah siangpahrang an thih ahcun ram pumpi in ruak humhnak ngeih ding a si caah cozah cawlcanghnak zong ni 10 an i din lai i, UK phaisa Pound Sterling zong an remh lai.

CDF-Mindat Le SAC Ralkap Kar Kahdohnak A Chuak Ṭhan! Chin ramkulh, Mindat peng ah, Nihin September 9 zinglei ah khan CDF-Mindat le SAC ralkap kar kahdohnak a chuak ṭhan, tiah Yoma Bataillon CDF-Mindat nih an langhter. Mindat peng, Hlawwa(လျှော်၀) khua a phanmi SAC ralkap hna cu CDF-Mindat nih tuzing sml 11 luan hrawng ah kan kahdoh hna i, kaphnih kar kahdohnak a chuak, tiah CDF-Mindat in tuanvo ngeitu pakhat nih a chim. CDF-Mindat le SAC ralkap kar kahdohnak cu tukum June thla khan ngol a si nain, thlahnih luan hrawng ah kahdohnak a chuah ṭhan.

Kalaymyo Ah Khuachung Ah SAC Ralkap Nih Minung 10 An Tlaih Hna: Nizaan September 8 zinglei sml 10 hrawng ah Kalaymyo Chanmyaaungsi(ချမ်းမြဲ့အောင်စည်) sang, phungki sianginn le tar zohkhenhnak inn lam lei zul in SAC ralkap cu motor pahnih he an kal.

Cu lio ah PDF(Kalay) nih bomb kan puahhnawh hna i, ralbawi pakhat telh in SAC ralkap a thimi an um nain a zat cu fiang tein kan thei kho rih lo, tiah PDF Kalay nih an thanh. SAC ralkap hna nih cun Chanmyaaungsi lam cheukhat cu an phih i, khuachung ah lut in innchung thilri an thlok pin ah minung 10 hrawng an tlaih hna, tiah People Defense Force (Kalay) nih nizaan September 8 ah cathanh an chuah.

Tamu Ah Mi Thilri Chuttu Phu Hruaitu Le Mifir Pahnih PDF Nih An Tlaih Ṭhan Hna, Sagaing ramṭhen, Tamu ah PDF nih mifir pa an rak tlaih i, a dang a hawile min zong a phuan hna caah mi thilri chuttu phu hruaitu pa le mifir pahnih cu Tamu-PDF Battalion 1 nih kan tlaih ṭhan hna, tiah cathanh an chuah.

“Mi thilri chuh in a vakmi mifir hna cu PDF nih kan tlaih hna i, CDM tuahmi palik sinah kan ap hna i, a himnak hmun ah an chiah hna. A herh ning in checkhlatnak kan tuah hna lai,” tiah Tamu-PDF ṭuanvo ngeitu nih a chim. An tlaihmi hna mifir pathum cu, Tamu-PDF nih checkhlatnak kan tuah cuahmah hna.

Tuan deuh ah Tamu-PDF nih an rak tlaihmi mifir pa zong ṭha tein chekhlatnak kan tuah i, NUG cozah, runvennak zung biakhiah ning in kan tawlrel hna lai, tiah Tamu-PDF Battalion 1 nih an langhter. “Hi hnu zong ah hriamnam i bochan in mizapi thilri a firtu le a chuttu hna cu, mizei nan si poh ah dantatnak nan i huah lai, tiah Tamu-PDF nih mizapi cu ralrin an pek hna.

Tamu-PDF nih an laak/uk khawh rih lomi Tamu khua chung ah SAC ralkap le Pyusawhti nih hmunhma an laak. Tamu khua chung sang cheukhat ah mi thilri chuhnak le firnak atu le atu a chuak lengmang. Pyusawhti chungtel cheukhat a simi mifir phu cu September 5 ah tualchung mi hna nih an rak tlaih hna.

Phekhone Ah SAC Ralkap Bomb Puahh An Tong i, SAC Ralkap 20 Hrawng An Thi, Shan-Kareni Phekhone(ဖယ်ခုံ)peng, Moebyel (မိုးဗြဲ) khua pawng, Wayisuphalain(ေ၀ရီဆူဖလိုင်) khua ah, kahdohnak faak ngai in a chuak i, SAC ralkap 20 an thih pinah PDF nih hriamnam zeimawzat an lak, tiah Karenni’s Voice nih a thanh.

September 8 zinglei sml 9 hrawng in kahdohnak a chuak i Phekhon peng, Wayisuphalain khua in Moebyel khua ah SAC ralkap pawl cu an lut i, Moebyel Buddhist biakinn pawng an phak ah SAC ralkap 400 hrawng cu tualchung hriamtlai phu nih kan kahdoh hna i, a tlawmbik SAC ralkap 20 an thih pinah hriamnam zeimawzat kan laak, tiah KNDF hruaitu pakhat nih Karenni’s Voice ah a chim.

SAC ralkap lei nih cun hriamngan in dongcat loin an kan kah ve i, kan ralkap cheukhat cu hliam an tuar nain an hliamhma kong ah thinphan ding a um lo, tiah KNDF ralkap pakhat nih cun a chim. Cu kahdohnak cu Moebyel-PDF, KA, KNDF, KRU le URC hna i bawm in an tuahmi a si.

Sagaing Ramṭhen, Kathar Le Shweku Peng Ramri Kahdohnak Ah PDF Nih SAC Ralkap 4 An Thah Hna!: Sagaing ramṭhen, Kathar peng Chaungwa(ချောင်းဝ) khua le Kachin ramkulh, Shweku peng, Myingyaung Kung(မင်းကျောင်းကုန်း) khua karah SAC ralkap le Myohla KPDF cu nizan September 8 ah am i kap i, SAC ralkap 4 an thi, 5 nak tlawm lo hliamhma an pu, tiah Myohla KPDF nih cathanh an chuah.

Moetarlay(မိုးတားလေး) khua ah umhmun a khuarmi SAC ralkap 83 cu, Chaungwa lei ah rallam an sial lio, zing sml 11:15 ah Myohla KPDF nih bomb lung 7 in an puahhnawh hna, tiah theih a si. KPDF nih bomb kan puahhnawh hna dih in SAC ralkap pawl cu hmun hnih ah an i ṭhen i, Chaungwa lei ah an kir ṭhan, tiah KPDF nih an langhter.

Cu bantuak ṭhiam in Magway ramṭhen, Inpin(အင်ပင်) le Kupin karah a ummi SAC ralkap check gate le sentari an cawnghnak hmun pakhat cu September 7 zan sml 8:30 ah kan kah caah SAC ralkap 2 an thi, tiah Shwe Nyar Myae (PDF) sinin theih a si.

“Nizan September 8 zanlei sml 3:00 hrawng ah Inpin le Kupin kar ummi ralhrang check gate kan kah i, PDF ralkap 2 an nunnak a liam, ralhrang pawl zong tam ngai an thi, a thimi zat cu kan thei kho rih lo,” tiah PDF ralkap pakhat nih a chim.

Cu kahdohnak ah cun Shwe Nyar Myae(PDF), KING COBRA People’s Defense Force(PDF), Urban Underground Revolution Force(UURF) le Yesagyo Revolution Group (YRG) phu hna i bawm in an kah hna, tiah theih a si.

Dawei Peng Ah SAC Ralkap Nih Tualchung Mi 100 Leng Ralphaw I Hman Ding Ah An Tlaih Hna!, Tanintharyi ramṭhen, Dawei(ထားဝယ်) peng Dawei-Htikhi lam kahdohnak ah SAC ralkap nih tualchung mi 100 leng cu ralphaw hman ding ah an tlaih hna, tiah Dawei PDF ṭuanvo ngeitu nih a chim.

A luancia September 6 ah Dawei-Htikhi lam cung um Bawapin(ဘဝပင်) khua pawng ah SAC ralkap le PDF kahdohnak a chuak i, Bawapin khuami ngakchia he upa he 100 leng an tlaih hna, tiah theih a si.

“Bawapin khuami an tlaihmi hna cu SAC ralkap nih atu tiang tiang an thlah rih hna lo. Bawapin khua pawng kahdohnak ah SAC ralkap 7 an thih caah ralphaw hman ding in khuami 100 leng an tlaih hna hi a si,” tiah Dawei PDF ṭuanvo ngeitu nih a chim. Bawapin khua pawng kahdohnak ruangah pawngkam khuate 5, milu in 1,500 leng cu a himnak hmun ah an zaam caah eidin ti rawl, sii-ai le ruahkham thilri an herh ngai, tiah theih a si.

SAC Ngeihmi Khualtlawng Phortu Motor Cu Bomb Kan Puah Cang Lai Tiah PDF Nih Mizapi Ralrin An Pek Hna! SAC ralkap nih ngeihmi khualtlawng phortu Shwe Man Thu(ရွှေမန်းသူ) le Shan Ma Lay(ရှမ်းမလေး) motor cu bomb kan puahhnawh cang lai caah mizapi nih, i cit ti lo ding a si lai, tiah nizan September 8 ah Sagaing PDF nih mipi ralrin peknak cathanh an chuah.

An cathanh chung ah SAC ralkap nih ngeihmi khualtlawng mi phortu Shwe Man Thu le Shan Ma Lay motor ah i cit ti lo ding in ralrin an pek hna i, a bik in Mandalay- Monywa kar hrimhrim ah nan i cit lai lo, tiah an langhter.

Kan cathanh chuahmi nan ngaih lo i, nan i cit ko ahcun harnak nan ton tikah ṭuanvo kan in la hna lai lo. SAC ralkap nih rian an ṭuanmi paohpaoh le an tangka luhnak cu kan dohmi a si caah a cunglei langhtermi motor ah mizapi i cit ti lo ding in ralrin kan in pek hna, tiah cathanh an chuah.

Kalaymyo Peng Ah SAC Ralkap Nih Hriamngan An Kah Caah Nu Pathum Hliamhma An Pu, Kalay thlanglei Cianthar(ကျန်သာ) khua ah umhmun khuarmi SAC ralkap nih, nizan September 8 zanlei sml 6:00 hrawng ah duh paoh in hriamngan an kah caah Tintar(တင်သား) khuami nu pathum cu, hriamngan kuan nih a khen hna caah hliamhma an pu, tiah tualchung mi hna sinin theih a si.

“Nufa hna le mileng pakhat cu tisa an din lioah hriamngan kuan nih an inn kam hai kung a khen caah nufa hna cu an pumpaluk in hriamngan kuan pelpawi nih a khen hna,” tiah tualchung mi pakhat nih a chim.

SAC ralkap nih umhmun an khuarnak Cianthar khua cu Tintar khua in nitlak thlanglei meng 3 hrawng a hlatnak ah a ummi a si. SAC ralkap nih hriamngan an kah lioah kahdohnak zeihmanh a chuak lo. Hliamhma pumi nu pathum cu Kalay sii-inn ah an kalpi hna, tiah tualchung mi hna nih an chim. Crd-The Chin Post