June 1 ah Joshua Van le Tuluk Pa an i Ṭhua Lai. A ra lai mi June 1 ah Joshua Van le Tuluk pa Su Mudaerji an i ṭhua lai, tiah thawng kan theih.
UFC ah i ṭhuat ding in contract a tuah cangnak kong cu Joshua Van nih a Facebook cahmai zong ah theihternak a tuah. “Contract ka sign ṭhan cang, thawng kan thanh ṭhan te hna lai,” tiah Joshua Van nih a ṭial.
US ram, Jew Jersey ah a ra lai mi June 1 ah an tuah ding mi UFC 302 ṭhuat zuamnak ah Joshua Van le Su Mudaerji an i ṭhua lai, tiah Kawl zaangleknak thawngpang cahmai hna nih an ṭial.
Joshua Van he aa ṭhua ding mi Su Madaerji hi kum 28 a si i, MMA ṭhuat zuamnak voi 22 aa ṭhua i voi 16 teinak a hmu mi a si. A luancia Apri 6 ah tuah mi UFC ṭhuat zuamnak ah Joshua Van le Brazil pa Lucas Rocha i ṭhuat ding in timhtuah a si nain Locas Rocha nih a rak lettak. The Hakha Post
Thawngpang dang: Nihin cu Pathian thil ser khuaruahhar kan zoh cio lai. North America ah Chin khualipi, Indianapolis zong van/sky a thiang hirhiar lai. “Look Up Day” a si.
Pathian zumtu hna, Pathian nih a sermi thil hi thuk deuh in nan ruat bal cio maw? Van le vawlei a ser ning, nika le thlapa, Vawlei umtuning pawl hi? ” Pathian nih Vawlei (earth) cu zeihmanhlo/ empty space chung ah a tlai” tiah Job 26:7 ah kan hmuh.
Minung, saram, le thil nung vialte kan umnak Vawlei/earth pi hi, a lawngmi, empty space chung ah a tlai ko i, raang taktak in a tli. Nika/ Sun a sermi nih ceunak a kan pek. Lumnak a kan pek. Cucaah, Vawlei ahhin nunnak a um kho.
A cheu nihcun, Nika/ Sun le Vawlei/ Earth karlak ah a ummi, thlapa/ moon hi Vawlei he nai deuh in a um caan ah ci thlaknak/tefa hrinnak a ttha deuh tiah a zummi an um. A dik ko ahcun, Vawlei a heltu, thalpa hi, Vawlei ah ci tampi a karh khawhnak hnga caah, nawn petu bantuk a si hnga, tinak a si. Scientist nih an tuaktan khawh lomi, Pathian thilser hi a mak tuk.
Nihin cu kan umnak Vawlei in, Thlapa nih Nika a phen lio kan zoh cio lai. Chun laipi ah, Chih-khat cu a mui dup lai. Kan thinlung ah Pathian thil ser a ropui zia kan ruat cio lai. Nunnak a kan petu, damnak a kan petu, kan Pathian sinah kan ilawmnak zong kan lungthli in kan chim cio lai.