Joe Biden Cu A Pawng Ummi Hna Siarem Lo Ngai In A Tuah Hna

President Joe Biden cu white house i Covid-19 dohnak caah a timhtuahnak a chim i President Executive Order zeimawzet zong a chuah chih. Bia a chim lio ah a khuh lengmang caah thlawnglatu hna le a pawng ummi hna siarem lo ngai in a tuah hna. Mask tal a hruk ding si an ti. A thli tein Covid-19 a ngei ziar hnga maw ti tiang in a ruatmi an um.

Tuchun Executive Oder a chuahmi chung in a chimmi ah, vanlawng in siseh, bus in siseh, tlanglawng in siseh khual a tlawngmi paoh nih mask nan i hruk lai” a ti. Ramdang in US a rak lutmi hna zong nih Covid-19 zawtnak nan ngeih lonak le nan thiannak test nan i tuahmi result nan i ken lai, US nan phak in quarantine zong luh a si lai, asinain ni zeizet quarantine luh a si lai timi cu a chim chih lo.

Relchap, Tuchun cu US President Donald Trump White House in a chuah le President thim tharmi, Joe Biden Inauguration a dongh tiang ka zoh. Khua a phunphun a ka ruahter. Democracy ahcun ruahnak ikhah dih phung a si lo caah kan i khah lonak tete itheihthiam le iruahthiam a herh zia tampi a kan cawnpiak. Kan duhmi President a chuah caan a um lai i, kan duh lomi President a chuah caan zong a um ve lai. Zei paoh hi an chia dih lo i, zei poah hi an tha dih fawn lo. Minung a simi paoh a tlingmi kan um lo. Asinain kan chiatnak le kan thatnak tu a dan bia a si. Zei paoh hi Pathian nih a pekmi caan chungah a nung dihmi kan si. Hmailei US rampi zei lam a panh lai kan hngal kho lo, A hngaltu cu Pathian lawnglawng a si. Chiat lei kan panh ah siseh, that lei kan panh ah siseh Pathian timhtuahmi a si tiah lungsak khawh izuam cio hna usih.

Tuchun ka lungah a caam bikmi cu President Donald Trump nih White House in a chuah lai teah, ca pakhat a tial (note) i President thar Joe Biden cabuai cungah a chiah ta ti a si. Mah cate cu zei ko dah a tial hnga tiah theih ka duh ngaingai. Joe Biden nih a chimnak ahcun ” dawtnak, velngeihnak le zawnruahnak a telmi ca” a si tiah a chim. Reporter nih zeidah si? tiah an hal i, amah ka chonh hmasa lo ahcun ka chim rih lai lo” a sin ah lunglawmhnak chim ding ka ngei” tiah a leh hna.

White House Press Secretary thar Jen Psaki nih tuzan lei ah a voikhatnak Press conference a tuah i, a chimmi zongah zei bantuk ca dah a si tiah reporter nih an hal than i, Jen Psaki nih,” It was both generous and gracious” tiah a chim thiamthiam. Keimah lawng si lon midang zong nih mah cate cu theih le hngalh an rak duh ciomi a si. President sinak biakamnak a tuah dih hnu ah nizan i ka tialmi phun 17 kha President Executive order hmangh in a chuah colh. President Donald Trump policy phun 17 cu a khupthal a leh dih manh. President thar Joe Biden nih a chimmi cu,” US mipi dihlak caah President ka si lai” tiah a chim bantuk in kan dihlak caah a tha bik in President a tuan khawhnak dingah thlacamnak in bawmh cio hna usih. Credit: Salai Lairamthang