JCBC Khrihfabu ah kan bochan mi le kan dawtmi Pu Tha Lian nih mual a kan liam tak Ruangmang ai ee!

JCBC AH THIH DAR KAN TUM
======
Khrih ah unau vialte hna, Jacksonville Chin Baptist Khrihfabu ah kan bochan mi le kan dawtmi Pu Tha Lian (Pa Chit) nih a dawtu a Pathian sinah a kan kaltak tiah thawng kan in thanh hna. Anih hi, pawcawmnak caah Truck a mawngmi a si. Nizan kha rian ttuannak ah zanlei hnuin ai thawh i a Truck cu an company pawng Truck stop ah a park.

Cuticun an nu zong he a ih lai teah an i chawn. Tu zing kha an nu nih a hei chawnh lengmang nain, voidang tawn bantuk in a phone a tlai ti lo. Cuticun, an nu cu Florida thlichia hran lio he si kaw, a lungre a thei tuk i Jacksonville khua chung Truck stop kip ah a fale he mawtaw i mongh in an va kawl nain an hmu kho lo.

A hnuah a ttuannak company a chawnh hna i satellite communication device a hmanmi in a truck a parknak an chimh i cu ka ahcun an nu farual cun an va fuh. Tho cang law tiah a truck inka cu an va kingh lengmang nain a rak chawn ti hna lo. An nu nih a va thawh tikah cun a rak kik dih cang.

Amah hi kum (39) a si i fa (4) a ngeimi a si i Lairam a khua cu Sakta a si. A fale hi hngakchia a lung a fim rihlo mi te te khi an si. Anih hi Pathian a duhtuk mi a si i ni (3) chung te hna Biakin ah rawl ulh in Khrihfabu le miphun caah thla a cam mi, a fale zong pulpit cungah bible rel le hlasaknak a ngeihpi tawn mi, chungkhar le Khrihfabu ah Pathian bia in thazang a kan pe tawntu a si.

A Facebook timeline zongah Pathian bia in thazang a kan pe lengmang mi a si pinah, ram le miphun dohthlennak ah phaisa le caan tam taktak a pe lengmang mi a si. Hi bantuk pasal ttha nih a kan liamtak cu a fak kan ti tuk. Abikin a chungkhar hna caah thla rak cam piak cio hna uh!

A ruak hi Siin ah an chiah i dawthlanhnak an ngeih dih hnuah Funeral Home nih an lak te lai. Zeitik dah thlan a tlak lai ti cu a fiang rih lo. Ngeihchiatnak hrawmpi buin, Sui Bik Thang (Parku pa)

Nithaizing ka hun thawh cu thawngpang tha lo ngai nih a hun kan phanh ai. Yangon ka phak caan ah khua ka sak tawnnak ka ni i a fapa hniang kan u Pa Chit nih US ah a kan liam tak timi thawng nih ngaihchia ngai in a ka um ter.

Pa Chit hi US a umnak ah pawcawmnak ah truck motor a mawngmi a si i, kanmah lei tuzing ahkhan khual a tlawn i a truck a parknak hmun ah motor chung ah a thi ko kha hmuh a si, a ihnak lanh beh dawh a si nain FBI nih a fiangmi thil sining an chim rih (rua) lo. Kum 39 lawng a si rih i, fa no pali a ngeimi a si tikah a fale kong le an nu kong ko ruah ah ngaih a chia hringhran.

Khat te lei ah, Pa Chit hi a fel bakmi a si i, Pathian a duh tuk ca ah a FB ah siseh an umnak biakinn ah siseh Pathian a thangtthat lengmang a si. Dothlennak zong ah thazaang a chuah pengtu a si. Ahlei in Hakha CDF nih cun bochan ngaimi phaisa thawhfel a si.

GSRC i local upa pakhat zong a si fawn. Dothlennak ca ah phaisa in i tel kha a duh ngai ca ah NUG bond cawkning te hna a rak ka hal tawn. CDF ralkap hna ca ah phone te hna zong a cawk piak tawntu a si. Mitha hi an chan a tawi an timi hi a dik ko rua mu, Leicung ngai hi duh a tling kho lo e.

Pa Chit hi nanmah lei an rat hlan ah Philly ah rak ummi a si. Kan rak bochan tukmi, mifel tuk a si. A thawng kan theih cu kan ngaihchia tuk. Nufarual kong ruah ah ngaihchiat a zual. BAWIPA nih taantakmi chungkhar hnem ko hna sehlaw, zohkhenh ko hna seh!

A poi tuk hringhran ee, mino te thih zaa lo nih a kan liamtak cu, Kan ngaih a chiatuk hringhran ee, Chungkhar hna nan ngaihchiat nak cu kan nih chungkhar zong nih kan rak in tuar pi ve hna ee, Kan Pathian tu nih in hnem ko hna seh mu! Mah bantuk miáš­ha bochanmi, nupi le fale cawmtu nih an kan kaltak thawng kan theih ah hin cun kan nun nih a tuar kho cio lo e!

Ka ngaih chia tuk ve ee. Nu fa rual hna kan tuar in pi tuk ve hna. Truck mawngh in paw cawm mi kan si ve tik ah nan lung si vangh le Thla lau lai Ning hi kan theih thiam tuk hna ee. Ka lau tuk ah a chim zia hmanh Ka thiam lo. Bawipa nih a thlazaar tang ah in hum him ko hna seh mu.

Na cattial mi van rel tikah ngaih achia tuk ai ee, nupi le afale sining an hei kawl ning le ruakphawh in van hmuh cu ka rel ka ah cun ka mitthli azur, zeiti awk tha! Vawlei cu Aw! Pathian nih anupi le afale chungkhar dih lak tuar thiam nak pe ko hna seh!

Ngahchiatnak kan rak i hrawm. Dawtmi ainnchungnu le afa le caah afak tuk hringhrang ko lai. Zeizong theitu Pa Pathian sin in ara mi hnemnak, thawnnak le tuarkhawhnak thazang tantak mi innchungkhar, Krifabu le cingla rualchan vialte sin ah athar in tlung hram koseh. Thlacamnak in.