James Vanneilian: Bawipa nih A Hrawhmi Cu Amah Nih A Remh Ṭhan
Bawipa nih A Hrawhmi Cu Amah Nih A Remh Ṭhan
========
“Nan ca i ka tinhmi cu keimah lawnglawng nih ka hngalh, tiah Bawipa nih a ti. Cucu vanchiatnak si loin thluachuahnak asi lai i nan hnu i a rung um ding tefa tampi kong asi lai.” JEREMIAH 29:11. Bawipa nih Adam le Eve zungzal thihnak, thing thei an ei lai ahkhan a thloh hna lo. A ei ter ko hna. Asinain zungzal nunnak lam Jesuh Khrih (Gen 3:15), lamthar in thluachuah tampi a ser piak ṭhan hna.
Noah chan ah Bawipa nih vawleimi vialte an sual tuk caah a thah dih hna i, Noah le a chungkhar (Gen 9:1-17), lamthar in thluacuah thar tampi a ser piak ṭhan hna. Abraham nih Bawipa he thisen biakamhnak an tuahmi ah a ngut tak (Gen 15) caah, Abraham tefa Isreal miphun hna cu kum (400- 430) Egypt ram ah sal a taanter hna. Asinain Bawipa nih kamhmi Canaan chawhnuk le khuaihliti luannak ram ah Moses (Exo. 14) le Joshua (Joshua 3-5) hmang in lamthar in thluachuah a ser piak ṭhan hna.
Pathian thimmi miphun Israel nih kamhmi Canaan ram an phak hnu ah Bawipa nawlbia an ngaih lo caah, Pathian dang an biak caah le sualnak phunkip an tuah caah Bawipa nih kum 70 Babylon sal ah a chiah hna. Asinain prophet Jeremiah (Jeremiah 29-11), lamthar in Bawipa nih tluachuah a ser piak ṭhan hna.
Hi Bible caang hi Bawipa nawlngaih lonak ruangah, “saltaannak, dantatnak, chimhhrinnak le cawnpiaknak an tonmi le an sunghmi vialte Bawipa nih hmailei ah a thar in thluachuah a kamhmi hna” kong asi. Cucu Bawipa nih kum 70 hnu in a tlinter taktak!
Kannih Jesuh Khrih zumtu hna zong, abikin Sertu Pathian thimmi “Chin miphun” hna zong hi Bawipa nawlbia kan ngaih lo caah, sualnak phunkip kan tuah caah le kan iporhlawt, lih kan chim i ṭhatlonak phunkip kan tuah caah Bawipa nih “dantatnak, chimhhrinnak le cawnpiaknak le Kawlram saltaannak chungah” kan um lio asi.
2021 kum in, Bawipa nih “Dr le Rev. tampi, mirum, mifimthiam, uktu khuanu/khuapa, miṭhalo hna, aa porhlawmi khua, Khrihfabu/Biakinn, pumpaak le innchungkhar a nunnak tampi lakin Bawipa nih a hrawh hna i, ram hi a thianh. Hihi Bawipa thimmi Chin miphun hmailei ramthar chungah kan luh tikah thluachauh a let in kan hmuh nakhnga caah Bawipa nih a ṭawlmi asi.
Bawipa caan a phak tikah kawl ralkap zong hi Bawipa nih a hrawh te hna lai i, Chin miphun nih luatnak kan hmu te lai. Cu tikah kan Chin ram le miphun ah Bawipa nih a thar in a sersiam ṭhan lai i, kan fanu/fapa hna le zumhawktlaktein a nungmi hna zumtu nih ram hi an hruai i an uk te lai.
Atulio ah Bawipa caah zumhawktlak in a nung lomi hna le harsatnak chungah a vuaivaimi hna pawl le lawmhnak chim loin le thlacam lomi hna , Pastors, Evans, hruaitu, politicians le Khrih zumtu hna hi, anmah siseh an tefa nih siseh cu ram ah thluachuah an hmu lai lo. Egypt ram sal taannak in a chuakmi Isreal miphun kum 20 cung thetse ram, lampi ah an nunnak a liam bantuk khi asi lai.
Cucaah Khrih zumtu hna, lungdong lo tein nifatin Bawipa sin ah thlacam law, kan tonmi thil kip ah lawmhnak chim in Bawipa thangṭhat zungzal. Bawipa caan khiahmi le biakhiahnak chungah a kal i a nungmi kan si. Kan chin ram nih luatnak kan hmuh te lai. Asinain thisen tampi a luang lai, thilri tampi a ciam lai, nunnak tampi a liam lai. Cucu Bawipa nih a ramthar sersiam a duh caah ramhlun a thianhmi le a hrawhmi asi.
Bawipa nih chin miphun hi Isreal miphun bantukin bia a kan khamh ve, “Nan ca i ka tinhmi cu keimah lawnglawng nih ka hngalh, tiah Bawipa nih a ti. Cucu vanchiatnak si loin thluachuahnak asi lai i nan hnu i a rung um ding tefa tampi kong asi lai (Jere 29:11)” tiah ati. Amen!
Jesuh Khrih min sunparnak hi kan chin ram le miphun le tefa cungah zungzal in zungzal hmun caamcin ko seh! Amen!
Bawipa kut nih a hrawhmi cu Amah lila kut in a sersiam ṭhan. Bawipa hngalhmi miphun kan si i, thluachuakmi miphun kan si! Bawipa kalawm tuk tiah thlacam in Bawipa sawm hna usih! Credit: James Vanneilian