Israel hi an ram hnih he pehtlaihnak ttha a neimi a si caah ai thawh lai ti a si!

Tutan i Ukraine an tukmi cu Israel nih Russia mawhchiatnak a tuah ngam/duh lo!
=======
Ukraine (U) le Russia (R) kar ah awngtuai (lamkal) a ttuan kho ding an um lo tluk a si cang tikah Israel hi an ram hnih he pehtlaihnak ttha a neimi a si caah ai thawh lai ti a si. Ukraine le Russia ahhin Israel phun khua a sami zong an um len pinah Ukraine president cu Israel cithlah a si. Russia hi Syria le Israel kong ah biapi tukmi a si caah Israel nih Russia he pehtlaihnak tthalo neih ding a duh lo. Cucaah tutan i Ukraine an tukmi cu Israel nih Russia mawhchiatnak a tuah ngam/duh lo.

Kan hnu ah Chelsea FC a neitu Roman cu Ukraine nih Russia he chawnhbiaknak ah i tel ding in an sawm kong ka rak ttial, a ruang hi zeipipa si lo; pakhatnak ah a rum caah le Putin he pehtlaihnak neimi an si, cun pahnihnak ah Israel cithlah a si ve caah Ukraine president nih a bochan ngam.

Zeiruang ahdah Israel lawng cu lamkal ding ah a taan ti ahcun, EU, Norway le UK ram hna nih Ukraine hi an dirkamh, Russia hi an mawhchiat. Cu bantuk cun USA zong nih Ukraine a dirpi caah Russia nih mah hna pawl hi Ukraine caah bia a chim ding an si tiin a duh lo ding kha thil sining cu a si. Cu a si ne ah India tel? Russia mawhchiat a duh lo pinah Russia le Ukraine buainak ah i thlak a duh lo.

Ram lian pakhat a taang, Tuluk kan timi khi a si. Tuluk cu ram ngan le ram tthawngttha a si ko nain nitlak lei ram pawl he sining ai dang bakmi a si pinah Russia hawi tthabik a si caah, cun Tuluk an phunghrampi ah khin Miram buainak asiloah ram khat le ram khat hriamnam in i tukdohnak ah kan i thlak la lo timi kalpining an neihmi nih a donh ngai ti a si. Khatlei ah Ukraine le Russia nih zei si paoh ah kan tlaangtlak law kan pahnih kar awngtuai kan ttuan piak ko tiah Lukluk cu an hal duh ve lo tiah EU ramdang minister nih zahan ah a chim.

Israel prime minister nih a voikhatnak ah Russia president a ton hmasa. Cun Germany a luh hlan ah Ukraine president he an i chawn. Ttuanvo ai khinh phot tiah Media nih an van ttial. Ni khat a rauh hlan ah Russia ramdang minister Lavrov nih Ukraine ramdang minister ton ding a hnatla colh. Cucu Turkye ram ah tonnak nei ding in Turkye nih a cohlan hna. Mah zawnte hi siaherhnak he ka van tial duak.

Russia le Ukraine palai cu tu chun kha avoi hnihnak an i tong. Kan i kap rih ko lai ti hnatlaknak an nei kho. Asinain mipi (civil) hrial ding le an ikahnak khua(hmun) in kadang an i tthial karlak tibantuk caan paoh ah kah i ngol ding Ukraine lei halmi cu Russia lei nih an cohlan piak. Cu a si bu ah Ukraine palai nih an beisei ning a si lo, le kan i tong tthan lai tiah lungtlinnak an nei. Kap hnih palai an i ton kar ah French president nih Putin a chawnh le ngol cang ko, tiah a lungthlen ai zuam nain Putin nih kan hmuitin tlamtling lakin kan nor ko lai tiah a rak leh.

Ukraine president nih Putin he i chawnh le i ton ka duh ko tiah a hauh peng ve. Kan i chawnh lawng ah ral a dai/ dih lai tiah a chim. Zeibantuk thil indah Putin a lung thlenter ai zuam hnga, Putin he chawnh lawng ah ral a daih lai cu? Kan thei lo. Asinain Putin nih zei lehnak hmanh a tuah rih lo.

USA nih Minute Man III-rocket hneksak a timhmi cu Russia he theihthiam lonak a chuak sual lai tiah an leet. Cucu a tha ngaimi a si. Tu chun ah Pentagon nih Moscow he fawite chawnh khawhnak Direct Line a ser colh fawn. Ralkap cawlcanghnak le thil sining i ruahpalh sual lo nakding ah ti a si.

Ukraine ralzam le mipi bawmhnak caah US$ 1.5 billion an hmuh manh cang. Cu pinah ram tam ngai nih ralzam lak ding timhtuahnak an ngei hna. Norway nih 1000 hrawng lak ding in a ruah i dawng linga cu an lak manh cang hna.
Russia mirum pawl vawleipi nih a phih dih ngawt cang caah an sung tuk, cheukhat cu zarh khat chung ah dollar billion tam pipi an sung. Cucaah a rannak in hi raltuknak cu ngol awk a si tiah an president an nawl cang (cu hlan an holh lo.). Mah mirum a tamdeuh cu Putin he naihniam an si hna. Zinan le Gas mirum deuh an si i chaw an leh khawh nakding ah Putin pumpak zal ah phaisa a senhtu an si ngawt an ti.

Putin nih India tawsawh in a van i la le Ukraine ah India siangngakchia pawl an tlaih hna le an hrem hna lawng si loin i khamnak ah an hman hna a van ti. Tlawmpal ah India ramdang minister nih thawngpang kan theihmi um lo, tiah a chim pinah Ukraine cozah he i bawm in kan rammi an kir len ko cang tiah a chim. Putin nih cun Ukraine ahhin Middle East in a rami hriamtlai tam ngai an um cang tiah a chim fawn. Cucu a si lai tiah an zumh caah nitlak ram pawl nih luh lo ding in ralrin a pek phot.

NATO nih a ralkap 20000 cu Russia innpa Nato ram pawl ah a kuat chap, American ralkap lawng 12000 an si. Asinain Russia nan kap hrimhrim hna la lo tiah nawl an pek hna. An rian cu Russia he i kah lo a si. A sullam cu Russia innpa Nato ram pawl dirkamh i Russia Russia he raltuk hrial ding si ko. Cucu Nato an website ah rel khawh si.
ICC ah Russia tazacuai ding in ram 30+ nih min an thut cang.

Ka ruahnak tam ka chim rih lo. Nai ah Ukraine ralkap nih Tank an mawngh thiam colh lai lo caah EU nih an pe hna lo ka timi kha a dikmi si, Tank an ser tharmi pawl hi siifak Ukraine nih an nei rih hna lo, a hlun pipi cu an nei sawk. Vanlawng hmanh an neihmi phun lawng an pek hna. Ca nan rel tikah nan relmi kong(ram/minung) Background tlawmpal nan theih ve lo cun hlan bantuk in fianh len ka huam lo. Hlawnching Bawimang Lian