Iran sin Cakuat: Middle East lei ah B-52 bombers an Thlah Cang Hna

Iran sin Cakuat: Middle East lei ah B-52 bombers an Thlah Cang Hna
=======================================
Afghanistan le Iraq in American ralkap pawl a cheuchum in tlunter dingin Trump a cozah nih nawl a chuah hnu ni tlawmpal lawng a rauh ah a tu bantukin US ralkapbu nih B-52 bombers pawl Middle East lei ah a thlah colh hi a si.
A lungkhongmi pawl nunchimhnak dingah le US a ramdangbawi pawl a dirpinak hna fehter chinchin duh ah, US Air Foce B-52H “Atratofortress” vanlawng ralkap pawl cu raltukcawnnak tawite an ngei ta hna, tiah US Central Command nih a chim.
“Ral pawl kap khawhnak dingah siseh, raltukhawh i hmunkhat khawhnak dingah siseh, raltuk ai thok le cangka ral pawl nawr colh khawhnak thazaang ngeih khawhnak dingah a biapibik mi cukhulrangtein cawlcangh khawh, luhchuah khawh, i mersan khawh hi a si,” tiah 9th Air Force commander Lt. Gen. Greg Guillot nih a chim.
“Tutan raltuk cawnnak nih hin raltuknak dingah i hmaithlakmi hmunhma umtuning siseh, rianfialmi kongah siseh bomber ralkap pawl tampi a bomhchanh hna lai. US le a ramdanghawi pawl vanlawng in raltuk an cawnnak zong tampi a thawnter deuh lai. Cun, hmunkhat i ral an tuk ti tik ah rualrangtein timhlamhciami a siter khawh fawn hna lai,” tiah Gen. Guillot nih a chim.
January in khin cun Afghanistan ah a ummi US ralkap 2,500, cun Iraq ah a ummi US ralkap 2,500 tlunter (lak than) dingin Trump nih acting defense secretary ah ai hman mi Chirstopher Miller nih Tuesday ah khan thawngthanhnak a tuah. A tu i Afghanistan ah a ummi US ralkap hi an dihlak ah 4,500 an si i, Iraq ah a ummi hi 3,000 an si. “Kan hlan ah rian a rak tuan cangmi hna an pekchanhnak cungah kan lunglomnak vun langhter bu in le hmaizahnak pek bu tein, President nih a chuahmi order ningtein hi ram 2 in hin kan ralkap pawl tlunternak rian hi kan pehzulh ko lai,” tiin Tuesday ah Miller nih a chim.
“Hihi American mipi zongnih an dirpimi cuhlan kan i timhlamhnak ning te he zong ai remcangmi a si ko i, police asiloah kan i tinhmi thlennawn ai timh bia zong a si hrimhrim lo,” tiin a chim. Peace deal (remdaihnak hnatlaknak) kong he pehtlaiin Taliban le Afghan cozah he a donghnak ceihkhantinak ngei dingin Secretary of State Mike Pompeo zong cu Doha, Qatar ah a um lio pi a si. Saturday i Remdaihnak hnatlaktinak tuah dingin nithlak an tuah a tlinnak dingah suimilaam tlawmpal te lawng ai deuh ah khin Kabul i mipi khuasaknak hmunhma ah mortars in an kah hna i minung 8 an thi. Afghanistan ah buainak ai thok than cang.
Saturday i Middle East lei a zuangmi B-52H bombers pawl hi khuazei lei set an panh, ti theih a si lo. North Dakota ah a ummi Minot Air Force Base in cun an thawh cu an i thawh phawt. US pumpi chungah Minot Air Force Base lawnglawng ah hin Intercontinental ballistic missiles (tanglei in kahnak) le nuclear warheads a phur kho mi bombers tampi an chiahnak a si. Thlapa tampi chungah tutan hi Middle East lei panh in B-52 rian an fial avoikhatnak a si. January lio i US military’s elite Joint Special Operations Command nih Iran General Qassem Soleimani drone in an thah hnu ah khan Indian Ocean i Diego Garcia lei ah US B-52 6 bak thlah an si bal. Credit: Chelsea Bawi

Leave a Reply

Your email address will not be published. Required fields are marked *