Indonesia nih ASEAN hmang in, Ralkap Aana an tingmi hrawh awk ah an foreign minister cu kengkip ah a vak cuahmah

“He messed up with the wrong generation” tiah Mino pawl nih Min Aung Hlaing an au hnawhmi news ka rel i ka lung a tling kho tak. Hay Yah! He messed up with the wrong generation! Internet cu tuletu a phih. Facebook le social media pawl a khar la-lek. Asinain anmah ca te lawng awn/open ding cu a thiam ti lo pin ah Mino pawl kha anmah taar le Ralkap pawl nakin a let in technology ah an rak mak tuk fawn cang i, Internet an khar cu, anmah nih an tuar deuh lehlam. Naite, Internet kong tawlrel dingin China Ralkap tiang sawm. Nain a ti kho hlei lo.

Rohingya issue ruang ah Myanmar a hua taktak tu Indonesia nih ASEAN hmang in, Ralkap Aana an tingmi hrawh awk ah an foreign minister cu kengkip ah a vak cuahmah. UN Security Council ahhin China he ram aa cuh cuahmahmi India aa tel ve lio a si pinah UK nih chairman an ttuan lio a si caah fakpi in an nam fawn lai ti a fiang rih. Obama chan lio ah credit an lak ngaimi Myanmar democracy, atu Obama second term tiah ruahmi Bidden a von kai bak ah Kawlram a muihter tthan cu, Bidden nih fakpi in a tongh ko lai ti a fiang fawn. Cucaah, Min Aung Hliang hi, Tulio Generation Z pawl sinah aa chuah sual lawng si loin, foreign relations hrim ah a timing aa palh taktak. Amahte in thihnak lam aa sial bantuk a si ko.

Relchap, Canada in Plato Van Rung Mang@ Kawi Rung nih CDM caah fundraising a von kan tuahpimi cu a thahnem taktak.
“Something is better than nothing” timi hi tulio caan ah a herh khun. Minung 39 nih kut nan von sammi ah 3000 hlei a chuak manh ko. Canada ahhin minung 1500 hlei kan um i, kan dihlak in von sam kho usihlaw, Canada lawng hmanh ah tawr a chuak ko lai tinak a si.

Tulio CDM ah aa telmi, Cozah riantuantu hna hi, an pule nih biatak tein an tthih-phaih hna. “CDM ah nan itel ahcun na rian chuh thai na si lai i, tlaih zong na tong lai” tbk in min an thutter hna. Asinain Ram le Miphun a dawmi nihcun sungnak le harnak ton ding ithim in CDM ah an itel ko i, cu bantuk pawl dirhkamh nak a fund tampi a herh ko.

CANADA 🇨🇦 in Kawi Rung hi Tulio ram chung, ramleng Hakha- CDM committee ah aa tel ve i, nizan ah emergency in 3000 a chuakmi, tuanvo ngeitu sinah a kuat colh ve cang hna. Tuzarh weekend ahhin Canada 🇨🇦 ram Khuakip ifawnh in fundraising committee a dir lai timi zong kan theih caah kan ilawmhnak a ngan chin chin. Kan chan chung ah a cangmi, kan rampi thlennak ahhin daite in um loin, kan ti khawhnak lam kip in itel khawh cio izuam hna usih. Credit: Zasang Cinzah