Indonesia ah Myanmar Ralkap Uknak Duhlonak a Langhtertu Cheukhat Tlaih an Tong

Indonesia ah Myanmar Ralkap Uknak Duhlonak a Langhtertu Cheukhat Tlaih an Tong
———-
Asean Summit kai ding in Indonesia ram ah Min Aung Hlaing a phak lecangka in Indonesia zatlang bu pawl nih duhlo langhternak an tuah i, Indonesia palik nih duhlo langhternak a tuahtu cheukhat an tlaih hna. Atutan Asean ramhruaitu hna tonpumhnak ah Myanmar kong biapi in ceih an timh i, Myanmar uknak chuttu le rammi 740 hrawng a thattu Min Aung Hlaing an sawm ve caah Democracy le Nuhrin Covo a dirkamhtu Indonesia zatlang bu pawl nih khua tampi ah duhlo langhternak an tuah hna.

Thawngpang dang Hakha khuapi chung kahnak kong, Nizan Hakha Vuanci Inn i Kahnak ah Ralkap 2 an Thi. Nizan zaan sml. 6:45 hrawng ah Hakha, Vuanci Inn chumtual ah a cangmi i kahnak ah ralkap pahnih an thi, tiah thawng kan theih. Hakha ngandamnak lei rianttuantu pakhat nih, “Ralkap pahnih an thi i palik pakhat hliamhma a pu. A hliamhma a fak ngai i a thih lai le a nun lai chim khawh a si lo,” tiah The Chin Journal ah a chim.

Nizan i kahnak hi zurit ruang ah pakhat le pakhat i siknak a chuak caah a cangmi a si, tiah mit in a hmutu hna nih an chim. Hliamhma a pumi palik cu Kalaymyo ah thopbul ding in an kalpi, tiah kan theih.

Hakha Vuanci Quarters in i Kah Thawng a Thang. Hakha khua, Hniarlawn lam lei ah a ummi vuanci quarters hrawnghrang in tu zaan sml. 6:45 hrawng ah meithal puah thawng voi tam nawn a tang i ralkap pawl anmah le anmah an i kap, tiah upa pakhat nih a chim. Meithal puah thawng a than hnu in Ambulance pakhat zong cuka lei ah cun khulrang in a kal i sml. 7:40 hrawng ah cu Ambulance cu a rak kir tthan.

“Ralkap pakhat nih a ttuan hawi ralkap pahnih meithal in a kah hna hnu ah amah tein aa kap ve. A kahmi hna pahnih cu a hmun ah an thi. Amah tein aa kapmi hi a hliamhma a fak ngai. A thih lai le a nun lai a fiang lo,” tiah upa pakhat nih a chim. A dang upa pakhat nih, “Vuanci inn kutka a congtu palik le ralkap karlak ah i kahnak a chuak. Ralkap 2 an thi i, palik hliam a pumi an um,” tiah a chim.

Ngandamnak lei rianttuan pakhat nih, “Minung pathum an thi tiah a kan chimh ve,” tiah The Chin Journal ah a chim.
Hliamhma a pumi le a thimi kong ah The Chin Journal nih mithmuh in kan fehter kho rih lo. Credit; The Chin Journal, April 23, Hakha.