India nih Kawlram a pehtlaitik ah a bikin a zohmi 2 a um!

India Le MAH Ralhrang Hmailei Pehtlainak Hi North East Hriamtlai Pawl Hna ColCangh Nak Cung Ahhin Tampi Aa Hngat Teh Lai.
========
India nih Kawlram a pehtlaitik ah a bikin a zohmi 2 a um. Cucu China nih Kawlram influence ‘khuhchilh’ a tuahtuk sual lai timi le India a domi North East hriamtlaibu hna ruang ahhin India nih Kawlram a pehtlainak a ruangbik cu a si. India le China hi ai remlo mi an si ca ah China nih Kawlram hi a khuhchilh tuk asi ahcun India a domi North east hriamtlaibu tiang khi an tha athawng tuk sual lai ti hi India nih aphang ngaingai.

China nihhin India a domi hna hriamtlaibu hi biatak tein arak bawmh bal hna, MNF zong kha meithal tha tampi le phaisa arak bawmh bal hna. Culawng asi loh, Naga hriamtlaibu le Manipur hrialtlaibu hna zong China nih arak bawmh ve hna.

Chengdu institute of world affairs chairman ‘long shing chun’ nih a timi cu; Taiwon colcanghnak ahhin India nih apawm pi hna asi ahcun India a domi hriamtlaibu hi kan bawmh ve hna lai’ tiah a chimh. Ka langhter duh mi cu; China nih Kawlram hi influence a tuah tuk ahcun India a domi hriamtlaibu tiang khi an thazaang athawng lai,’ti hi india nih atih caah Kawlram he pehtlaihnak tha nei hi ai zuam peng nak aruang pakhat a si ve.

2nak ah India a domi North east hriamtlaibu hna khi, Sagaing Division le kan Chinram ah an um hna i Kawl ralkap nihhin India chak renghnak ah ahman ton hna. Thahchunnak ah India he an ipehtlainak athat lo paoh ah a forh hna i a kahter hna, a caan ah India he pehtlainak athat deuh paoh ah athawl hna, acaan ah kan ram ah an um lo tiin aipheh i athuh hna. A umtuning cu; Kawl ralkap nihhin North east hriamtlaibu hna hi India chak renghnak ah ahman hna caah India he pehtlainak athat lo paoh ah a forh atuk ter hna i, pehtlainak athat paoh ah India theih awk ah zeimawzat action a lak ve ton hna.

NLD Cozah chan ah khan India le Kawlram pehtlainak a hun sang ngai. India ralkap an ra i, Kawl ralkap he raltuk cawntinak an tuah, Kawl ralkap zong India ah an vakal ve i raltuk cawntinak an va tuah ve. Cu hnu ah ram 2 ral dohtinak (sun rise joint operation) min an bunh i Sagaing ram then ah a um mi North east hriamtlaibu hna kha an doh ti hna.

Manipur hriamtlaibu a simi ‘PLA’ zong Kawl ralkap nih an tlaih hna i, India kut ah achanh hna. Mah hnu ahhin Kawl ralkap nih Arakan Army (AA) kha bia tak tein a hun doh hna i, India ralkap nih ramri in an rak bawh ve hna. An strategy hi ahmai le ahnu in dum hna khi a si. Hi hi AA nih an theih caah India ramri lei in ralhmai serh kha a sikhawhchungin an rak hrialnak kha a si.

Min aung hlaing nih nawlneinak alak hnu ah India le Kawlram pehtlaihnak hi atla deuh ngai. Aruangcu; vawlei pi nih an hlawt mi ralkap Cozah he pehtlaihnak tha ser hi vawlei pi hmai ah ka thang achia sual lai ti hi india nih aphang ngai. Cucaah cu hlan NLD chanlio bantuk khan a pehtlaih ngam ti loh. Mah ruang ahhin MAH hi a lung atling lo i Manipur hriamtlaibu hna kha aforh hna i India a dohter hna tiah a dotthlet mi hna nih an chimh.

Tahchunnak ah nai tan Manipur ah India ralkap Assam rifles commender tel in minung 7 an kah that tu Manipur hriamtlaibu hna kha Kawl ralkap nih afial mi hna an si, ‘ti hi zumh cio a si. MAH nih Manipur hriamtlai pawl an hnu lei in a dirhkamh hna i,india a kahter mi hna hi, cuhlan NLD chan lio bantukin pehtlainak a that lo caah a si. Khatlei ah North east hriamtlaibu hna sin hin india hi harnak ka pek khawh asi ahcun atih lai i pehtlainak tha a ka tuah than lai ti zong aruat chih fawn.

Cucaah India le MAH ralhrang pehtlainak hmailei zeidah a lawh teh lai timi hi MAH nih india a domi hna north east hriamthlaibu hna hi zeitluk indah ahman khawh hna timi ah tampi aa hngat teh lai. North east hriamtlaibu hna hi india cozah harnak nganpi apek ter khawh hna asi ahcun india nih achawnh lai i an i pehtlainak that lei apanh kho men.

An i pehtlainak fek deuh in kalpi an timh ahcun give and take ‘a pee a zu’ an tuah lai i, cuhlan ‘sun rise joint oparetion’ min an bunh i ram 2 raltuk tinak an tuah i north east hriamtlaibu le AA tuk tinak strategy anhman mi dirhmun bantuk zong aphanh khawh mi a si. Apoi khunnak cu india le Kawl pehtlainak athat deuh paoh ahhin kan miphun dothlennak hi faktuk in akan nenh ve tonmi hi a si.

Asinain geo politics kan timi hi mah le ram miaknak lei hoih le zoh cio a si ko caah athawng deuh lei paoh kha hawikawm tha ah i serh cio a si ko i, MAH ralhrang hi tei lei kan panh cuahmah ahcun India zong hi kanmah lei arak hoih than khawh mi a si ko. Cucaah India nih kan mah lei arak hoih nak ding ahcun kan thawn le thawn lo ah tampi aa hngat teh lai.

Zei paoh va si aikun; India Cozah le MAH ralhrang pehtlainak hmailei zeidah a lawh teh lai? ti hi India a domi hna north east hriamtlaibu hna hi MAH nih zeitluk indah a play/a hmankhawh hna timi ah tampi aa hngat teh lai. Bia hlei; hawi nih X-mas hmanthlak an tar lul cio lio ah hi bantuk catial hi aa zawn lo kho men. Nain a caan ka nei lio te ah tiah kan hun tenh ta bia a si. Credit: Van Neih Thang