Shan ramkulh thlanglei ah SAC ralhrang le Pa-O National Liberation Army (PNLA) hna karlak kahdohnak thla 2 tluk caan chung ah Pa’O tualchung mi 53 an nunnak a liam i minung 68 nih hliamhma an tuar, tiah Pa’O mino i funtomnak phu (PYO) nih nizan March 26 zan ah an thanh.
Pa’O mahte khuakhan leirelnak hmunram Hopong, Hsihseng le Pinlaung pengchung hna ah 2024, Januray 21 thok in SAC ralhrang le PNLA ralkap hna karlak ah kahdohnak a faak i SAC ralhrang nih cunglei le hriamngan kahdohnak a tuah pinah tlaihkhih in an thah mi hna ruang ah an nunnak a liam hi a si.
Kahdohnak aa thok January 21 in March 23 tiang ah SAC ralhrang nih cunglei kahdohnak voi 444, hriamngan kahnak voi 2252 tiang a tuah ruang ah tualchung mi 31 an nunnak a liam i inn 491 a rawk pinah tualchung mi sing khat leng (104,900) nih khua chuahtaak in an zaam hna, tiah PYO nih a langhter.
“PNLA Chairman Hkun Thurein cu SAC ralhrang nih nawlngeihnak a laak hnu in SAC ralhrang he ramkhel lei ceihmainak kum 3 tluk deng an tuah nain a tlamtlin lo caah hriam tlaih in kahdohnak tu aa thim” tiah 2024, March 24 ah a chim. Lungmili Post