Hellram Nun Cawnpiaktu Thantlang Innlo Ciam
Hellram Nun Cawnpiaktu Thantlang Innlo Ciam
=========
Hellram nun hi, thihlo nunglo in, nganfak taktak in, hremh in, nganfak asi tiah Dr. Luka nih ati. Hellram MEITILI ah tla hi, nungna in, afakbik mi, nganfak intuarnak he khuasa khi asi. Hellram hi zungzal thihnak an ti nain, thih asi lo.
Zungzal kan nung ve nain, zungzal inntuarnak le afakbik mi, hremhnak he asi. Voi hnih thihnak an ti nain, thih ngai ngai khi asi fawn lo. Nungna in tholung tlanh buin, hmarun he, khat buin, vawlei cung, nganfak vialte, adihdongh tiangin, intuar khi asiko. Maw thihnak khoikadah na um tiah, hlamh len zong ah, thihnak nih zam tak asi. Thihlo nung loin, nunchung nganfak tuar khi, Hellram nun.
Ralhrang Rallokap nih, Thantlang khua, an Chimh ning hi, duhsa tein, nganfak ngai ngai in, zungzal intuar hna seh, ti he aa lawh ngai ngai. Kan innlo a kanghut cia mi cu, zeiti awk tha, vawlei cung cu, Pathian nih an kan pe i, a lak than, tiah kan i lungsak i lungcan kan i pe.
Pathian bia in, kan in hnenh i, Hmailei thluachuah, ruahchannak he, kan nung. Sihmansehlaw, ni fatin ti awk in, duhsa tein, Thantlang an khangh lengmang minih, zuunthin a thangh than i, a thar in hmarun kan ing than. Thazang le thisen aderthawm tuk cang mi, Kan Nu Kan Pa le tampi cu, Kan theih lo karah, lunglei zawtnak cu, a thup tein, an rak ngeih hna. Midam lo hna zong. Cucaah Acan lo ah, an kan liam tak mi, an tlawm ve tilo. Anung rih mi, kannih zong, Christmas le kumthar camtuak ah, lung awi dih khawh loin, an kan hrem ve.
Thangthat nak zaihla sak ai ah, lungkawi nak in kan khat i ZION ngai in kan tap theu tawn. Kan ZION Khualipi, ciamhnak kong cu, vawlei tuanbia ah, a um ballo i, hi hnu ah, aum bal ding zong, asi ti lo caah, Pathian min in, philh kan i zuam. Kan i philh deuh cang tinak lakah, nifatin thawng chia nih an kan rulh than tawn. Zuunthin an thar than lengmang ko.
Vawlei tuakdan incun, Thantlang cu a himbik awk asi ti cio asi. Chin Ralkap umnak asi. Camp Victoria nih aa tha lai loh ti cio asi. Pathian riantuan le Pastorte tambik an chuah nak asi. Krifabu founder an tambik nak asi. Ramdang kal an tambik nak asi.
Mifim Cathiam an tam i, Tedim le Falam lei hmanh nih an zenh mi Thantlang peng kan si. Minung mit in a himbawm bik mi Thantlang cu Khalhtu ngeih lo Tuu bantuk kan si diam cang. Kawlram uknak le zung zong ah rengsang an tambik nak asi ko. VP umnak asi. Dr. Lian Hmung Sakhong umnak zong asi.
MAH nih hin duhsa tein hremh le intuar ter hi a planning asi. Christmas le Kumthar lawmhnak le thluachuah kan i pe mi vialte a hrawk dih lai ka ti reng cang kha. Hmailei zong duhsa tein an kan hrem rih lai caah, van hnangam nak tu hal in intuar thiam nun cawn cio usih.
Hellram nun a har ning le a hmual afak lai ning cawnpiaktu sihram sehlaw, Pakhat hmanh baulo tein, Sui Thantlang Fanau vialte, Van Sui Inn ah, Lamhruaitu sihram seh. Amen. Credit: Joseph R. Thang