Chuncung pawng kahdohnak ah CDF Hualngoram ralkap pahnih an nunnak a liam
==============
May 9 Hakha Peng Chuncung khua pawngkam kahdohnak ah CDF Hualngoram ralkap Ramthianhlima le Elsangzela pahnih an nunnak a liam tiah thawng kan theih. Hi kong he pehtlai in CDF Hualngoram tuanvo ngei pakhat nih, “Chuncung in an rak kir lei ah SAC chiah mi bomb an i lamh. Khuachung ah an lut i SAC philh takmi bag an va la.
Bag chung ah bomb an rak chiah i cu ti cun an nunnak a liam hi a si,” tiah The Chin Post ah a chim. March 9 in a rak kaimi SAC ralkap rual 250 renglo hna cu le Chin ralkap CNA, CDFs hna nih lampi thluan an kah hna i May 9 tiangah SAC ralkap a thimi 104 an si cang i hliamtuar in siizung a phanmi 72 an si cang tiah theih a si.
Chin ramkulh, kakip ah kahdohnak a zual ruangah ralhrial in minung 2,546 tiang Hakha an phan cang, tiah IDP(Hakha) in ṭuanvo ngeitu nih a chim. A luancia thla 2 lio khan ralhrial mi an karh ngai. A bik in Kalaymyo le Hakha le Gangaw karlak um khuate hi an tam. Hakha le Kalaymyo kar ummi hna zong ral an hrial hna. Chin Christian University (CCU) ah ralhrial chungkhar 34, milu in 111 an um, tiah theih a si.
“IDP camp ah a um lomi Hakha khua chungah a ummi ralhrial chungkhar 673, milu in 2,546 an si. Camp ah a ummi hna zong kan si khawh chung in kan zohkhenh ko hna. Ralhrialmi an karh chinchin kho men,” tiah IDP Hakha ṭuanvo ngeitu pakhat nih a chim.
Hmunkip kakip in CCU camp ah aa dormi hna cu ṭuanvo ngeitu nih anmah le si khawh chung in an bawmh hna. A bik in eidin facang, chiti le cite tibantuk hi an herh bik. CCU camp ah aa dor lo i anmah tein inn hlang in a ummi hna zong anmah le umnak sang le veng Khrihfabu bu nih min cazin an lak hna i, bawmhnak zong an va pek hna, tiah Chin World nih a ṭial.
Mocha thlichia le ruah fak cu May 8 zan in kawlram hmun cheukhat ah a phan cang i Lairam le Hakha lei zong a phan kho mi a si. Cu thlichia le ruah a sur sual tikah i dornak kong he pehtlai in Main Committee Meeting(BCM) nih, May 9 ah Hakha mizapi nih zulh cio ding biachahnak an tuah.
Mocha thlichia le ruah fak kan ton sual ahcun mincimhnak a chuak khomi a si. Cu ruangah mahle inn pawngkam luti luannak siamremh ding, electric mei a rawk khomi a si caah innchung mei ṭha tein chekhlat ding, dahmei a ṭhami i chiah cio ding le khualtlawn le lengchuah hrial rih dingin nawlngeitu hna nih theihternak an tuah.
Thlichia le ruah fak nih a kan phak sual ahcun HBC, Zion, Agape le Bethel nih mahle darkhing cio tum ding a si lai. Darkhing an tum ahcun mahle umnak sang le veng in aa naihnak bik Biakinn ah i dor dingin BCM nih ralrin peknak an tuah.
Biakinn ah i dor dingin timhtuahnak a ngeimi vialte ca ah Khrihfabu kip motor hmang cio ding in le motor ngei hna nih zanghlei cawi i chuah cio ding in theihternak an tuah. Mocha thlichia cu Cyclone ah aa thleng khomi dirhmun a si caah mizapi cu ralring tein um cio ding in khuacaan tuaktantu hna nih an thanh.
Sagaing ramṭhen, Kalaymyo, Kalay Sianghleirun, Khaikam khua palik sakhan le Kalay sianghleirun luhnak pawngkam ummi hna cu May 10 zinglei suimilam 10:00 hlan ah i ṭhial dingin Chinland Defense Force Siyin nih thawng an thanh hna.
May 10 zing suimilam 10:00 hnu ah aa ṭhial rih lomi tualchung mi hna cu pakhat khat thil poipang a um ahcun ṭuanvo kan in la hna lai lo, tiah an langhter.