Hakha Pawng Ah SAC Nih Jet In Bom An Thlak!
==========
Chin ramkulh, Hakha khua pawnghrawng ah SAC nih vanlawng in bom a thlak i hriamngan zong pehzulh in an puah tiah theih a si. June 3 zinglei sml 3:00am hrawng ah SAC nih Hakha pawng ah Jet vanlawng in bom a thlak hnu ah SAC ralkap pawl nih hriamngan le Rocket pehzulh in an kah tiah theih a si.
“Timit lei kan hriamtlai pawl nam an timh hna i a si kho men. SAC nih Jet vanlawng in bom a rak thlak. Tu sml 8:45am tiang zong hriamngan thawng zong pehzulh in a thang. SAC ralkap pawl nih kan mipi hriamtlai umnak sakhaan pawl nam an timh ṭhan hna i a si kho men” tiah puahkehnak hmunhma he aa naihniam mi pakhat nih The Chinland Post ah a chim. A luancia May thla dongh lei zarh ah SAC ralkap nih biatak tein lungkhar tlang lei ah kahdohnak an tuah caah caan saupi kahdohnak a rak chuak i kaphnih lei in a thi mi zong an tam.
Taingen Khua Cu Mipi Nih A Rannak In Nan Chuahtak Lai Tiah CDF CDM SIYIN Nih Cathanh An Chuah. Chin ramkulh, Tedim peng, Taingen khua cu mipi nih a rianrannak in chuatak ding le a himnak hmun ah ralhrial ding in CDF CDM SIYIN nih June 30 ah cathanh an chuah.
SIYIN hmunram Taingen khua um, SAC ralhrang sakhan ah umhmun a khuarmi ralhrang pawl nih sualnak ngeilo mipi hna cu tlaih in an chek hna i, PDF nan si ti ah an puh hna. SAC ralhrang nih hriamnam he mipi hna cung ah PDF na si tiin sualphawt in ṭhatlonak an tuahmi cu nikhat hnu nikhat a karh chin leng mang caah tualchung mipi vengtu CDF CDM SIYIN nih kan zoh sawhsawh ti hna lai lo, tiah cathanh an chuahmi ah an langhter.
Taingen khua um SAC ralhrang sakhan ah umhmun khuarmi ralhrang pawl nih khual a tlawngmi khuami hna cu mipi ralkap nan si ti ah puh in an tlaihkhihmi hna an um, tiah theih a si.
Sittwe Khuapi Ah AA Nih ALP Party An Kah Hna; Vice President Telh In 3 An Thi. Rakhine ramkulh, Sittwe khuapi tlanglawng lam pawng ah SAC ralhrang he ton biaruahnak a ngeimi Arakan Liberation Party (ALP) Vice President, Battalion Commander le ralkap 1 (An zapi 3) hna cu June 1 ah kahthah an tong, tiah ALP nih June 2 ah fehternak an tuah. Kahthah a tongmi hna cu Arakan Liberation Party, Vice President Hkine Ne Yaung, No.1001 Battalion Commander Hkine Kyaw Myin le ralkap Kyaw Kyaw Nine hna an si, tiah an langhter.
Mah hna 3 hi Rakhine ram ṭhanchonak le thlichia ruang ah harnak tongmi tualchungmi hna bawmchan dingin tonpumhnak an ngei i, an tlun lei ah atu bantuk in Arakan Army (AA) nih an kah hna hi a si, tiah AA hriamtlai an puh hnanak cu cathanh an chuahmi ah an langhter. Arakan Army (AA) nih hikong he pehtlai in lehnak zeihmanh an tuah lo, tiah Tachileik News Agency nih a ṭial ve.
A luancia ni tlawmpal ah Arakan Liberation Party (ALP) cu SAC ralhrang kuttang ramri hngaktu Border Guard Forces (BGF) hriamtlai ah an min an thlen caah atu bantuk in kahdoh an ton hi a si, tiah tualchungmi hna nih an chim. ALP party hi June 26 le 27 lio ah SAC ralhrang he Naypyidaw khuapi ah tonpumhnak an ngei, tiah theih a si.