Tita Pawng Ah Chin Ralkap Le SAC Ralkap An I Kap Cuahmah! SAC Lei In Ralkap A Thimi An Tam!
=================================
Tuzanlei Tita pawng kahdohnak ah SAC lei in ralkap a thimi an tam, tiah theih a si. “Nihin zanlei suimilam 4:30 hrawng ah Tita lei panh in a rak rami SAC ralkap cu kan kah hna i kaphnih kar kahdohnak a fak ngai, SAC ralkap lei in a thimi an tam,
Hakha thlacamnak tlang zong in voi tam ngai hriamngan in a rak kan kah,” tiah kan thawnglaknak Chin ralkap pakhat nih cun a chim. Atu thawng kan ṭial tiang ah kahdohnak a dai rih lo, tiah theih a si.
Sagaing ramṭhen, Khin U nichuahlei Konekyi khua ah zaan a riakmi SAC ralkap nih nizaan July 6, chunhnu ah Laytittaw khua tualchung mi hna umnak inn 3 cu an khanghpiak hna pinah Ar zuatnak hmun 13 ah an khangh i, Ar 40,000 leng an kaang chih, tiah theih a si.
Ar zuatnak hmun an khangh dih hnu ah Konekyi khua nitlak thlanglei Tama khua cu an khangh ṭhan i, inn zeizat a kangh kan thei kho rih lo, tiah tualchung mi nih an chim.
SAC ralkap hna cu Khin U peng i rallam an sial ruangah Laytittaw khua, Konekyi, Tama, Sutat khua in mimung a thong reng lo cu a himnak hmun lei ah an zaam hna, tiah Khin U peng tualchung media nih an langhter.
July 6, zing suimilam 10:00 tluk ah Mizoram laamthiam Nintendo tiah rak theih mi Lalhriatzela, Zuangtui sang ah khua sa mi cu an dum-chung a thlawh lio ah electric mei hri nih a tlaih sual ca ah a nunnak a liam.
Lalhriatzela hi Mizoram laamthiam mi lak ah cun mi nih theih khun mi a si 2016 ah khan Mumbai Hip Hop International India National Qualifiers ah 2 VS 2 All Styles Battle ah a Arunachal a hawipa he Gold MEdal zong an rak lak bal.
2019, khan Indian dance reality show Star Plus Channel timhlamh mi ah Top 32 tiang a rak phan. Mizoram chung dance reality show zuamnak ah a cung bik dir hmun la in Snow Buzzer tiang a rak lak tiah theih asi. 2020, Delhi le Mumbai ah laam cawnnak rak ngei in Singapore laam zuamnak ah India ram aiawh in kal aa tim. A sinain, Covid zawtnak ruang ah an let i Mizoram ah a rak kir ṭhan tiah theih asi.