Hakha le Thantlang caah thawngpang tha taktak lawmpi cio hna u sih.

Hakha le Thantlang caah thawngpang tha taktak lawmpi cio hna u sih.

Hakha-Mann Express (Khualtlawnnak le Kuatphurhnak) a ngeitu Pu Tluang Uk le Pi Sui Tin Hluan nih Hakha le Thantlang mizaw harsa hna thla khat ah minung 10 lengmang, minung pakhat ah tangkafang in Ks. 100,000 lengmang bawmhnak pek ding October thla in bawmhnak an pek cang, tiah kan theih.

Hi mizaw harsa bawmhnak hi Thantlang Peng in thla khat ah minung 5 thim le Hakha Peng in thla khat ah minung 5 thim in bawmhnak pek a si lai. Mizaw harsa nih Hakha khua Hakha-Mann Bus Terminal (car-gate) tuanvo ngeitu hna Phone: 09-890043073 le 09-409704911 ah pehtlai in sok khawh a si lai i mahle Khrihfabu Pastor asiloah khuabawi nih sokpiak le minthutpiak hnu ah sok khawh a si lai, tiah kan theih.

Hi mizaw harsa bawmhnak hi a luancia kum 10 lio ah khan Hakha Senthang Peng in kan rak thawk bal. Relremlonak tete ruang ah kan pehzuul kholo i atu hi kan hun thawk than mi a si. Mizaw harsa hna nih an i thlopnak ah a thahnem lai, tiin saduhthahnak le zawnruahnak he kan timhtuah mi a si. Atu October thla hin kan thawk cang i pehtlaihnak phone number ah pehtlaih le sok khawh a si cang. A sok mi sining kha kan zoh lai i bawmh a herh bik mi kha kan thim lai. Cun, tu thla ah bawmhnak a hmu lo mi zong hmai thla ahcun ruahpiak thiamthiam an si te ko lai,” tiah Hakha-Mann Express ngeitu Pu Tluang Uk nih The Hakha Post ah a chim.

Hi mizaw harsa bawmhnak hi Hakha in a soktu nih Hakha car-gate ah tangka fang hlam khawh a si lai i Thantlang Peng in a soktu nih Thantlang Hakha-Mann car-gate ah hlam khawh a si lai. A soktu nih mahle Khrihfabu Pastor le khuabawi theihpinak ca tial hnu ah soh khawh a si lai, tiah kan theih.

admin

Leave a Reply

Your email address will not be published. Required fields are marked *

error: Content is protected !!