Hakha le Thantlang ah palek a tuanmi Laimi tam deuh cu CDM ah an i tel dih cang

Hakha le Thantlang ah palek a tuanmi Laimi tam deuh cu CDM ah an i tel dih cang, ti a si. Cu kong cu cheukhat nih Fb ah an an tial nain Hakha lam zawh lutlai cheukhat nih an sik hna, media zong an tialter duh hna lo. Palek caah a him lo ee an ti.

Palek pawl nih cun CDM kan lut cang tiah palek lutlai sin ca an pek. A thli tein an tuahmi a si lo. Media nih hhi kong thawng an thanh ruang ah an ca tih a nun hleinak ding ka thei lo, an pu sin ah cazin a um dih ko cu ta. Kan palek pawl tam taktak CDM ah an i tel ve timi hi media nih rak thanh hna sehlaw mipi kan thawng chinchin lai. Ai tel rih lomi zong CDM i tel duhnak lungthin an ngei deuh ve lai ka zumh. A chel ah cun lutlai ai timi cheukhat hi nan i ralrin a luan tuk deuh ko rua, i ralrin cu a tha ko nain a hleiluat tuk in i ralrin belte cu langak bantuk ralchiat tiah Laimi nih cun kan ti.

Hakha ah tuni ralkap uknak kan duh lo tiin lam a zawhmi nan tam taktak, uar nan um tuk. Hruaitu cheukhat nih live thlahnak nawl phih hlah ulaw Myanmar pumpi lawng si loin vawleicung nih an rak zoh ve lai i hmual a ngei chinchin hnga, mah vialte mino thazaang kha live thlah lo cu a pam taktak. Hruaitu nan khuakhan kan upat ngai hna, nain live thlah nan phihmi belte cu nan hriamnam tha bik hmang zia nan thiam rua lo, nanmah hriamnam lila kha hmang loin nan phih tiah ka ruah.

Live thlah hi mizapi caah tih a nung lo, mizapi caah ral vengtu CCTV camera bantuk a si lehlam. Ralkap le palek nih an tih cemmi hriamnam a si. Live thlah ruang ah palek le ralkap nih kan umnak hmun an thei sual lai timi cu a dikmi a si lo. Anmah cu hmunkip ah minung an ngei dih, live zoh loin nan umnak fawi tuk in an thei khawh dih ko. Mino umkal cawlcangh ning zoh in nan i tonnak hmun cu thei khawh colh a si.

Video thlakmi le hmanthlak zong hmual a ngei ve ko, nain live video kha a let in hmual a ngei deuh. Live thlah lawng ah atu acang cuahmah timi zapi nih theih khawh a si. Video hmual a ngei lo deuhnak tette cu Hakha Post nih an thlahmi ah khan hmuh khawh a si, March 3 ti ding kha February 3 tiah an tial palh. Mah bantuk nih hin video cu kan duh ning tluk in hmual a ngeih lo hi a si. Live video cu anmah an hriamnam a si lo, lamzawhtu mipi nan hriamnam a si. Thaizing thawk cun rak hmang than cang u. Credit: Salai Lungthli Tum