Hakha Khuathar BOC pawngkam ah Bomb puahthawng an theih

Hakha Khuathar BOC pawngkam ah Bomb puahthawng an theih
=====
2021 March 27 zinglei sang suimilaam 4:00 tluk Hakha Khuathar BOC le Innwa Bank pawngkam in Bomb puah thawng bantuk a thang tiah pawngkam minung sin in thawng kan theih. “Zinglei suimilaam 4:00 tluk ah a si. A thawng kan theih cu kan lau ngai ve. Bomb a si tak maw si tak lo ti cu kan thei ve lo. Thawng kan theihnak hi ralkap le palek an umnak Innwa Bank pawng hrawng in a si. Zing kan thawh in ralkap le palek nih a kiangkap zong chekhlatnak an tuah dih,” tiah a chim.

March 27 zinglei sang in Hakha khuachung Bogyoke lamthluan, inn karlak lam le hauka gate pawl in ralkap le palek nih aa choklet mi motor, motorcycle le phone pawl zong an chek dih tiah kan theih. Photo/ 2021 March 25 zaan BOC pawng i ralkap le mipi karlak buai lio ah mei an duah mi a si. Credit: The Hakha Post

Mucu Sang ah Saya Ram Hei le Nu Tang Kuai an Tlaih Hna. Tu zaan ah ralkap le palik nih Pyidawtha, Mucu sang ah a ummi Saya Ram Hei le Nu Tang Kuai an tlaih hna. Kiangkap ah a ummi upa pakhat nih, “Mucu sang mino security conghnak an rak nam. Asinain, mino ahohmanh an um ti lo. Inn kutka an bauh thawng a thang tuk. Dawrkhaan zong an bauh i eidin thilri an lak,” tiah a chim.

Security a congtu mino pawl an umnak direct in an rak luh hnawh colh tikah thawngpang a petu (Dalan) an um lai, tiah mipi an lunghring. The Chin Journal