Hakha khuapi chung hriamngan kahnak kong thawngpang update!

Hakha Ah Hriamngan Thawng Pehtlai In A Than Hnuah Helicopter Pakhat A Phan!
=========
Chin ramkulh khualipi Hakha ah nihin November 20 ni ah hriamngan thawng pehtlai in a than hnu caan tlawmpal ah Helicopter pakhat a phan, tiah theih a si.

Hakha ummi pakhat nih, “Nihin zinglei cu kahdohnak thawng kan theih mi cu a um lo nain SAC ralkap nih hriamngan voili nga hrawng an kah. Cu hnu zing sml 9:00 hrawngah SAC ralkap Helicopter pakhat Hakha a phan i, caan tlawmpal a um hnuah a kir ṭhan,” tiah The Chin Post ah a chim.

“Rungtlang SAC ralkap sakhan in hriamngan voi tam ngai an kah. An kah le cangka in vanlawng a zuangmi khu bantukin hriamngan kuan khuvai tampi a chuak. Hriamngan kuan cu Timit tlang let ah a tla i a puah thawng hi Hakha in a thang ngai,” tiah tualchung mi pakhat nih a chim.

SAC ralkap nih nihin November 20 chun zong ah hriamngan an kah i, Biakinn ah ai pumi mipi zong an lau ngaingai caah ṭhutsia rem loin an um, tiah theih a si.

Bomb Puah Sual Ruangah CDF-Paletwa Ralkap Pahnih Hliamhma Fak Ngai An Pu. CDF-Paletwa Battalion 3 in ralkap pahnih cu bomb an ser lio nizan November 19 zanlei sml 2:00 hrawngah bomb a puahsual caah an pahnih in hliamhma fak ngai an pu, asinain an nunnak kong tu ahcun thinphan awk a um lo, tiah CDF-Paletwa nih cathanh an chuah tiah theih a si.

An hliamhma thlopnak ding ca ah tangka tampi a dih ding a si pinah a hlan i hliamhma a rak pu mi ralkap hna zong sii-ai thlopbul an hauh caah sui ngun chawva bawmh ding in CDF-Paletwa nih mizapi sinah bawmhhalnak an tuah.

Ni 5 Chung Kahdohnak Ah SAC Ralhrang 30 Leng An Thi-CNDF Cathanh! Cu cathanh chungah an langhter mi cu, “kum 2022, Sikpar ni (15), Zing slm 5:30 ah CNO/CNDF nih Tibual SAC ralhrang sakhan cu hriamnam ngan, Drone, hriamnam hme he kan kahdoh hna ii SAC ralhrang lei nih hriamnam ngan in voi (3) lehrulhnak an kan tuah than ii slm 3:00 chung kap hnih in kahdohnak fak a chuak.

SAC ralhrang cu fak tuk in phomh an si caah zing lei slm 9:00 hrawngah Jet Fighters in voi (3) bomb an kan thlak. Zaan lei suimilam 6:00 ah a voi 4nak Jet Fighters in an kan kahdoh. A voi 2nak bomb an thlak ah an mah lei Sakhan paawng ah a tla ii inn pa 2 a kaang. A nikhatnak kahdohnak ah SAC ralhrang lei in minung pa 8 an thi. Kan mah CNO/CNDF lei in minung pa 2 nih hliam fak lo an tuar. ZFU/PDF-Zoland, CDM-Siyin le CJDC phufonh hna nih an kan bomh.

Sikpar ni 16, Zing lei ah voikhat, Zing lei slm 02:00 hrawngah voikhat kap hnih in kahdohnak fak piin a chuak ii SAC ralhrang lei an fah tuk caah zaan lei slm 2:55 ah MI-35 Helicopter in minutes 20 chung an kan kah. A voi 2nak kahdohnak ah SAC ralhrang minung pa 5 an thi ii hliamtuar tampi an um. Kan mah CNO/CNDF lei in kan him.

Cu pinah Kalay Myo lei zongah CNDF Tatmaha (1), Tatyin (3) le CDF-KKG phufonh nih SAC ralhrang an va kahdoh hna ii SAC ralhrang lei in minung pa 1 a thih pinah minung pa 1 nih hliamfak a tuar, ti zongin cathanh ah an langhter. Cun Sikpar ni 17, Zing lei slm 9:30 le zaan lei sml 2:00 ah hriamnam ngan he kah hnih in kahdohnak a chuak ii zaan lei slm 3:45 ah SAC ralhrang nih MI-35 Helicopter minutes 45 chung kahdohnak an tuah than.

Cu ni zaan lei ah MEDF nih Drone in bomb tampi he an kan bomh. A voi 3nak kahdohnak ah SAC ralhrang lei in minung pa 6 an thi ii hliamtuar tampi an um ii kan mah CNO/CNDF lei in minung pa 1 nih hliamfak lo a tuar. Sikpar ni 18, zing lei ah CNDF nih SAC ralhrang sakhan cu an kahdoh than ii SAC ralhrang lei nih hriamnam ngan hamng in kahdohnak an tuah than tiah theih a si. A voi 4nak kahdohnak ah SAC ralhrang minung pa 4 an thi ii CNO/CNDF in minung pa 1 cu 60 MM nih a khen sual caah hliamfak lo a tuar, tiah theih a si.

Sikpar ni 19 zing lei slm 5:00 thawk in Tibual sakhan cu laak dingah CNDF nih an kahdoh hmasa hna ii SAC ralhrang lei nih Jet Figter pa (2), Helicopter pa (5) he zing lei slm 10:00 in zaan lei slm 1:00 leng tiang CNDF cu an kah hna, tiah theih a si. Cu kahdohnak ahcun CDF-Lautu nih an bomh hna, tiah theih a si.

SAC ralhrang lei nih Tibual sakhan ah ralkap thazaang an chap ii hliamtuar mi le a thi mi pawl cu Kalay Myo Siizung ah an va khuat hna, tiah theih a si. CNDF nih Tibual sakhan pawng um Bualte khuate ah an kah than hna ii, Cu kahdohnak cu Slm 1:00 leng chung a rau ii SAC ralhrang lei in a tlawmbik minung pa 6 an thi. Cu ni Slm 6:30 hrawngah SAC ralhrang nih Bualte khua inn an khangh piak hna, ti zongin cathanh ahcun an langhter.

Cu ni 5 chung kahdohnak ahcun CNO/CNDF nih Drone in voi 300 leng bomb an thlak hnawh hna ii SAC ralhrang lei in minung 30 leng an thih pinah a thi mi chung in ralbawi deuh zong an i tel, Ti zong in cathanh ahcun an langhter. Credit: Everything

Tibual Kahdohnak Update SAC Ralkap 30 Leng An Thi Cang. Falam peng Tibual kahdohnak ah ni 5 a rau cang (Nov 15, zinglei in Nov 19 zan tiang) i cu chungah SAC ralkap 30 leng an thi cang tiah CNO/CNDF nih nihin Nov 19 ah cathanh an chuah! Tualchung hriamtlai lei in hliam a tuarmi an um hnih khat nain an fak lo tiah theih a si!

Tibual kahdohnak ahhin CDF-Lautu, PDF-Zoland, CDM-Siyin le Mountain Eagle Defense Force (MEDF) nih an bawmh hna!
SAC nih Jet Fighter le Helicopter hmangin vanlei kahdohnak fak piin an tuah buin kan ralkap hna an him khawh hi Pathian kilvennak a si!

Tibual Kahdohnak Ah SAC Ralkap 5 An Hrilh Cang. Falam peng Tibual kahdohnak cu a fak chin lengmang! SAC nih tanglei thazang an chap bantukin vanlei kahdohnak zong biatak tein an tuah! Bawipa nih tualchung hriamtlai hna a kilven hna caah atu tiang hliamtuar le a thimi an um lo.

Nihin November 19 ah tualchung hriamtlai lei nih SAC ralkap 5 an hrilh cang hna tiah theih a si! “Atu tiangah CDF-Lautu nih an kan bawmh. Cun Mountain Eagle Defense Force (MEDF) nih Drone in an kan bawmh i CJDC min in ralkap 10 nih an bawmh” tiah CNDF hruaitu pakhat nih The Chin Post ah a chim.

Raldoh ahhin tangka tampi a dih caah anmah hriamtlai hna lawng rinh loin ramleng lei nih tangka thazang kan chuah ve cio a herh! Tangka a um lo ahcun raldoh khawh a si lo! Hriamnam zenkuan lawng si loin umkalnak le din-ei zongah tangka a dih tuk caah mahle ti khawhtawk cio kan chuah a hau!

SAC Ralkap Nih Raltuknak Vanlawng 7 Hmang In Falam Peng Ah Kahdohnak A Tuah! Chin ramkulh, Falam peng, Tibual khua kiangkap ah SAC ralkap nih Jet Fighter 2 le raltuknak helicopter 5 hmang in nihin November 19 zinglei suimilam 10:00 hrawng in chun suimilam 12:00 tiang tualchung hriamtlai CNDF pawl a kah hna, tiah theih a si.

Tibual SAC ralkap camp ah Helicopter in ralkap thazang 34 a thlak chap hna, tiah theih a si. CNO Spoke person nih cun “ Myanmar ram tuanbia ah a zual bikmi ramchung kahdohnak pakhat a si lai. Ramchung kahdohnak ah hriamnam tha tha hmang in kahdohnak a tuahmi cu kan duh.

Tualchung mipi pawl hliamhma tuarmi an um le um lo kan thei kho rih lo” tiah a chim. SAC raltuknak Jet Fighter le Helicopter hna hi Moneywa le Kalaymyoe in a rak rami an si, tiah tualchungmi nih cun an chim.

SAC Ralkap Pawl Nih Bualte Khua An Khangh! Chin ramkulh, Falam peng Tibual camp thazang chap ding ah SAC ralkap nih Helicopter in ralkap minung 34 a thlakmi hna le CNDF kar kahdohnak a chuak i SAC ralkap pawl nihin zanlei suimilam 6:40 hrawng ah Bualte khua inn an khangh, tiah theih a si. Nihin CNDF le SAC ralkap kar kahdohnak ah a thimi le a hliammi an um le um lo theih a si rih lo.

Camp Victoria Cu SAC Ralkap Helicopter Nih A Vel! CNF/A Headquarter Camp Victoria cu nihin November 19 zinglei suimilam 10:30 hrawng ah SAC ralkap Helicopter nih a vel i a vel dih hnu ah a kir ṭhan, tiah theih a si. Falam peng Tibual camp a kaptu tualchung hriamtlai hna zong SAC ralkap nih Jet Fighter in bomb voi 6 a thlak hna, tiah theih a si.