Hakha khuami hna ca ah ralrin thawngthanhnak

Hakha khuami hna ca ah ralrin thawngthanhnak
=========
Hakha khuasa hna ca ah ralrin awk tete ruahnak peknak cu Public Relation Team nih a tanglei bantuk in nihin, September 27 ah a thanh.

Ralrin Thawngthanhnak; Hakha khua um nule pa ule nau hna- atu hrawng cu khua chung kahdohnak ruangah thinphang thlalau in kan um i mah inn hmanh ah it ngam loin a himdeuhnak chungkhat hawikom sin ah a riakmi kan tam ngaingai cang. Cu lawng siloin zanttim ah innkip milu chek le mi cheukhat tlaih in an kan luhhnawh tik ah kan thin a phang chinchin.

Cucaah hi kong he pehtlai in kan pastorte nih kap hnih tuanvo ngeitu hna he ton biaruahnak ngeih hnu ah a tanglei bantukin thawng kan in thanh hna. 1. CDF cu zapi himnak a ruatmi le zapi caah riantuanmi an si bantukin khuachung ah i kahdohnak cu a si khawh chung in hrial le zapi harnak phakter loding an kan zuampiak lai.

2. SAC ralkap nih khuachung i kahdohnak thok hmasa loding le zapi tlerhkhonhnak, a herh lo ah meithal puahnak tuah lo ding in i chimhchawnh a si caah thinphangtuk le lautuk in um lo ding.

3. SAC ralkap nih innkip ah vah in chungkhar cazin an chek tik ah tihlo tein innka hunpiak i chungkhar milu cazin (အိမ်ထောင်စုစာရင်း) hmuhsak ding. Chungkhar minung le sualnak ngeilo mi an tlaih hna ahcun a tanglei HCMF Tawlrelphu tuanvo ngeitu sinah thawng thanh colh ding. Rev. Dennis Ngun Thawng Mang – 092451062; Rev. Ni Cung Thang – 09421158480; Saya Za Hnin Thang – 09442001362

4. Sang dang le midang inn ah nan va riah a si ahcun chungkhar milu cazin(အိမ်ထောင်စုစာရင်း) le NRC Card (မှတ်ပုံတင်ကတ်) i ken ding. 5. Khua dang in Hakha ah a rak i dormi hna nih chungkhar milu cazin(အိမ်ထောင်စုစာရင်း) ken pin ah pengkulh uknak zung (မြို့နယ်စီမံအုပ်ချုပ်ရေးရုံး) ah khualtlung cazin (ဧည့်စာရင်း) pek ding.

6. Khua dang in siseh Hakha khuachung in siseh Ralhrial le Ralzaam Zohkhenhnak Camp (IDPs Camp) ah um a duhmi hna nih Chin Christian University (CCU) le Chin Christian Fellowship (CCF) i camp tuanvo ngeitu sinah pehtlaih in i dor khawh a si cang. Rev. Dr. Thawng Hlei Thang – 09740813098; Rev. Za Cung Ling – 09420112979; Pastor Sui Mang – 09423661278

7. Inn le lo kan zamtaak tikah mithalo le ral pawl caah caan tha a si i inn le thilri a him lo chinchin caah Hakha khua chuahtaak in khuate lei kalding cu i timh rih loding in kan in sawm fawn hna. Pathian nih khuami pumpak le kan khuapi kan kilvenpiak hram ko seh. Public Relation Team. Source: Hakha Township Public Healthcare & IDPs Management Committee

Hakha Khuapi ဧည့်စာရင်း check ah Ralhrang an rat tik ah: Tuah Dingmi; 1. Nan inn an phak cang ko ahcun tha tein kutka awnh ko. 2. Tha tein bialeh le chimrelnak ngeih ko. 3. အိမ်ထောင်စုစာရင်း kha hal a si tawn caah timhlamh cianak ngeih ah a tha.

4. Phone, Tablet le Computer ah na fimmi hmanthlak le thilri hna kha kilkawi thiamnak ngei cia. 5. Rallokap hi mask an i tuah lo caah Mask i khuh in bia i ruahnak cu tulio Rai in i kham zong a si.

Tuah lo dingmi: 1. Inn kaa awnh duh loin um lo ding. 2. Tih le lau ruangah tliklek lo ding. 3. Thinphan ruangah biachim holhrel i palh lo ding. 4. Halmi hlei in a herh lomi chim i timh lo ding. 5. Chimrelnak ngeih tik caan ah bo le ngal in biachim lo ding.

RALRIN CIO KAN HERH; Rallokap pawl nih ဧည့်စာရင်း an check tik caan ah PHONE kha hramhram zoh piak in Dohthlennak he a pehtlaimi photos a um sual ahcun bia kan in hal ta lai tiin kalpi a si tawn caah ZAPI lei in kan PHONE chung ummi thianhnak kongkau ah daithlan lo ding a si lai.

A biapi ngai mi cu CMDers nih an PHONE ah a hlan an rian tuannak le duhlonak an langhter mi kong hna kha an PHONE an check i a um sual ahcun tleih dingah ral bak mi an si hna. A si khawh ahcun CDMers nan inn pa cio kha ralrinnak pe cio hna uh sih.

Chingchiah: Rallokap cu ralhrang an si caah hriam an i kenmi in mi kip harnak pek ding ah an lung a reng zungzal. Cucaah hmuh le ton sual tik ah launak he tlik le lek tak si loin an kan halmi bia lehnak ah fimkannak ngei cio hna u si.

Thawngthanhnak; Upatmi riantuan hawi hna, Hakha Township IDPs Management Committee min in nan kut kan in tlaih hna. Tulio kan ton cuahmah harnak ruangah Hakha peng khuakip ah siseh Hakha khuachung Khrihfabu kip le sang chung ah siseh aa dormi le fuhpanhtu ralhrial le ralzaam kan unau vialte caah Hakha khuapi timhcia te kan si cang tiah mah le Khrihfabu ah thawng nan kan thanh piak cio nak lai upatnak he zangfak kan in nawl hna.

1. IDPs Camp 1 cu Chin Christian University, Cawbuk ah hun a si cang. 2. September 27, 2021 (Nikhat ni), Zing sml 10:00 ah IDPs Camp 1 ah i dor khawh a si cang. 3. IDPs Camp 1 ah tlunkalnak le fuhpanhnak cu mah he naihniam mi Khrihfabu le sang upa sinah bawmh hal in tawlrel a si lai.

4. Covid-19 zawtnak kongah test ta a duh mi nih Community Care Center & Test Center (No. 3. BEHS) ah rak i test ta khawh a si. 5. Covid-19 positive a si mi ralhrial le ralzaam hna cu IDPs Committee nih tha tein zohkhenh le tirawl lei tuanvo lakpiak an si lai. Contact Persons: 1. Rev. Dr Thawng Hlei Thang- 09740813098, 2. Pastor Sui Mang- 09423661278. Upatnak he, Ni Cung Thang, Implementation Director

Hakha Khuachung Kahdohnak Kongah Mipi Sin Theihternak! 2021 February 1 in ralhrang ralkap nih hriamnam bochan in kan ram ah mipi sin in uknak nawl chuh an kan timh caah dinnak a tanhmi hna nih nihin tiang dohthlennak tuah cuahmah a si. Minung tampi nih ralhrang kut in tukthah, tlaih, hrem le harnak tampi an tong.

Cu bantuk ralhrang hna nih kan ram, kan khua le kan inn chungah sualnak an tuah cuahmah ko cu kan duh hrimhrim lo. Cucaah kan tei hlan tiang a lamkip in kan doh lai.

2021 September 7 zan thok in ngol loin ralhrang nih Hakha khua chungah meithal le bomb an puah i mipi chungin hliamhma an pumi minung tampi an um pinah inn a rawkmi le a kangmi tiang in a hung um. Cu bantuk in mipi umnak khua chungah duh paoh in meithal le bomb puah cu a phung zong a si lo i kan duh hrimhrim lo. Cu bantuk thil tha lo an tuahnak a ruangcu;

1. Mipi zawn a ruat lomi ralhrang misual an si caah a si ko. 2. Mipi nih kan tih hna sehlaw, a kan dohtu pawl zong kham hna seh, thlauh hna sehlaw mipi lakah thinlung theucheunak chuak seh, ti an duh.

3. Dinnak tanh in dohthlennak a tuahmi paoh khua chungah um ngam hna hlah sehlaw, duh paoh in tuah khawhmi lawng taang hna seh, ti an duh. 4. Cuti cun khua chungah an hram fekter i ralhrang uknak thawnter an i timh.

Ralhrang nihcun mipi cu an ral kham ah an hman zungzal. Mipi lakah an um. Mipi lakah an i duup. Mipi thi an dawp. Asinain, mipi lakah meithal le bomb duh paoh in an puah i sualnak a phunphun an tuah. Lih le Hrokhrawl in mithmai an kawl. Nihin Hakha zongah, hrokhrawl in mipi sinah an chimmi cu;

1. Khua chungah an kan kap paoh ahcun mipi nan tuar ko lai. Cucaah khua chungah kan kap hna hlah seh. 2. Cun khuapi le sakhan lak tiang an i timh rih tung lo ahcun ralfir cun khua chungah kah rih lo ah a tha. Cu locun mipi lam nan tem, tiah an ti.

Cu bantuk bia hna cu mipi hlennak an si. Ral cu an umnak ah kah an hau. Cun khuapi le sakhan lak timi cu lam khat lawng a um lo. Hriamnam in a thawng deuhmi ral teinak zong lam khat lawng a um lo. Cucaah lam a phunphun in kan doh hna.

CDF cu mipi covo, nunnak le ngeihchiah a kilvengtu a si bantuk in mipi caah tih a nungmi kahdohnak cu hrial khawh chung kan hrial. Hmailei zongah hrial khawh kan i zuam lai. Hakha khua chungah kahdohnak zong hrial khawh chung kan hrial ko lai. Mipi caah tihnung in cawlcangh ding a herh ahcun theihter le ralrin peknak zong a um te ko lai.

Asinain, caan karlak ah ralhrang lei in a rami kuan, bomb le sual thatlonak kong ahcun tuanvo kan la kho lo. Cucaah mipi ralring tein um uh. Ralhrang le an lei tang pawl zong i ralring u. Mipi caah hnahnawhnak le harnak tuah hlah u.