Hakha kan zamtaak ahcun Chin ram kan Chuahtaak a si lai.

Hakha kan zamtaak ahcun Chin ram kan Chuahtaak a si lai.
==============
Hakha khualipi ah Khua a sami Pi le Pu, Nu le Pa, ule nau vialte hna: Zantin bomb le meithal thawng ruang ah it ngam lole mitkuh vuai lo, thinphang le thlalau in kan um caah khua a phunphun nan ruat cio theu lai tiah zumhnak ka ngei.

Atuhi inn i kan um rih ko ah maw a that lai khuadang ah kan zaam chung ahdah a that lai tiah khuazaza ruat in a tuaktan lomi kan tlawm ko lai. A hlei in Covid in a zawmi le zawtnak dangdang in a dam lomi hna caah lungre a thei khun. Cu leng ah Thantlang bantuk in Hakha hi chuahtaak a hauh ko lai caah atu in i zaam chung ah a tha ko hnga lo maw tiin a ruatmi zong mi tampi kan um cang.

Sihmanhsehlaw Hakha cu Chin ram khualipi မြို့တော် kan si kha philh hlah usi. Khualipi thinlung kan ngeih a herh kha philh hlah usi. Chin ram min phortu, min putu kan sikha hngal camcim usi. Hakha khualipi ummi kan zaam ahcun Chin mi nih Chinram kan chuahtak cang titluk asi lai caah hmailei ah kan fale nih sualphawt mi kan si te hrimhrim lai.
Cucaah kan lung dong rih hlahseh.

Atuhi kan Pastorte, khuanu khuapa, Rual uu, Mino, zatlang phu hna nih kap hnih kap thum chawnhbiak in khua an khan cuahmah liopi a si. A rauh hlan ah hnangam deuh tein thinphang thlalautuk lodeuh tein caan kan hmang kho ko lai tiah zumhnak nganpi kan ngei ko. Nan lung thawng koseh law Bawipa nih in kilveng cio ko hnaseh.

“Kan Khua Kan Zamtaak Lai Maw?” Atu hi Chin ram dihlak ah ral a tho cang. Tuhlan ah CNF/CNA lawng hriam tlai an um nain atu cu hriam tlai CDF cu a pengkip a khuakip ah an um dih cang ti khawh a si. Ni tinte tiawk in kahdohnak thawng theih a si cang. Ralkap pawl zong din loin an cawlcang ve fawn. Asiah Ralkap kan khua an rat tik ah zeitindah kan um lai ? kan zaam lai maw inn ahdah kan um hnga.

Ruahnak cheuhnak: 1. Ralkap pawl nan khua i an luh/ an riah tik ah le an ra lai ti theih poh ah zaam awk asi lem lo. Mah le inn cio teah um awk a si. Pastorte le upa nih a herhmi ngiatthlai awk a si. Upa te nih kan zaam awk asi an ti lawng ah zaamding a si.

2. Khua lak ah/ khua chung ah kahdohnak a um loding cu ralkap nih siseh CDF nih siseh an hrial hrimhrim ko lai. Asinain hrial awk tha loin khua lak le khua pawngte ah an i kahding a si i CDF/ ralkap nih ralrin an in pek hna ahcun zaam hrimhrim ding.

3. Kahdohnak cu aa thawkka lawng asi rih caah khuami nih zaam a herh sual ah tiin zaamnak ding hmunhma i zoh i kawl ciading. Tar le ngakchia he zaam asi lai caah khua he aa hlat tuk lonak ah chikkhat dornak hmun sersiamding. Caansaudeuh zaam a herh ahcun khua he aa naihtuk lo nak ah (IDP) camp serding.

4. Zaam tik ah a cikpak in, mah duhnak cio ah lothaam le ramlak ah zaam awk a si lo. Khakha a him lo chinchin. Cucaah khua upa nih an thim mi zaamnak hmuh (hmun 2-3 zong asi kho) ah a bu tein umding. 5. Ral i kahdohnak ah mipi chung in (civil) a thimi/hma a pumi an um sual ahcun khualipi chung um Ralzaam (IDP) tawlreltu phu asiloah Ambulance nan theihmi sin ah thawngthanh ding.

6. Khualipi Hakha-Falam-Thantlang tbt cu zaamnak kan ngeih hlei lo caah kuan le bomb vakvai nih a kan khen sualnak hngalo inn tang/inn pawng ah i thuh chungnak khur kan ngeih ahcun a tha hnga.

Atulio cu khuabawi tlangpi zong an um lo caah Pastorte le khuanu khuapa nih ral kong ah siseh covid kong ah siseh tuanvo lak le tawlrel i zuam cio hna usi. Hngalh awk: A cunglei ka tialmi hi nan khua caah aa tlak lomi zong a si kho ko zapi caah a tlangpi in ruahnak cheuhnak tu a si. Credit: Rev. Tluang Ceu