Hakha Dawrthar Pu No Val Ralkap nih an tlaih

Hakha Dawrthar Pu No Val Ralkap nih an tlaih
————————————————————————-
Tuzaan (March 24) zaan 10:00 hrawng ah Hakha Dawrthar sang, Hakha Town Coffee dawr hmai Pu No Val cu Ralkap nih an tlaih i an kalpi. Hi kong hi pawngkam a hmutu nu pakhat nih “Atunai suimilaam 10:00 hrawng ah khan an inn hmai ah meithal zuun thum hrawng an puah. An tlaih i an kalpi kan hmuh i zeiruang ah dah a si hnga,” tiah The Hakha Times ah a chim.

Tuzan ah midang zong zeimaw zat an tlaih hna tiah kan theih. Ralrin a herhnak kong he pehtlai in upa pakhat nih “A bik in kan fale hruaitu le rungvengtu deuh hna kha i ralrin le lamzawhnak ah hman mi hriamnam phun poh cu fel tein thuhnawh an hau, tlaitawn ah chiah bak lo ding a si,” tiah a chim.

Hakha lamtonnak pawng ah ralkap le palek nih meithal zuun hnih an puah. Lampawng in datmei in an ceuh, innka an kingh, CCTV pawl an hrawh, tiah pawngkam minung nih an chim. Minung an tlaih mi hna zong an um tiah kan theih.

Ralkap le Palek nih rubber bullets in minung pakhat a baan ah hliamh. March 24, 8:00 PM hrawng in Hakha Khuathar BOC kiang, Innwa Bank le CB Bank (Bank then) hrawng in Golf Club lampial tiang hrawng tear-gas an kah, khairiat-kuan (rubber bullets) in an kah hna i mi pakhat cu a baan hmun thum ah an khen, tiah kan theih. Tlaih mi minung pathum an si lai tiah ruah mi chung in minung 2 cu an thlah cang hna. Chin Oo Sii in Golf Club lampial tiang a himlo, meithal an puah cuahmah, tiah kan theih. Credit: The Hakha Times