BEHS No 3 A Kangmi Kong
=========
Ralhrang cozah nih sal sernak caah Hakha ah an hunmi sianginn BEHS No 3 cu 2023 August 5 zanlei ah a ruang hngalh loin a kang. No 3 inn 5 chungah pakhat dot thum a simi a kang. Cu thil a cangmi nih a langhtermi cu Pathian nih Chin miphun le Chinram hi Ralhrang le miphun dang sal ah tanter a kan sianlonak le luatter a kan timhnak a si.
BEHS No 1, No 2 le No 4 siseh, ralhrang he pehtlaiin a miak a kawlmi private sianginn hna siseh, kan fale sal nun a cawntermi sianginn paoh cu a kang thluahmah rih kho. Ralrin peknak a si. Zeicatiah Pathian thimmi miphun a leirawitu an si.
Ralhrang sianginn ah kan fale kaiter cu khuachia nau-um nu sinah kan fale chiah tluk a si. Cenghnia nu hnuk a ding i cenghngia nu thithruainak tangah a thangmi uico fa cu cenghngia zia hlei zei zia dah a ngeih hnga. Cu bantuk ralhrang khuachia le cenghngia lakin nihin kan fale si hna seh, hmailei ah a ra ding kan fale si hna seh, chanh ding in dothlennak kan tuah cuahmah.
Nu le pa hna ruat than rih tuah u. Min Aung Hlaing le a ralhrang rual nih kan miphun hi sal ah ser an kan timh, kan ram zong an ram ser an timh, a nung Pathian bia loin siasal biakter an kan timh, kan fanu hna an nuchun ah ser an timh, kan tuanbia le nuphung hna hloh in Kawl tuanbia le nunphung an kan cawnter.
Kawl holh thiam loin cathiam khawh a si ti lomi tehna hi nan lung a fak ve lo maw? Kan ram kan khua chungah ralhrang rual an um i an duh paoh in khua an sa, an kan thihphaih, an kan tlaih, an kan hrem, kan zuat satil duh paoh in an thah, kan inn an khangh, kan thil an fir, an kan thahnawn cuahmah lioah an hmaiphiahnak ah thanchonak kan in tuahpiak hna lai, sianginn kan tuah, nan zawtnak kan in thlop hna e,
Mocha thlichia nih a hrawhmi kan in bawmh hna lai e an timi hi kan vok an firmi sa an kan hleh ve mi a si hi nan i fiang lo maw? Kanmah ta an firmi a si zongah a paam anmah lawng ei dih nakcun an kan hlehmi vo khat te cu ei ve ko usih na ti rih ko lai maw?
Na fa zawn ruah ah maw ralhrang sianginn ahcun na kaiter ko lai! Nangmah miaknak ruah ah Tender tuan ko ning na ti rih ko lai maw? Nang nihcun na ruah khawh lo zongah dothlennak nihcun kan cohlang kho lo. Zeicatiah kan ram le miphun kong a si. Kan ram le miphun sal tan lai ruah ah kan celh lo i nunnak thap in ralhrang kan doh cuahmah hih. Hriam na tlaih khawh lo tal ah CDM ralhrang duh lo langhternak tal in rak i tel ve. Hakha Campaign For Justice
Hakha No.3 B.E.H.S A Kaang; Chin ramkulh, Hakha khua ah a um mi No. 3 B.E.H.S a kaang tiah thawng theih a si. August 5 zaanlei sml 6:30pm hrawng ah atu bantuk in No. 3 B.E.H.S a kangh hi a si.
Sianginn kanghnak kong he pehtlai in zeiruang dah a kangh le mi zei nih dah an khangh ti cu a fiang theih a si rih lo caan thawng tling deuh in thanh khawh ṭhan kan rak i zuam lai.
Hakha Pyidawtha sang (HBC Biakinn pawng) No. 3 Siangsangrun (High School) inn nihin August 5 (Nirukni) Zaanlei sang ah a kang tiah kan theih. A kangmi a lang in a cuanmi khuami nih, “A kangh hi zaanlei sml. 5:30 fai hrawng ah si dawh a si, 5:45 ahhin a mei a lio (ngan) tuk cang,” tiah an chim.
A kanghnak a ruang bel hngalh a si rih lo, nain khua mi cheukhat nih, meihri a sawt mi in a si kho men tiah an ruah damh. A kanghnak hmun ah meithat mawtaw zong a phan cang tiah theih a si. A kangmi inn hi a thlanglei bik ummi David Van Bik Building tiah min an pek mi si dawh a si tiah kan theih.
No. 3 High School, Pyidawtha, Hakha cu American Baptist Mission (ABM) Sianginn a rak si i, Ralkap uknak chan lio ah ABM Sianginn cu Cozah nih nawlngeihnak an rak chuh i, caan saupi a rauh hnu ah High School sinak an rak pek mi a si.
Sianginn a kangmi cu an hmih khawh cang tiah khuami sin in kan theih. “a dihlak ningpi cun a mit dih rih lo nain, a tlangpi in a mit ti khawh si. A meici tete lawng a tang cang” tiah kan theih.