Governor Jared Polis Nih Ralrin Nak A Pek Cang Hna

Covid-19 in a sem chinmi, Mutant Covid cu tuchun ah Colorado sate, Ebert County ah kan hmuh caah kan i ralrin taktak a herh tiah governor Jared Polis nih tu zanlei ah a chim. CDC zongah report kan tuah cang a ti. US ah mah zawtnak hi a hmasa bik an hmuhmi a si.

Covid-19 Variant B.1.1.7 timi rungrul hi UK ram ah naite ah an hmuhmi coronavirus a si. A karh a ran tuk caah tihnung ngaimi a si an ti. Covid-19 virus nak in ichonh a fawi chinchin ti a si. Mah zawtnak a ngeimi an hmuhmi pa hi kum 20 hrawng mno a si. Khual tlawngmi a si lo caah zeitindah an chonhning a si timi hi biatak tein an kherhhlai lio a si. UK sii lei thiammi hna nih an chimnak ahcun mah zawtnak hi atu lio Covid-19 khamhnak sii i chunh ahcun ikhamh khawh dawh a si ko” tiah an ti. UK ah mah virus hi an hmuh hmasa bikmi a si caah UK ram ah luh le chuah biatak tein an kham lio a si ve.

Senate Majority leader, McConnell nih President Donald Trump a duhmi le Democrats pawl nih house ah an pass ciami, US$2000 cio bawmhnak pek ding in an chuahpi mi bill cu vote thlak rih lo ding in a kham caah President Donald Trump nih a lungtlin lonak twitter ah a chim.

President Trump nih “Republican party nih thil dik an tuah ding a si ko, $600 hi cu a tlawm tukmi a si, zeiti hmanh in an i za hrimhrim lai lo, $2000 hi approve an tuah hrimhrim ding a si ko, Big tech company (Google, Facebook le Twitter) pawl nih kan ram an fir lo ding le Democrats pawl nih vote an firmi hi kan zoh sawhsawh hna ding a si lo” tiah a tial.

Democrats hruaitu hna nih unanimous consent vote in fehter an duh nain McConnell nih a duh rih lo caah ceihmainak tuah hmasa dawh a si.

Democrats party nih US um tax pekmi, minung pakhat cio nih US $2000 ngah ding in anmah party nih an control mi House (Pyithu hluttaw) ah bill thar an chuahpi i, tu zanlei ah an pass hnu ah Republican nih an control mi Senate (Amyotha huttaw) ah an kuat.

Senate hruaitu hna nih Senate floor ah an chuahpi le chuahpi lo ding a fiang rih lo. An chuahpi hmanh ah an pass lai zumh a um lo. Republican nih $2000 tiangtiang pek ding hi an duh lo, zeicatiah US National leiba hi $27 trillion reng lo a phan cang caah US citizen minung pakhat nih kan ngeihmi leiba hi $220000 renglo cio a si cang caah a si.

President Trump nih cun minung pakhat nih $2000 cio ngah kho ding in congress a fial hna. Senate nih an cohlan ahcun President Trump nih minthut lai tiah zumh a si. Asinain Republican nih an cohlan lai zumh a um lo. Democrats pawl nih hin Republican nih an cohlan lo ding theih ko bu in anmah control mi House (Pyithu hluttaw) ah an chuahpi i an pass mi hi politic ceihnak caah an hmanmi sawsawh a si lai tiah an zumh.

January 4 ah hin Georgia state ah Senate minung pa hnih thimnak a um. Mah ruangah democrats pawl nih hmak laak duh ah bawmhnak $2000 pek ding hi an chuahpi than mi a si lai tiah zumh a si. Republican nih minung pakhat an laak khawh ahcun Senate an control khawh rih lai. A pahnih in an sungh sual ahcun Democrats nih house le senate a control te lai caah tihnung ngai a si.

Trump nih min a thutmi $900 billion chung i a tel cangmi Second Stimulus $600 cio hmuh dingmi kha cu ninga ni (Friday) hrawng ahcun direct deposit in nan bank cio ah a phan lai tiah zumh a si. Credit: Salai Salai Lairamthang