Good News; Vawleicung thawngpang kan theih mi vialte lak ah thawngpang tha bik!!!

Thinlung A Hmui Kho Taktak Mi Kahdohnak Thawngtha Tha Fonh!!
\===============
Karen ramkulh, Kyiaing Seihgyi khua ah SAC Ralkap le PDF kar kahdohnak a chuak i SAC ralkap 40 leng an thi, tiah Lion Battalion Commando Special Force in ralkap pakhat nih a chim.

March ni 15 zanlei suimilam 4:15PM ah Kyiaing Seihgyi peng Magyikalat khua le Kawkamar khua kar ah rallam a sialmi SAC ralkap 200 hrawng cu, Lion Battalion Commando Special Force telh in PDF hna nih an kah hna caah SAC ralkap 40 leng an thi, tiah theih a si.

Zanlei suimilam 4:15PM in zanlei suimilam 6:30PM tiang kahdohnak a chuak i, SAC ralkap 40 leng an ruak cu tiva le khuate ah an kaltak hna pin ah 30 leng hliamhma an pu, tiah theih a si.

Cu kahdohnak ah Lion Battalion Commando Special Force Column, KNU/KNLA | PDF ṭangṭi phu | ARMS (Army Representing Myanmar Society) Drone Force၊ SDDF (Saw Dragon Drone Force) hna i bawm in an kah hna, tiah theih a si.

Hmunram thianhfelnak tuah lio a si caah Kawthulay hmunram um mizapi nih, khualtlawn le umkal ralrin ding in Lion Battalion Commando Special Force nih cathanh an chuah.

Bago ramṭhen, Pyi pengkomh, Paungde peng nichuahlei Bago Roma ah SAC ralkap tilawng 2 cu bomb puahhnawh an ton caah ralkap 5 an thi, tiah PDF Thegon nih cathanh an chuah.

Paungde peng Pingyi tilawng dinhnak in Htankone khua le Chepin khua karah March 17 zing suimilam 9:00AM tluk ah bomb lung 4 in tilawng pakhat cu puahhnawh a tong, tiah theih a si.

“SAC tilawng 2 cu Htankone khua hlun le Chepin khua hlun an kal lioah ralkap 20 tluk a phurtu hnu deuh a kalmi tilawng cu, kan hmanhmi bomb in kan puahhnawh caah ralkap 5 an thi i hliamhma pumi zong an um,” tiah Pyi pengkomh PDF Battalion 3602, Companny 4 TPDF in Companny Commander Bo Soe Htet nih a chim.

SAC ralkap tilawng cu a luancia March ni 10 ah Natalin peng in Bago Roma lei ah an kal i, Paungde peng Theinkone khua ah umhmun an khuar hnu in Macrh ni 17 zinglei ah an chuak ṭhan, tiah theih a si.

Cu kahdohnak ah Teykone peng PDF, Battalion 3602, Companny 4 TPDF, Tatsu 6, Tatseih 16 le Paubgde peng PDF Battalion 3601, Companny 4 hna i bawm in an kah hna, tiah theih a si. A luancia March ni 10 chun suimilam 12:00 tluk ah Paungde peng Thitpauk khua ah a ummi SAC ralkap thawngpetu Aung Win Htey zong TPDF nih an rak fimhlawm cang.

Magway ramṭhen, Myaing peng Well Two Zinan hmun ah a ummi SAC ralkap sakhan cu PDF ṭangṭi phu nih kan va kah caah ralkap 7 an thi, tiah Kyiathitnet phu in Battalion Comander Ohkar nih a chim.

March ni 17 zing suimilam 6:00AM hrawng ah Well Two zinan hmun SAC ralkap sakhan va laak ding in PDF ṭangṭi phu 30 leng nih, an va kah ko nain Jet Fighter 3 nih bomb an thlak caah hnu an kir ṭhan, tiah theih a si.

“SAC ralkap sakhan kan kah hi a voihnihnak a si cang. An sakhan kan laak lai kan ti ko nain Jet Fighter 3 nih an rak bawmh hna caah zanlei suimilam 3:30PM hrawng ah hnu kan kir. Umhmun an khuarnak inn 4 zong kan hrawh piak hna pin ah ralkap 7 kan thah hna, k” tiah Battalion Comander Ohkar nih cun a chim.

Well Two SAC ralkap sakhan cu PDF ṭangṭi phu hna nih, a luancia March ni 9 ah voikhat an rak kah bal cang i, atu hi a voihnihnak an kah a si, tiah theih a si.

Cu kahdohnak ah Myaing peng PDF ṭangṭi phu, Pauk peng PDF, Pale peng PDF, Kani peng PDF hna telh in ṭangṭi phu 30 leng nih an kah hna, tiah theih a si.

Sagaing ramṭhen, Kani le Alaykyun khua kar ah riahcaw chantu SAC ralkap le pyusawhti kah an ton caah 3 an thi, tiah KLG Brigade in ṭuanvo ngeitu pakhat nih a chim.

March ni 18 zing suimilam 8:00AM hrawng ah Kani khua in Alaykyun khua ah riahcaw chanh ding in a kalmi SAC ralkap 70 hrawng cu, PDF nih lamhruang minutes 30 hrawng an kah hna caah SAC ralkap le pyusawhti 3 nak tlawm lo an thi, tiah theih a si.

Cu kahdohnak ah Kyauklonegyi KLG Brigade, Battalion 1, 2, DRPA, Daung le Local PDF hna i bawm in an kah hna, tiah theih a si. Cu ṭhiamṭhiam in Magway ramṭhen, Yesagyo khua ah umhmunn a khuarmi Khah Lay Yah 256 Battalion le 258 Battalion cu March 17 ah Yesagyo Pah Kah Phah le ṭangṭi phu hna nih, drone in bomb lung 8 kan thlakhnawh hna caah SAC ralkap 2 an thi i tam ngai hliamhma an pu, tiah Yesagyo Pah Kah Phah nih an chim.

Cu kahdohnak ah Yesagyo Pah Kah Phah le ṭangṭi phu a simi, Urban Underground Revolution Force – YSO(UURF) Myingyan No.1 Battalion 27 Revolution Force၊Myingyan District Drone Strike ၊ Myingyan No. 3 Battaion, Myingyan pengkomh No. 4 Battalion le Daung Dweni Guerrilla YSO hna i bawm in an kah hna, tiah theih a si.

Sagaing ramṭhen, Shwebo khua luhnak check gate hngaktu pyusawhti nih, khualtlawngmi cu ngunkhuai an khawlh tawn hna caah kah an tong i pyusawhti 2 an thi, tiah Buffalo Soldiers Freedom Force in hruaitu Bo Kyuai Kyi nih a chim.

March ni 17 zing suimilam 11:45AM ah Shwebo-Mandalay lamcung um check gate hngaktu pyusawhti nih, tualchung mi hna cu ngunkhuai an khawlh tawn hna caah Buffalo Soldiers Freedom Force nih an va kah hna, tiah theih a si.

January ni 31 ah pyusawhti cu ralrin an va pek cang ko hna nain an ngaih lo pin ah PDF an cawlcanghnak thawngpang an hlathlai caah kan kah hna, tiah Buffalo Soldiers Freedom Force nih cun an langhter.

SAC ralkap le anmah he aa pehtlaimi paoh cu kan doh peng hna lai, tiah Buffalo Soldiers Freedom Force nih an langhter. Karenni ramkulh le Shan ramkulh Nansan peng ah hram a bunhmi SAC ke ralkap Khah Lah Yah 247 Battalion ralkap cu March 14 ah Pekhon le Karenni ramkulh ah raltuk dingin ṭuanvo pek an si i, raltuk duh loin SAC ralbawi major 1 le ralkap 2 an zaam, tiah theih a si.

“Pekhon ah ralhmai kal in raltuknak ah thih kan duh lo. Kan rank zong zeihmanh santlaihnak a ngei lo an ti i an zaam,” tiah naihniammi nih an chim. Chin ramkulh, Kachin ramkulh, Karenni ramkulh, Sagaing ramṭhen le Magway ramṭhen ah kahdohnak a zual caah SAC ralkap cheukhat cu raltuk huam ti loin a zaammi an tam, tiah theih a si. Crd-The Chin Post