Good News; US nih Ukraine cu ralthuam milliom tam tuk man an pek chap lai!
US Nih $800 Million Leng Ralthuam Ukraine A Pek Chap Lai!
==========
Russia nih Ukraine nichuahlei le thlanglei hna cu biatakte in a tuk ṭhan caah US President Joe Biden nih cun Ukraine nih amah aa kham khawhnak ding caah $800 Million man ralthuam a pek chap lai, tiah a chim. Atu tan US nih ralthuam bawmhnak a pek ding mi ah hin Miakpi (artillery), ralhriam phortu motor ngan le helicopter hna an i tel lai, tiah nizan April 13 ah President Biden nih a thanh.
Atu tan ralthuam a phan thar ding pawl hi cuhlan nakin hmual a ngei deuh mi an si lai. Russia nih Ukraine a tuk lio ah US le a ṭanrualpi ram hna nih cun pehtlai tein ralthuam bawmhnak kan pek peng i, Ukraine ca zong ah santlai ngai a si, tiah President Biden nih cun a chim.
US le Europe ram hna nih Russia phihkharnak, Sii-ai le ralthuam hme hna in an bawmh tuk ko nain Ukraine president Zelenskyy nih Russia dohlet nak ah a zat lo kong a chim i, UN le NATO sinah ralthuam ngan bawmhnak a rak hal i, US nih Ukraine lehnak ah $ 800 million man ralthuam in bawmhnak a pek colh.
Atu tan bawmhnak he hin cun, February 24 Russia nih Ukraine a tuk hnu in, US nih Ukraine bawmhnak a pek mi cu $ 2.4 billion man leng a si cang lai. “Atu tan US nih ralthuam a pek ding mi hi phundang deuh an si caah Ukraine ralkap nih a tawnghtham training tlawmpal an ngeih a hau lai,” tiah pentagon chimphuannak nawlngeitu John Kirby nih a chim.
Biden nih Ukraine ralthuam bawmhnak a pek ding kong a thanh hlan, nizan tihni cawn nithum ni ah khan, President Biden nih Russia President Vladimir Putin cawlcang ning cu Miphunpi cihmih lainawnnak(genocide) a si i, Ukraine mipi an ci hmih dih aa tim, tiah President Putin kong cu a chim. Hilio ah Kremlin Chimphuannak nawlngeitu Dmitry Peskov nih cun, “President Biden biachim cu Russia caah cohlan a harsa ngai mi bia a si,” tiah a chim ve.
Russia President Putin Ukraine ram cu kan tei hrimhrim Lai! Ukraine Operation kan tei hrim lai tiah Russia President nih a chim. Russia President Vladimir Putin nih Moscow nih aa tinhmi le Ukraine Operation cu kan tei hrimhrim lai tiah a chim.
Ukraine Operation ṭha tein tuah khawhnak ding caah Belarus President Alexsandr Lukashenko he biaruah ding in Russia President Vladimir Putin cu Amoeba a phan lio April 12 ah a chim. Mi ram tuk a duhmi hruaitu 2 cu Russia Cosmonautics Day an tuahnak Vostochny Cosmodrome ah an kal.
Russia Cosmonautics Day hi 1961 ah Soviet Astronaut Yiri Gagarin nih Space ah a voikhatnak bik a zuan ni a si.
President Putin nih “Russia ram him tein khamnak ding caah raltuknak dah ti lo a dang thim awk a um lo, Nitlak lei phu nih Moscow a mah te lawng umding in an tuahnak pakpalawng a si hi Russia nih Space lei teinak a hmuhmi hi tette an si” tiah a chim.
Cun, Ukraine Buchara khua ah Russia ralkap nih miphunning in thahnak (Genocide) an tuah tiah puh a simi hi Nitlak lei phu nih thawngpang dik lo an thlahmi a si tiah a chim.
Russia Ral Doh Ding In Zelenskyy Nih Ukraine Mipi A Forh Ṭhan Hna! Russia ralkap hna nih Kiev khuapi an kirtak hnu in Ukraime nichuahlei le thlaklei cu biatak tein a vun kah hoi ṭhan caah Ukraine President Volodymyr Zelenskyy nih cun Ukraine ralkap le mipi hna cu Russia ral doh ding i timhcia tein um ding in a forhfial hna.
Russia ral a lianh chin lengmang lio ah Zelenskyy nih cun ramleng bawmhnak zong biatak tein a kawl cuahmah ve i, UK zong nih nai ah bawmhnak zeimawzat a pek. A ra lai mi zarh ah hin Russia nih biatak tein Ukraine cu a nam ṭhan lai, tiah biachokvai a leng i Ukraine mizapi cu timhcia tein um ding in Zelenskyy nih a cah colh hna.
Nizan April 11 ah khan Austria Chancellor Karl Nehammer nih cun, February 24 i Russia nih Ukraine a tuk hnu a voikhatnak ah, President Putin cu Moscow ah a va ton. Russia nih Ukraine tuk hnu ah Ukraine mipi nuai 11 leng cu umnak ngei lo in hmun kip ah an zaam hna i, civil mi nunnak tam tuk a liam cang.
Nizan April 10 Zarhpi Ni ah khan Russia nih Ukraine khuapi pakhat Dnipro Airport cu rawk dihlak in a kah ṭhan, tiah Al Jazeera nih a ṭial. Dnipro khuapi hi Dnieper tipi nel ah a um mi a si i, Ukraine ram i thilri serchuahnak (indusrial) hmunpi pakhat a si.
Central Dnipro ramṭhen Governor Valentyn Reznichchenko nih cun, “Russia lei in missile kah kan tong ṭhan i, kan khuapi Airport cu rawk dihlak in an kah; a zei taktak hmanh a taang ti lo. Russia missile pawl cu atu le tu van ah an zuang peng ko,” tiah nizan zarhpi ni ah a chim. Russia missile nih cun Povlorad District i inn pakhat zong a khen caah mibawmchantu 5 hliam an tuar i, innchung thilri tampi an rawk.
Russia ralkap lei nih missile an kahnak kong he pehtlai in thawng an thanh colh ve i, Zonetsky khuapi ah Ukrainian ralhriam chiahnak hmunpi pakhat cu rawk dihlak in an kah kong an langhter. “Hi Ukraine ralhriam hmunpi kan kah mi ah hin ramleng in ralhriam bawmhnak an hmuh mi tampi zong an i tel,” tiah an chim.
Nizan Zarhpi ni ah khan Ukraine President Volodymyr Zelenskyy nih cun, “Germany Chanchellor Olaf Scholz he Russia ram chuak gas phihkhar kong kan ceih,” tiah twitter ah a ṭial. Sinain Germany lei nih cun Russia gas phihkhar kong ah biafang zeihmanh an thanh rih lo.
Russia nih Ukraine a tuk hnu in Germany nih Russia sin ah oil a cawk mi 35%(zatuak ah sawmthum panga) cu 25% in a niamter cang. Germany hi Russia oil a cawtu ram ngan pakhat a si caah Russia phihkharnak a tuah ahcun Russia ca ah sungzawtlaknak nganpi a si kho. Sinain Germany nih Russia oil phihkhar a duh ahcun ramdang in oil laknak ding le a herhhai mi thilri tampi a zalh hmasa a hau lai.
Ukraine khualipi Kiev pawng Bozova khuate ah Ukraine civil mi a tomtom in an phum hna nak thlankhur pakhat April 9 ah kan hmuh ṭhan, tiah Ukraine nawlngeitu pakhat nih a chim. Hi hmun hi Russia ralkap nih an lak i zarhkhat hrawng umhmun an khuar hnu ah an chuahtak mi hmun a si, tiah a chim chih.
Mithi ruak pawl hi Datsi (petrol) dawr kam lutihor(tiluhor) kuang ah kan hmuh hna i Bozova khua le a dang khuate komh in khuatekomh ukbawi a ṭuantu Terres Didich nih a chim i, miruak zeizat si ti hngalh a si rih lo, tiah a chim chap.
April thla thok hrawng ah khan Bozova khuachung le a pawngkam hrawng ah mithi ruak 30 hrawng an rak char bal cang tiah Ukraine media pawl nih am langhter. Atu ah cun Russia ralkap kut in Kiev khuapi kam hmunhma khuapi le khuate hna cu Ukraine ralkap kut a phan ṭhan cang.
Cu hmun hrawng ah cun Civil mi ruak a tomtom in an phum hnanak hmun/ thlan an hmuh pah lengmang caah ram kip nih iRussia mawh an chiat. A hlei in Bucha khuapi ah civil ruak tamtuk hmuh a sinak kong ah Russia cu ramkip nih fak piin mawh an chiat. Credit: The Chin Post