Good News A Hnu Bik Thawngpang Update-Bawipa a tha tuk e; Kan pasaltha le himnak lam lei an panh e!!

Tuni Ah CNA+ CDF Pasaltha Hna Nih SAC Ralkap Minung (14) An Tha Hna Leng Ah Meithal (7) An Laak Chap Rih
=========
Nihin “Timit Operation” ah kan ralkap hna le Kawl ralhrang hna suimilam 7 chung ikahdohnak cu a faak hringhran. Ralhrang hna nih tanglei in an tei hna lo caah, Vanlawng le Helicopter in bomb he mechineguns he a pehpeh in an thuat hna.

Rungtlang in cat loin hriam-ngan in an kah chap hna. Chunnitlak ei thiamlo, um thiamlo thin domhbu in zeidah an lawh hnga tiin updates zoh cio asi. Tuni Timit kahdohnak ralhrang 14 an thah khawh leng ah meithal 7 an lak khawh fawn.

Sihmanhsehlaw; kan ralkap hna cu Huhphengtu kan Pathian nih a thladem in a humzual hna cu hmuh khawh asi. Nihin cu kan ralkap hna nih hlawhtlinnak ngaingai an kan hmuhpiak.

Kan pasaltha hna caah thlacamnak in siseh, pekchanhnak leiin tanpi peng ko hna usih. Ikahdohnak kong hi ka tial ballo, tuzan cu kailawmhtuk caah ka hun isum kholo.

November 21, Hakha le Thantlang kar Timit kahdohnak ah miphun ralkap hna nih SAC ralkap hriamthil zeimawzat an laak khawh tiah theih a si.

Miphun ralkap nih hriamthil an lak mi lak ah kan theih khawh tawk cu MA 1(1), MA 2 (1), MA 3(1), Machine gun(1) le kuan thongkhat renglo a si.

Kaphnih kar kahdohnak ah a thimi le ai hliammi zeizatdah an si timi tucu theihfian khawh a si rih lo tiah theih a si.

KNLA Phufonh Nih Taungkalay Palik Sakhan Le Kada Palik Sakhan An Kah, SAC Ralkap 10 Nak Tlawmlo An Thih Hleiah Hriamthil Zeimawzat An Lak, KNU brigade 6, hmunhma Kyaitmayaw peng Taungkalay palik sakhan le Kada palik sakhan hna cu KNLA phufonh nih nihin zinglei ah an kah hna caah SAC ralkap lei a thi mi an um leng ah, hriamthil zong kan lakpiak hna tiah Kyainnsaitkyi peng tualchung hriamtlai pah-ah-phah nih cathanh an chuah.

November 21, zinglei in SAC ralkap palik sakhan um SAC ralkap hna cu kahdoh an ton ca ah SAC ralkap lei nih van lei kahdohnak le hriamngan he an bawmh hna tiah theih a si. “Tualchung mi minung 10 leng hliam an tuar, inn 10 leng hriamngan ruangah a kaang.

SAC ralkap sakhan laknak hmun ah ruak 10, 60mm pakhat, hriamhme 9, kuan 1000 leng lak a si” tiah tualchung hriamtlai pah-kah-phah nih an thanh. SAC ralkap hna nih tualchung mi hna cu ral nan zaamnak hmun in inn lei nan kir than lo a si ah cun nan inn kan in khanghpiak hna lai tiah an tlerhkhonh hna tiah theih a si.

Wetlet Peng Ah SAC Ralkap Le Tualchung Hriamtlai Phu Kar Kahdohnak Ah SAC Ralkap 11 An Thi, Sagaing ramṭhen, Wetlet peng ah SAC ralkap hna cu tualchung hriamtlai phu nih an kahdoh hna caah kaphnih kar kahdohnak a chuak i SAC ralkap 11 an thi tiah tualchung hriamtlai phu lei nih cathanh an chuah.

November 19, zaan suimilam 9:00 hrawng ah Wetlet peng Hladaw khua ah hrambunh in umhmun khuarmi SAC ralkap hna cu tualchung hriamtlai phu hna nih kut ser bomb 60mm, 90mm hmang in an kahdoh hna caah SAC ralkap pakhat a thi i hliamhma tuar an tam tiah Depeyin nih nihin November 21 ah cathanh an chuah.

November 20, chunhnu ah Wetlet peng Khawtaw lei ah motor pakhat he a chuakmi SAC ralkap minung thazaang 35 cu Khawtaw khua ni chuahlei ah pa-de-ta bomb lung 6 puahhnawh in kan doh hna tiah People’s Army To Fight Dictatorship(PAFD) nih theihternak an tuah. Cu kahdohnak ah cun SAC ralkap 10 an thi, hliamhma tuar an tam tiah an thanhmi ah cun an langhter. SAC ralkap hna cu PAFD Wetlet, Bu Hlaing Bua tat-khuai DK PDF (MMU), People’s knight Defense Force Myinmu (PKDF-MMU), TAUNGTHA PDF (TTAPDF) le D.B.B.F-MMU phufonh nih an doh hna tiah theih a si.

SAC Ralkap Hmual Ngei Deuh In Doh Khawhnak Ding Ca Ah Asia Defense Force Le Yaw Revolution Army An I Fonh , Magway ramṭhen, Htilin peng ah SAC ralkap hmual ngei deuh in le fak deuh in doh khawhnak ding ca ah Asia Defence Force (ADF) he kan i fonh cang, tiah Yaw Revolution Army (YRA) chimphuannak nawlngeitu nih nihin November 21 ah a chim.

Htilin peng ah fek tein kan dir lai i SAC ralkap fak piin kan doh hna lai timi kan hmuitinh an cohlan ve hnuah Asia Defence Force (ADF) nih an ralkap phu cu an hrawh i hmun khat ah kan i fonh cang, tiah a chim chap. Asia Defence Force (ADF) cu 2022 Febuary 14 ah rak dirhmi SAC ralkap a dotu phu pakhat a si.

Asia Defence Force (ADF) nih Yaw Revolution Army he hmunkhat ah i fonh ding in an cohlanmi hi lunglawmh awk ngaingai a si. SAC ralkap kan dohnak lamthluan ah hmual ngei deuh in kahdohnak tuah kan i zuam lai, tiah YRF chimphuannak nawlngeitu nih cun a chim. Atu kar hrawng hi Yaw hmunram Htilin peng ah SAC ralkap 100 hrawng nih Htilin khua nichuahlei ah rallam an sial, tiah theih a si.

Kalaymyo ah SAC ralkap he kahdohnak a zual ngai caah Tamu motor lampi ah mizeihmanh umkal rih lo dingin Kalay Peng PDF in ṭuanvo ngeitu pakhat nih a chim. “Kalaymyo khua chungah SAC ralkap he kan i pehtlaih ning a ṭhat lo tuk caah Kalay-Tamu motor lampi cu, November 20 thawk in a hohmanh umkal khawh a si ti lai lo. Nawl kan chuahmi nan zulh lo i, harnak pakhat khat nan ton ahcun a herh ning in ṭuanvo kan in lak hna lai, tiah Kalay PDF nih cathanh an chuah.

Kalay-Tamu motor lampi cu a luancia November 13-19 tiang umkal an rak kham i, SAC ralkap nih an hriamnam hna cu tualchung mi motor 14 hmangin India le Myanmar rammi lei Hto Ma in Kalay khua chungah luhpi an timh, tiah PDF Battalion 3 in ṭuanvo ngeitu nih a chim.
India ram in SAC ralkap hriamnam luhpi dingah Kalay-Tamu lampi hman an timh caah PDF ṭangṭi phu hna nih kham ding in an bawh hna, tiah theih a si.

Qatar ram ah tuahmi World Cup 2022 ah hraipi a thlir khotu tiah zumh bikmi ram 4 an um. Cu hna cu Brazil, Argentina, Germany le France hna an si. Hi ram 4 chungah Brazil le Argentina hi an zumh bik rih hna. Hi ram 4 chungin hraipi an thlir lo ahcun England, Belgium, Netherland le Spain in pakhat khat nih an thlir lai ti a si.

Brazil in Neymar nih cun “World Cup hi khuaruahhar thil in a khat ko. Zeirel lem lomi ram hmete te zong an ṭhawng ngai tawn. Atu tiangah Argentina, Germany, France le Spain hi an zumh ngai hna i anmah chungin pakhat khat le kanmah Brazil hi pakhatnak kan i cuh te ko lai” tiah a chim.

Brazil nih World Cup ah voi 5 teinak hraipi an thlir cang. Asinain hraipi an thlir khawh lonak kum 20 a rau cang. Tukum ah cun thlir tengteng dingin an i tim. Brazil hi minung an tling, an i ruang, mino an tam. Tukum i minung an i chiah ning zoh tikah hmaikal (striker) lei an ṭhawnter ngaingai ti a lang.

An minung zoh tikah Argentina nakin zumh an um deuh tiah sport lei cabia a ṭial tawntu Ko Hein Thant nih cun a chim. Brazil hi Spain, Germany le Portugee hna he Group-G ah an um hna. World Cup tuanbia ah Brazil hi voi 22 an i tel i 1958, 1962, 1970, 1994 le 2002 ah hraipi an rak thlir bal. Puai (match) 109 an i celh i voi 73 an tei, voi 18 an i tluk i voi 18 an sung.

Cheukhat nih cun Brazil nakin Argentina an zumh deuh ve. A ruang cu tutan hi mino le upa deuh an i cawh i an ke aa ruang. Cu pinah tukum World Cup hi Messi caah a donghnak a si lai, 2026 ah cun a chuih kho ti lem lai lo. Messi nih bawlung he aa pehtlaimi minṭhatnak le laksawng a hmuh dih cang. World Cup hraipi thlir ding lawng a taang. Cucu Messi hruaimi Argentina team nih a tak in tlinter an i zuam lai.

Cun an hotu (coach) Lionel Scaloni hi a men lo. Copa America zongah teinak a hmuhpi cang hna.
Argentina cu Saudi Arabia, Mexico le Poland hna he Group-C ah an um i Group dirhmun ah Brazil nakin an ṭha deuh ti khawh a si.

Chin Ralkap phu Komh (CNDF, CJDC, MEDF, CDM Siyin, ZFU, CDF Lautu) le Rallokap hna, Tibual Dohnak ah Ralhrang nih Raltuknak Vanlawng 7 an hman. EAOs he Raldohnak hmanh ah Vanlawng 7 an hman bal lo. Cucaah Tibual Rallokap Sakhan cu kan kal tak awk asi ko. A hnu ah kan I zuam ṭhan lai, nan thachia hlah uh. Vanlawng 7 taitai in tuk cu, Kawlram ah, a pah chih ngam mi Hriamtlai an um rih lai lo. Hmailei zong ah an um lai lo. Amak ngai mi Vanlawng kahnak ngeih ahcun Phundang. Voi 300 reng lo bomb thlak hnawh asi rih.

Tindan kai lo in Puahceh in Rallokap kap hmasat tu cu Mindat Chin kan si. Mindat Chin Mino nih Rallokap an kah hmasat hnu ah Paucan Dohthlennak ah hriamnam in dohnak aa thawk tiah Tuanbia thar kan rak tial cang. CDM chan, Dai tein duhnak langhter in Sandah piah lio ah Rallokap nih meithal in an kan kah caah, a kap hmasat tu cu CHINMI kansi. Kalay Kabaw um Chinmi nih CDM tan ah Rallokap an kap hmasat hna tiah tuanbia kan ṭial cang. Tibual war ah kan ṭial mi hi voithumnak asi.

CNDF le SAC dohnak asi ko nain, CHIN MI nih kan va bawmh dih hna. CDF dang zong bawmh ding in Ready le Standby kan si (CNO / CNDF Spokesmen Salai Cung Ngai le Mizzima Interview). Vomkhuai thih kaw, hngalhriang a hnak a fak timi Chin Tuanbia roling a tling. Hmai lei I sum hlah uh, hi nan zia hi, Chimmi dam ternak le pumkhat sinak asi. Phunkhat Laitlai pumkhat si khawh lo rai asi lo. Pumkhat siter khawh lo tu Lungthin, Policy, minung kha kaltak cang hna usih.

CJDC nih minung le hriamnam he an bawmh hna. CNA hruainak in asi ko. CNA ah pumkhat si khawh lo bantukin kan hmuh ko hna nain thihnak le nunnak karlak ahcun pumkhat si tawn asi ko. Politicians rual le Kaphnih upa hna nih tlangtla ahcun, CNDF/ CDF Mindat, MDF, tbk hi CNA he hmunkhat / pumkhat sinak lam aum tiah Tibual Raldohnak nih an kan cawnpiak.

CNA ah Oneness bantukin pumkhat an si khawh lo hmanh ah Trinity (Thumkomh Pathian) ning in pumkhat an si khawh rih. Trinity ning in pumkhat siter hi kan bang khawh thil asi lo, kan ngakchia rih, kan kokek sining nih a ngeih mi asi cang. Oneness Theory in pumkhat sinak cu kan hlawhtlin lai lo, kal tak cang ko usih.

Raltuknak Vanlawng pakhat an hmang ah $ nuai 2 leng a dih. Kawlram Phaisa in nuai 5000 a dih. Vanlawng 7 caah nuai nuai 35000 a dih. Hmai lei ah hi tluk phaisa dih in dohnak an ngeih ti lo khawh men. Cucaah kan tei deng hna, Zubui mei can lawng aa duh tiah Chin Dr Pa nih a ti mi kha asi cuh. Phaisa tampi dih lo le Vanlawng 7 leng loin tei khawh ding asi lomi CHIN Miphun kan si nak tehte asi. Pumkhat si chin usih law, an kan tih lai i, raldoh hlan hmanh ah kan tei hna hnga?

Chin ramkulh ah SAC ralkap le Chin ralkap kar kahdohnak a chuak i, SAC ralkap nih Jet Fighter hmang in ni 5 chung kahdohnak an tuah, tiah theih a si. Chin ramkulh, Tibual SAC ralkap sakhan cu drone in voi 300 leng bomb in kan thlakhnawh caah SAC ralkap 30 hrawng an thi, tiah CNO/CNDF nih cathanh an chuah.

A luancia November 15 zing sml 5:30 ah CNDF nih Tibual SAC ralkap sakhan cu hrianngan, hriamhme le drone in an kah caah kahhnih kar kahdohnak sml 3:00 chung a rak chuak, tiah theih a si. Zing sml 9:00 hrawng in Jet Fighter nih bomb voi 3 le zanlei sml 6:00 hrawngah voi 4 a thlak. A voihnihnak an thlak bomb ruangah SAC ralkap sakhan pawng ummi inn 2 a kaang. November 15 kahdohnak ah SAC ralkap 8 hrawng an thi, tiah theih a si.

Cu kahdohnak ah ZFU/PDF-Zoland, CDM-Siyin le Chin hriamtlai phu fonh CJDC zong nih an bawmh hna, tiah theih a si. November 16 zinglei siseh, zanlei sml 2:00 hrawngah siseh kaphnih kar kahdohnak a zual ṭhan i, zanlei sml 2:55 ah Mi- 35 vanlawng in minutes 20 tluk a rak kah hna. Cu ni kahdohnak ah Chin hriamtlai phu hna nih SAC ralkap 5 an thah hna tiah theih a si.

November 17 zing sml 9:30 le zanlei sml 2:00 hrawngah kaphnih kar kahdohnak a chuak ṭhan i, Mi-35 vanlawng hmang in minutes 45 tluk a rak kah than hna. Zaan ah ṭangṭi phu a si mi MEDF nih drone in bomb an thlak caah SAC ralkap 6 an thi, hliamhma pumi zong an tam, tiah theih a si. November 18 zinglei ah CNDF nih SAC ralkap sakhan cu hriamngan in an kah ṭhan caah SAC ralkap 4 an thi chap.

Cun nizan November 19 zing sml 5:00 hrawngah Tibual SAC ralkap sakhan cu, CNDF nih an kah ṭhan i CDF-Lautu zong nih an rak bawmh ve hna. SAC ralkap Jet Fighter 2 le raltuknak Helicopter 3 nih Tibual sakhan um ralkap pawl cu an bawmh ve hna pinah ralkap thazaang an rak chap, cun SAC ralkap a thimi ruak le aa hliammi hna cu Helicopter in Kalaymyo sii-inn ah an kalpi hna, tiah theih a si. Cuni zanlei sml 5:00 hrawngah Tibual SAC ralkap bawmh ding in vanlawng nih a rak thlakmi ralkap hna cu, CNDF nih Bualte khua ah lamhruang in an kah ṭhan hna caah SAC ralkap 6 an thi, cu hnuah SAC ralkap nih Bualte khua cu an khangh, tiah theih a si.

Tanintharyi ramṭhen, Launglung (လောင်းလုံး) khuapi chung ah cycle aa citmi mino hna cu ralhrang nih a ruang um lo in an kah hna ca ah kum 14 ngakchia telh in minung 2 an thi thiah theih a si. Sikpar 20, chun hnu ah Launglung khuapi Siizung pi pawng i mi a check tu ralhrang hna nih a tu bantuk in cycle aa citmi mino hna an kah hna i an tlaih hna hi a si tiah theih a si.

Sikpar 20, zaanlei sml 2:00 hrawng ah min theih lo mino pakhat ralhrang nih kah ruang ah a nunnak a liam. Pakhat zong ralhrang hna nih faak tuk in an tulhvelh hnu ah an tlaih tiah theih a si. Cu an kahnak ruang ah cun cycle aa cit ṭi mi ṭafar zong an khen chih hna. A ṭa Aung Wai Yan (kum 14) a nunnak a liam i a far Yoon Pyih Tarzin cu hliam hma a tuar tiah theih a si.

Chin ramkulh, Paletwa peng, Sami khua pawng i Bungwa khua mi Pu Mung Yu (Kum 37) cu Sikpar 19 zinglei ram a vah lio ah bomb (မိုင်း) aa lamh sual i a ke pa hnih ning in a bul tiah theih a si. A orhlei ke cu a bul, a kehlei ke zong hi a man dih tiah a bawmtu pakhat nih a chim. Aa khawn bak in Paletwa ah an kal pi colh, cun Sikpar 20 ah Sittwe lanhpi ding in an timh tuah tiah theih a si.