CDF-Hakha Nih SAC Ralhrang Kuttang Palik Bo-2 An Tlaih. Hramhram in nawlngeihnak a latu SAC ralhrang kuttang palik bo-2 Kyaw Lin Oo cu CDF-Hakha nih 2024, March 24 ah kan tlaih, tiah Chinland Defense Force – Hakha nih nihin March 26 ah an thanh.
Nizan 2024 March 25 ah Chinram khualipi, Hakha khuachung ah kahdoh cawlcanghnak um loin SAC ralhrang nih Hakha pengkomh palik zungin hriamngan mizapi lei hoih in duh paoh an kah caah tualchung mi 1 nunnak a liam i ngakchia 2 telh in tualchung mi 4 nih hliamhma an tuar, tiah an langhter.
Mizapi nawlngeihnak hramhram chuh lawng siloin mizapi cungah duhpaoh a kan tuahtu SAC ralhrang nakin a chiakha deuh mi an um ti lai lo. Cubantuk ralhrang hna kan ram chung in ṭhio/hloh ding ah kan ṭuan cuahmah rih lai, kan doh cuahmah rih hna lai. Cucaah reltei a duh mi kan miphun hawi hna nih faak piin kan ṭanpi rih uh, kan in bochan hna, tiah Chinland Defense Force – Hakha nih cathanh an chuahmi ah an langhter chih. Lungmili Post