Good News; U Kyaw Moe Htun Nih UNO Asia-Pacific Group ah Chairman Tuanvo A Lak Lai!

UNO Ah Asia-Pacific Group Ah U Kyaw Moe Htun Nih Thlakhat Chung Chairman Tuanvo Laak!
========
UNO he pehtlai in Ambassador U Kyaw Moe Htun cu Asia-Pacific group ah thla khat chung chiarman tuanvo cu tlamtling tein a tuan kho tiah March (1) ah cathanh an chuah.

Chungtel ram (54) an i telmi Asia-pacific group ah chiarman tuanvo cu Febuary 1-28 tiang, thla khat chung a tuan i, cu tuanvo cu chungtel ram nih tuanvo an laak cio.

Febuary thla khat chung Asia-pacific group ah chiarman tuanvo cu tlamtling tein a tuan kho i, riantuannak ah bawmtu Asia-pacific group chungtel hna cungah lawmhnak tampi kan ngei tiah New York khuapi chungum UNO ah Kawlram aiawhtu thutnak zung nih cathanh an chuah.

Cu bantukin U Kyaw Moe Htun nih tuanvo a laak lio caan ah Febuary 24 ah khan “hawi nakin thiamnak hleikhun in a ngeimi hna tonbiaruahnak siseh Febuary 28 ah Asia-pacific group nih a tuah tawnmi thlafatin tonbiaruahnak zongah meeting hruaitu tuanvo a laak tiah cathanh an chuahmi ahcun an langhter.

Demoso kahdohnak ah ralhrang 20 leng le tank 1 a rawk tiah PDF- Demoso nih a chim. Kayah ram, Demoso peng chung Kyuntaw khua ah March 1 ah ralhrang le PDF-Demoso karlak ah kahdohnak a chuak. Cu kahdohnak ahcun ralhrang 20 leng an thi i tank 1 kan hrawh khawh tiah PDF-Demoso nih thawng a thanh.

Ooke khua chubgtel, Kyuntaw khua ah tank tel in ralhrang thazang 100 hrawng hmunhma a khuarmi cu PDF-Demoso, PDF-Loikaw, Karenni phukomh hna he fonh in an kah hna i a tu bantuk in tank 1 zong an hrawh hi a si.

Pyay Ti Oo, Eaindra Kyaw Zin, Lu Min, Paing Takhon, Director Wine le Ma Win Min Thant hna cu tuni kan thlah hna lai tiah Zaw Min Htun nih a chim. Ariticle- 505A in thong kum 3 cio thlak dingin biakhiah a simi Academy Pyay Ti Oo, Eaindra Kyaw Zin, Lu Min, Paing Takhon, Ma Win Min Thant le naite ah an tlaihmi Director Wine hna cu March 2 ah kan thlah hna lai tiah Major-General Zaw Min Htun nih BBC ah a chim.

Zei bantuk ni sunglawi hmanh um loin an thlah sawhsawh mi hna a si i zeiruang dah an thlah hna timi fiang te’n chim loin chuahnak nawl (amnesty) in kan thlah hna tiah a chim. Tuni kan thlahmi hna ah Malaysia mi pakhat zong aa tel tiah a chim chap.

Tu an thlahmi hna ahhin hlasa thiam PoPo le Ye Htike bel an i tel lo tiah theih a si. Hlasa thiam PoPo zong Article-505A in thong kum 3 tla dingin biakhiah a si i Ye Htike zong a dang sualphawtnak pakhat a tong chap tiah BBC nih a langhter.

Zarhkhat chung kahdohnak ah ralhrang nih vanlawng voi 36 leng a hman, KNDF hriamtlai 1 nih ram caah a nunnak a pek. Ralhrang pawl hna cu Moebye khua in Demoso peng Nanmaekhon lei ah phu hnih ṭhen in raltuknak an tuah. Battalion (66) le ramri a cawngtu ralkap hna telh in thazang 300 leng hrawng in Sinmataung khua le Nangphekone khua tiin hmun hnih ah raltuknak tuah in Moebye-Demoso lam le Sinmataung, Sinphotaung khua tlang hna ah hmunhma an khuar.

February 22 ah Sinphotaung, Sinmataung le Loinangfa khua pawng Natpauk tlang ah raltuknak a tuahmi ralhrang le Karenni phukomh hna karlak ah kohdohnak a chuak. Ralhrang nih Helicopters le vanlawng in Nangphekone,Wadawkhu, Sinkalay thlanglei ah voi 5 a kah tiah KNDF nih a thanh.

February 23 ah Sinkalay tlang le Nansankhan khua hna ah kahdohnak a chuak i ralhrang nih Nangmekhone, Nansankhan, Sinkalaytaung, Celidon, Dawkamee khua hna cu vanlawng in voi 19 a kah caah khuami 2 an nunnak a liam i 4 fak ngai in an i hliam tiah theih a si. Ralhrang pawl nih Demoso battalion in Nangmeekone le khua pawng pawl ah hriamngan in din loin an kah lengmang caah khuami inn pawl an kaang dih tiah theih a si.

February 24 ah ralhrang nih Nankhansan khua phungki sianginn ah hmunhma khuar in khuachung inn pawl cu mei in an khangh dih. Mah khua pawng ahcun kahdohnak a chuak i ralhrang nih tank an hman. Cu lawng si loin, Sinma tlang kahdohnak ah ralhrang nih vanlawng in voi 12 a kah ṭhan tiah KNDF sin in thawng theih a si.

February 25 chun sml 12:30 pm hrawngah Demoso peng, Oo khua, Dawtasay khua phungki sianginn ah hmunhma a lami ralrang le KNDF phukhomh karlak ah kahdohnak a chuak. Cu lawng si loin, chun sml 12:00pm hrawngah Loikaw peng, Lingphongle lamṭhen ah kaphnih kar kahdohnak a chuak ṭhan.

February 26 ni chun sml 2:00pm hrawngah Phrusko khua um LIB-428 gate cu Karenni Army (KA) le KNDF nih an kah ṭhan hna. Cu kahdohnak cu sml pakhat tluk a rau i ralhrang lei in a thimi an um. Pa zeizah an si bel a fiang in theih a si lo.

February 27 chun sml 1:30pm hrawng ah ralhrang nih Demoso peng, Lobakho khua ah vanlawng in a kah ṭhan. Mipi ral in a kahmi a si nain a khawngdengmi an um lo. February 22, Natpauk tlang kahdohnak ah KNDF in mipi hriamtlai pakhat nih a nunnak a pek tiah KNDF News le Information Department nih a thanh. Credit: The Federal Times, The Chinland Post