Good News; Tuzaan Hakha thawngpang vun theih cu kaw!!

Hakha Sii-inn Chungah SAC Ralkap Nih Minung 19 An Tlaih Hna!!
===================
Nihin October 4, zaanlei sml 3:30 ah SAC ralkap nih Hakha sii-inn chungah tualchung mi 19 an tlaih hna, tiah theih a si. Tualchung mi pakhat nih, “Hakha sii-inn ah ngandam lo ruangah siibawi i zohter dingin a kalmi tualchung mi hna cu SAC ralkap nih an tlaih hna,” tiah The Chin Post ah a chim.

Cheukhat cu covid 19 zawtkham sii i chunh dingah a kalmi an si. Cheukhat cu mizaw congtu zong an um. Mizaw congtu cu Siibawi te nih sii an cawkter hna i, an kir lei sii-inn chung an luh ah an tlaihmi hna zong an um.

An sii cawkmi he palik sakhan ah an kalpi hna i, an mizaw conghmi hna kong an ruah ah an lungre a thei ngaingai, tiah a chim chap. An tlaihmi hna chungah nu 4 le pa 15 an si i palik sakhan ah an phone an check piak dih hna hnuah hman an thlak hna i zaanlei sml 6:30 ah an thlah ṭhan dih hna, tiah theih a si.

Nyaung U-Chauk Motor Lam Kam Ah Ruak Pathum An Char, Mandalay ramṭhen, Nyaung U peng Sinku(စဉ်ကူး) khua sii-inn pawng Ngaung U-Chauk motor lam kam ah nizaan October 3 zinglei ah ruak pathum kan char, tiah mi bawmchantu phu nih an langhter.

“October 3 zinglei sml 7:00 hrawng ah pa pahnih ruak le nu pakhat ruak kan char. An thih ning zoh tikah an pum hi nam in sawhnak hma lawngte a khat,” tiah mi bawmchantu pakhat nih a chim. Ngaung U pengkomh palik he ai naihniam mi pakhat nih, “October 2 lioah thah an tong i October 3 zinglei ah an ruak cu kan char hna.

Thah a tongmi hna hi Nyaung U peng Sinku khuami Thaw Mi Mi Win(32), Win Aung Moe(52) le Ngein Chan Min(42) hna an si,” tiah a chim. “October 2 zaan ah hriamtlai minung 5 nih inn chungah an rak luhhnawh hna i an kalpi hna,” tiah thah a tongmi an chungkhar lei nih an chim.

Karen Ramkulh Ah SAC Ralkap Sakhan Pakhat Cu Drone In Kah A Ton Caah SAC Ralkap 2 An Thi, 4 Hliamhma An Pu, Karen ramkulh Gyia Ing Seikgyi(ကြာအင်းဆိပ်ကြီး) peng Chuang Hnakhuah(ချောင်းနှစ်ခွ) hlei um SAC ralkap sakhan cu, October 2 ah drone in bomb kan thlak caah SAC ralkap 2 an thi, Sergeant 1 le ralkap 3 cu hliamhma fak ngai an pu, tiah Saw Dragon Drone Force – SDDF in ṭuanvo ngeitu pakhat nih a chim.

A luancia September 29 lio zongah Gyia Ing Seikgyi peng Takey(တဂေး) khua pawngah rallam a sialmi SAC ralkap pawl cu SDDF, KNLA Battalion 17 le Red Naga hna i bawm in bomb lung 3 an rak puahhnawh hna caah SAC ralkap 3 an rak thi.

SAC ralkap nih khuami an phone an chuh han i artlang in an chiah hna. Khua leng ah an chuahter hna lo i an hrem hna caah kan kah hna hi a si, tiah Saw Dragon Drone Force – SDDF in ṭuanvo ngeitu nih cun a chim. Cu kahdohnak ah SAC ralkap 5 an thi i, 4 cu hliamhma fak ngai an rak pu. PDF ṭangṭi phu lei in a thimi le aa hliammi an um lo.

Banlaw Khua Pawng Umhmun Khuarmi SAC Ralkap Cu PDF Nih An Kah Caah Ralkap 4 An Thi, Tanintharyi ramṭhen, Banlaw(ဘန်လော) khua pawngah umhmun khuarmi SAC ralkap pawl cu PDF ṭangṭi phu hna nih kan kah caah SAC ralkap 4 an thi, tiah Myeik PDF Battalion 2 in nizaan October 3 ah cathanh an chuah.

Cu kahdohnak cu October 1 zanlei sml 4:30 hrawng in ai thok i, Myeik Battalion 2, Companny 1 le Betmaleik(ဘက်မလိုက်) Guerrilla le SWDF hna i bawm in an kah hna caah SAC ralkap 4 an thi, 2 hliamhma an pu. Cu kahdohnak a daih in SAC ralkap nih khua chungah October 2 zaan ah hriamngan in an kah caah tualchung mi hliamhma a pumi an um, asinain hliam pumi mi bel hngalh a si rih lo, tiah theih a si. Kahdohnak hi zeitik caan paoh a chuak khomi a si caah mizapi um kal kongah ralring tein um dingah Myeik Battalion 2 nih cathanh an chuah.

Mon Ramkulh, Karen Ramkulh Le Sagaing Ramṭhen Kahdohnak Ah SAC Ralkap 15 An Thi, PDF Ralkap 2 An Nunnak A Liam Ve, Mon ramkulh, Ye peng Khawzar(ခေါဇာ) khua October 3 zanlei sml 5:00 ah Mon ramkulh thlanglei ummi MSDF-S le SAC ralkap Khah Lah Yah 31 kar kahdohnak a chuak i, mins 25 chung hrawng a rau. Cu kahdohnak ah SAC ralkap 3 an thi i MSDF-S ralkap 2 an nunnak an liam ve. Hriamnam kan i thlau tuk caah MSDF-S ralkap hna cu hnu kan kir, tiah cathanh an chuah.

Karen ramkulh, Brigade 6 hmunram Taungni(တောင်နီး) khua pawngah SAC ralkap Khah Mah Yah 104 cu October 1 ah KNLA Battalion sniper nih kan kah hna i, ralkap 1 a thi. Nizaan October 3 ah kan kah ṭhan hna i SAC ralkap 3 an thi chap, tiah Cobra Column nih cathanh an chuah.

Sagaing ramṭhen, Khin U peng ah October 3 zinglei ah Mutein(မူးတိမ်) tiva hlei ummi SAC ralkap pawl cu sentari conghnak inn an sak tiin thawng kan theih caah drone in bomb kan thlahnawh hna i SAC ralkap 8 an thi, tiah Khin U peng thawngpang fianternak phu nih cathanh an chuah.

USDP Party Chairman In Than Htay Ai Din, Union Solidarity And Development Party(USDP) party chairman hmunhma in kaa din cang lai, tiah nihin October 4 zinglei ah Naypyidaw ah tuahmi USDP party Conference ah Than Htay nih a chim.

2020 rampi thimnak lioah kan tei lo caah siseh, kan party chungtel 2,000 leng thah an tonmi zong ka kham khawh hna lo caah le kum 7 chung taifah zawtnak ka in ruangah party chairman hmunhma in chuah ding le thim ti lo dingin Than Htay nih a chim hi a si. U Than Htay nih USDP party in kaa dinhnak a ruang hi online in serhsat le zamtaih ka ton caah ka chuahmi a si lo, tiah a chim chap.

Asinain a luancia September thla chungah Than Htay nih USDP party chairman a tlaihmi kongah USDP party MP hlun Maung Myint nih hruaitu ṭha lo cu kan thlen awk a si, tiah amah pumpak social media ah a rak tar bal. Than Htay cu USDP party chairman hmunhma in a chuah hnu ah caan karlak party chairman ah U Khin Ye rian pek a si i amah nih hin party chairman sinak tling zong a ngah te ko lai, tiah zumh a si. Crd-The Chin Post