KIO Nih Thlichia Ruangah Chin Miphun Hartongmi Hna Ca Ah Bawmhnak A Pek
=============
May 14, 2023 ah Chinram chung a lutmi Mocha thlichia ruangah har a tongmi Chin mi hna ca ah Kachin Independence Organization (KIO) nih bawmhnak Sing 2000 MMK cu Chin National Front (CNF) sinah a pek, tiah theih a si. “2023 May 14 ah Chinram chung a lutmi Mocha thlichia ruangah har a tongmi Chin mi hna ca ah Kachin Independence Organization (KIO) nih bawmhnak Sing 2000 MMK a pekmi cu tlamtling tein kan cohlan. Unau sinak lungput he a rawkmi sersiam ṭhannak ding ca ah nan kan bawmhmi cungah kan i lawm,” tiah CNF – Heatquarters nih lunglawmhnak cathanh a chuah.
https://www.facebook.com/photo/?fbid=627827369368389&set=a.345631344254661&__cft__[0]=AZU6ocufP06zsIvwr4xWs7CPzf_2awVAKtzdMYVDeXgmOwHsjBD258yr42I1sT6EZDnZJfJ0AdFriUgjwn1HChSRjFfP3YH9lRA9XDzRykrWRC_UbcTRD3kqR99SbH6yv0MIaxKGSNRJx4QOlqqNu1EujYJN6a0JBcHtnEK3OXAUoDhqnmitIo7vNFgpNVSZkcs&__tn__=EH-R
Karen ramkulh, KNU Brigade 3 hmunram, Bago ramṭhen, Nyaunglaypin pengkomh Mu peng ah SAC ralkap hna cawlcanghnak ruangah tualchung mi 32,000 leng ralhrial in an zaam cang, tiah KNU Central nih June 3 ah an thanh. SAC ralkap Khah Mah Yah 590 nih, Midaingtaw khua le Aungchantha khua ah a luancia May 29 lio ah khan hriamngan an kah pinah, May 30 ah Thasi khua le Kyiattat Nyuangpin khua cu hriamngan lung 10 nak tlawm loin an kah, tiah an langhter.
SAC ralkap hriamngam kah ruangah Thasi khua telh in khuate 5 in khuami 4,200 leng cu a himnak hmun ah an zaam hna, tiah theih a si. SAC ralkap nih Mu peng i kahdohnak an tuah ruangah May 10 tiang ah ralhrial in a zaammi 28,000 leng an phan cang i atu hi minung 4,000 leng an karh ṭhan, tiah KNU Central nih cun an thanh.
Ralhrial in a zaammi tualchung mi hna cu ruahkham muka, eidin le sii-ai an herh tuk. Kan si khawh chung in kan zohkhenh hna i, anmah bawmchan ding in ramdang mi bawmtu phu hna sin zong ah nawlnak kan tuahpiak hna, tiah KNU Central chungtel pakhat Padoh Saw Kale Se nih a chim. SAC ralkap nih nawlngeihnak an laak hnu in tanglei in kahdohnak an tuahmi le vanlawng in kahdohnak an tuah ruangah KNU hmunram chung ah ralhrial in a zaam mi cu minung sing li leng an phan cang, tiah theih a si.
India ram, Odisha ramkulh, Balasore district ah nizan June 2 zaanlei suimilam 7 hrawng ah khan tlanglawng canghsualnak a chuak i minung 280 leng an nunnak a liam pinah 900 tluk hliamhma an pu, nunnak a liam mi hi an karh kho, tiah ṭuanvo ngeitu hna nih an chim. Media cheukhat nih cun nunnak a liammi hi 300 an phan cang, tiah an langhter. Khualtlawng tlanglawng pakhat cu lam ping ah kal sual in,
tlanglawng lam cung ah a ummi khualtlawng tlanglawng dang pakhat le thilri phortu tlanglawng cu a pah hna ruangah fak ngai in tlanglawng cu an rawk i, minung 200 leng an thih colh pinah minung 900 leng hliam an pu. Hi canghsualnak ahhin Bengaluru-Howrah Superfast khualtlawng tlanglawng, Shalimar-Chennai khualtlawng tlanglawng le thilri phor tlanglawng pakhat hna an i tel, tiah India media hna nih an ṭial.
Tlanglawng canghsualnak a cannak hmun ahhin bawmchantu hna nih an zuanhnawh hna i, siibawi 30, palik 200 le ambulance 60 kan fial hna, tiah Odisha Chief Secretary nih a chim.
Tutan tlanglawng canghsualnak hi India ram tuanbia ah kum 20 chung i a cangmi chiattonnak ngan bik pakhat a si, tiah railway minister nih a chim i, tlanglawng canghsualnak kong hlathlai ding in Investigation Team zong dirh a si lai, tiah a chim chap.