Nizaan, Tihni Chung Thawngpang Ttha Kho Taktak Pawl Fonh!
===============================
Kayin ramkulh Pha-sawng khuapi pawng hlei kam ah a ummi SAC ralkap sakhan ah SAC Jet Fighter nih bomb a thlak sual caah a thimi an tam i an battalion ningin hliam an tuar. A thimi hna an ruak le hliam a tuarmi hna cu khah-lah-yiah 54 (ခလရ ၅၄) ah Helicopter in an phawrh hna tiah KNDF Battlion 9 in hruaitu pakhat nih a chimmi chirhchan in Khit Thit Media nih a ṭial.
Tuhrawng hi Kayinni (Kaya) ramkulh ah kahdohnak a zual chin lengmang i SAC ralkap a thimi an tam caah hmunhma tampi cu Kayin ramkulh tualchung hriamtlai hna nih an uk. Cu Kayin ramkulh kahdohnak a zualnak ralhmai ah thazang chap dingin fialmi Shan ramkulh i SAC ralkap hna cu an thin a phang i an zam hna tiah theih a si.
Kayinni ramkulh ralhmai ah kal dingin fialmi hna hi Shan ramkulh Phekhone hrambunh khah-mah-yiah 336, khah-mah-yiah 421, Si-saing hrambunh khah-mah-yiah 423, khah-mah-yiah 425, khah-mah-yiah 426 le 7th Military Operations Command (MOC-7) tang ralkap pawl an si i tam deuh cu Kayinni ramkulh ralhmai kal an ṭih caah an zam hna.
Kayinni ramkulh Me-seh SAC sakhan (BP 13) in thazang 100 leng a um mi khah-mah-yiah 430 battalion cu an dihlak in an hriam an chiah i mipi ralkap sin ah an i pe i battalion commander Lieutenant Colonel Za Ni Aung le Second battalion commander Major Kyaw Thu Soe zong mipi sin aa pe mi lak ah an i tel tiah ramchung dohthlennak media pakhat a si mi Ngwe Maung Than (ငွေမောင်းသံမီဒီယာ) nih a langhter.
Hi thawng hi Khit Thit Media zong nih an hlathlai tiah a dik ko tuah an fehter ve. Kayinni hriamtlaibu hruaitu pakhat zong nih “Hi kong hi a dik ko, asinain hi kongah chimnak nawl ka ngei lo, nan ka hal mi lehnak nawl zong ka ngei lo. Tuanvo ngeitu an thanh te ko lai” tiah Khit Thit Media ah a chim.
Kayinni ramkulh SAC ralkap khah-mah-yiah 430 an umnak PB 13 Me-seh sakhan cu June 23 ah Kayinni ralkap nih an lak i miakpi pahnih, meithal le hriamnam dang tam ngai an lakchih. Cu pinah cu sakhan i a ummi SAC ralkap 18 hna cu an hriamnam chiah in Kayinni ralkap sinah an i ap tiah theih a si.
NUG runvennak zung nih Magway PDF Battalion-5 sinah June 23 ah meithal a pek hna, tiah theih a si. NUG runvennak zung, Magway ramṭhen uknak zung nih raltuk cawnnak le meithal pekchanhnak an ngeih i Magway PDF Battalion-5 zong NUG nih hin meithal 5 an pek ve hna.
Meithal pekchanhnak an tuahmi ah Magway ramṭhen uktu zung in ṭuanvo ngeitu hna, Battalion Commander hna, Deputy Battalion Commander hna an kai kho, tiah Magway PDF in ṭuanvo ngeitu nih a chim. NUG runvennak zung kuttang Magway PDF nih kum khat chung raltuknak kong an suaisam i, a tak in an ṭuanchuah. Cucaah hriamnam pekchanhnak le bawmhnak zong pehtlai in tuah kan i zuam lai, tiah NUG runvennak zung nih an langhter.