Takaung Khuapawng Kahdohnak Ah SAC Ralkap 14 An Thi, 4 A Nung In An Tlaih Hna. Mandalay ramṭhen, Thabeikkyin peng, Takaung khuapawng kahdohnak ah SAC ralkap ruak 14 le kuanzen pawl an char tiah No.1 kahdohnak hmunhma nih an thanh.
March 5 ah Takaung khua in a rak chuak mi SAC ralkap, Ta-ta-ka 13 in Colonel Ye Khaung hruai mi thazang 95 le Takaung khua ta-ta-ka 13 a rak chuak mi Captain Hting Lin hruai mi thazang 70 hrawng hna cu Madaw khua, Mangyi khua le Sinhyiat khua le Latpankung khua hna ah an rak luh lio ah dothlennak phu pawl nih an kah hna i March 7 tiang an kah hna caah kahdohnak a fak, SAC ralkap 14 ruak, hriam le kuanzen pawl an lak khawh.
Kahdohnak chung in SAC ralkap hriam zuun 18, kuan 4,200 leng, bom lung 30 leng, kahdohnak thilri pawl zong an lak khawh tiah theih a si.Kahdohnak chung ah SAC vanlawng nih bom lung 3 a thlak leng ah Machine Gun in voi 10 a kah tiah theih a si.
Hpa-lu Sakhaan An Laknak Hmanthlak Cobra Column 2 Nih An Thanh. Karen ram, Myawaddy peng um SAC Hpa-lu sakhaan cu KNLA Brigade 6 le dothlennak phu pawl nih an lak khawh i sakhaan laknak hmanthlak pawl cu kahdohnak chung ah aa tel ve mi Cobra Column 2 nih March 12 zaanlei ah an langhter.
Hpa-lu sakhaan lak kahdohnak chung ah SAC ralkap le pyithusit pawl Thai ram lei ah an zaam.Hpa-lu sakhaan hi SAC ralkap nih kum 35 chung hmunhma an khuarnak sakhaan a si nain KNU nih an lak khawh.
Good News :Maungdaw Peng, Aungthapyay Um BGF Sakhaan AA Nih An Lak.Rakhine ram, Maungdaw peng um SAC Aungthapyay um BGF sakhaan cu an lak khawh cang tiah AA nih thawng an thanh.
Maungdaw khua chaklei ah hriam chiah in a sungpe duh lo mi BGF sakhaan cheukhat zong AA nih an kah thluahmah hna i Aungthapyay BGF sakhaan cu March 11 ah tlamtling tein an lak khawh hi a si.
SAC kuttang pawl ruak, hriam cheukhat pawl an lak khawh tiah hmanthlak he thawng an thanh i hriamngan, hriamhme phuntling zuun 40 leng AA nih an lak khawh kha hmuh khawh a si.Cu BGF sakhaan in Bangladesh lei ah a zaam mi BGF 179 an um tiah an langhter.
SAC nih Aungthapyay sakhaan chung ah an zaam tak mi riahcaw pawl ah poison (အဆိပ်) an neh hna, ti bawm chung ah an peih hna, sakhaan chung zong ah poison an kah caah dothlennak phu pawl nih lak khawh mi eidin pawl kha i ralrin ngai a hau tiah AA nih an thanh.Credit : The Chinland Post