Good News; Special Bak In English Cawnak Tuah A Si Cang Lai!

Special Bak In English Cawnak Tuah A Si Cang Lai!
========
English cawnnak kongah thawng a ka halmi le nan fa nan nau le kai ter a duhmi nan tam pah caah keimah pumpak in ka lawm tuk ve hringhran. Class pakhat ca lawngah cun tam deuh dawh kan si, pinah minung tampi voi khat i chimhtti dih kha a that tuk lem lo caah tlawm deuhin chimh khawh dingah class pa thum tu in ka hun tthen hna i;

Taang 7 le taang 8 pawl kha zing suimilam 9:30 in 10:45 tiang; Taang 9 le taang 10 pawl kha zing suimilam 10:50 in chun 12:15 tiang; tang 10 cung (upa deuh) pawl kha zanlei 2:30 in 4:00 tiang tiin si te lai tiah kan hun in thanh than hna.

Hmaizarh ni khat ni (Feb 21) in thok asi te lai. Tuition man zeihmanh pek a hau lai lo, laksawng tuktak zong zeihmanh pek hau lai lo. Mah hi cawnnak hi a thiam bak rih lomi, a hram tein cawn a duhmi nan ca ko ah thathnemnak a tam bik lai tiah ka ruahchan. Ka umnak hi Dawrhlun sang, hlanlio cargate hlun a thlang deuh te ahkhan asi.

Ngakchia taang 7 in taang 10 kar, English a thiam bak lomi, a hramthok tein cawn a duhmi ka sin ah man loin (free) in kan inn ah cawn khawh a si lai. Hmaizarh nikhat ni (Feb 21) in thok asi lai i zing nazi 10:00- 11:30 tiang, nikhat ni in ni nga ni tiang lengmang cawn asi lai. Minung pakhat/hnih lawng nan si zongah chimh thiamthiam a si ko lai.

Cachimh man le cawnnak ah a herhmi cauk man zeihmanh liam a hau lai lo, asinain thla 2 chung bau lo tein a kai huammi lawng rak ra uh. A dang ngakchia deuh si ah, taang 10 cung upa deuh si ah cawn a duhmi nan um ve sual ahcun rak ka chim te u law a caan kan serpiak ve te hna lai. Phone- 09260565273.

Chief Minister Daw Nan Khin Htui Myint Thong An Thlakmi Kum An Thumhpiak! Chief Minister Daw Nan Khin Htui Myint Thong An Thlakmi Kum An Thumhpiak Thanmi Cu Vawlei Cung Ramdang Sinah Minthahtnak A Kawl! SAC ralhrang nih kum (80) chung thong an thlakmi Kayin ramkulh chief minister Daw Nan Khin Htui Myint cu kum (40) lawng tla dingin kan thumhpiak than tiah cathanh an chuah.

SAC ralhrang nih Febuary 12 ah golden Jubille ni ah chief minister Daw Nan Khin Htui Myint cu kum 40 lawng thongtla dingin kan thumhpiak than tiah cathanh an chuah hi a si. SAC ralhrang nih Daw Nan Khin Htui Myint kum 40 chung lawng thongtla than dingin an thumhpiakmi hi vawlei cung ramdang sinah mithmai a kawlnak a si i, sullam a ngei lomi a si tiah ramkhel tuaktantu pakhat nih a chim.

Kum 80 thong thlak hratin kum 40 kan thumh than timi cu vawlei cung ramdang dang sinah mithmai tha a kawlnak a si i, hna chet lo kan si caah kan theih sawhsawhmi a si ko, sullam pakhat hmanh a ngei lo tiah Sih ni pakhat nih a chim.

Nawlngeihnak latu SAC ralhrang nih Daw Nan Khin Htui Myint cu eihmuarnak case 5 caah kum 75, section 505 (ခ) in kum 2, ningcang loin thimnak a tuah timi ah kum 3, a dihlak fonhah kum 80 chung thong an thlak. Atu ahcun Daw Nan Khin Htui Myint cu nawlngeihnak latu SAC ralhrang ralkap nih Pha-an thonginn ah an khumh tiah theih a si.

Mino Hna I Fimnak Le Zuamnak Thawngin Caan Rau Lo Teah Hriamnam Serchuah Khawh A Si Tiah Runvennak Lei Nih Chim!
Generation-Z mino hna i fimthiamnak hmangin caan rau lo ah hriamnam searchah khawh a si tiah NUG cozah i runvennak zung leiah chungtel pakhat U Naing Htu Aung nih a chim. Generation-Z hna i zuamnak le fimthiamnak ruangah kum tampi lawngah serchuah khawh dingmi cu caan rau lo teah hriamnam serchuah a si.

Hriamnam cawknak leiah harsatnak a um hmanhah atu ahcun serchuah khawh a hung si cang tiah U Naing Htu Aung nih NST he tonbiaruahnak an ngeih nakah a chim. Kum khat chungah tlangcungmi hriamtlai phu i tel in chain of command timi tuah khawh a si cang i, hmunkip ah aa then cheumi Local Defence Force hna zong zeimawzat cu hmunkhat ah fonh khawh a si tiah a chim.

Atu ahcun mipi vengtu ralkap dihlak cu zulhphung ningcang tein kan tuah khawh dih cang pinah mipi vengtu hna cu code of conduct zong a hlei in cawnpiak an si cang tiah a chim chih. PDF phu cu an tam tuk i, hmunkip ah an um ko nain SAC ralhrang ralkap he zulhphung kongah tahchun awk um lo tiangin an tha/an ngei tiah amah nih a chim.

Runvennak ministry department nih kahdohnak caah a herh taktakmi minung thazaang cu tlamtling in kan ngei dih cang bangin hriamnam lei zongah zeimawzat tiang cu kan tlamtlin khawh cang tiah amah nih a chim.

Class Chungah NUG Le PDF Huatnak Bia Chimtu Sayama Inn Cu Bomb Puah In Ralrinnak An Pek! Class chungah NUG le PDF huatnak bia chimtu Kata peng sayama inn cu bomb puah hnawh in ralrinnak an pek tiah theih a si.

Febuary 14 zinglei sml 4:00 hrawngah Kata khuapi chung sang (4) nak zawnah a ummi sayama Daw Phyu Phyu Win inn cu a vawikhatnak bikah ralrin peknak in bomb puah hnawh a si. Pehzulh in NUG le PDF huatnak biachim a hmang rih ko ahcun ralrin peknak si ti loin chungkhar ah ngaihchiatnak chuak ding tiangin kan thuat cang lai tiah Katha Underground Revolutionary Force-KURF nih cathanh an chuah.

Pawngkam ummi nih NUG le PDF huatnak biachim lo dingin an thlauh nain duh loin a chim thiamthiam. A chim ngam rih ahcun chim ko seh. Harnak a tong zongah Katha mipi nih a cungah zangfahnak kan ngeih lo ding pinah cai seh tiah kan ti lai tiah Katha khuapi chung sang 5 nak zawnah a umtu pakhat nih a chim.

Non-CDM saya/sayama hna nih pehzulh in SAC ralhrang ralkap kuttang ah rian nan tuan rih ko ahcun theihternak kan tuah ti lai lo i, direct in kan in kahdoh cang hna lai tiah an chim. Sianginn le fimcawnnak zungah riantuantu hna zong tuzing ah ralrin peknak ah bomb an puah hnawh tiah theih a si.

SAC Ralhrang Caah Bawmtu A Simi Paoh Cu Hrial Cio Dingin Mube PDF Nih Forh! Mipi cu ral bantukin kahdohnak le thahnawnnak a tuahtu SAC ralhrang caah bawmtu a simi paoh cu hrial cio dingin Shan ramkulh Phe Khung peng chung Mube PDF nih cathanh an chuah.

Phe Khung peng chungah a ummi mipi hna nih SAC ralhrang ralkap i serchuahmi thilri cawk, zuar lo dingin Mube PDF nih cathanh an chuahmi ahcun an langhter. Phe Khung peng chung mipi hruaitu ပအဖ nih Febuary 3 ah khan cathanh an chuah tikah SAC ralhrang ralkap serchuahmi thilri paoh cu zuar lo ding, cawk lo dingin cathanh an chuah cang i, Febuary 28 hnuin a zuartu le cawtu umti lo dingin ralrinnak an pek.

Pehzulh in a zuartu le cawtu kan in hmuh hna ahcun nanmahle umnak cioah a ummi mipi ralkap hna he i fonhin dantatnak kan in pek hna lai tiah ralrinnak an pek chih. Phe Khung PDF zong nih ပကဖ nih a chuahmi zulhphung hi mipi dihlak nih rak zul cio dingin Febuary zarh hnih nakah zohfelnak ni hnih chung kan tuah tikah mipi leikap zong nih lungtho tein tel an duh cio tiah cathanh an chuah.

CDF Ratnak Ding Lampi Ah Bomb Cu Vawlei Tangah Phum Hratin A Lamh Sual Ruangah Thantlang Ummi ခလရ ၂၆၉ Battalion-hmu Myo Yin Htun Ke Khat Lei Aa Taan! Chin ramkulh Thantlang khuapi ah SAC ralhrang ralkap ခလရ ၂၆၉ battalion-hmu Myo Yin Htun cu Febuary 13 ah bomb a lamhsual ruangah a ke khatlei aa taan tiah CHRO sinin theih a si.

Cubantukin bomb puahnak kong he pehtlai in CHRO nih thawngpang fehter kho dingin aa zuam liopi a si i, Yangon Khik Thit nih fehter kho dingin kan i zuam ve. CDF ratnak ding lampi ah bomb cu vawlei tangah a chiah i, amah lila nih a lamhsual tiah CHRO nih a langhter. Battalion hmu bomb nih a puah sual ruangah a kuttang ralhrang ralkap nih Thantlang khuapi chungah a ummi inn cu a vawi (25) mei in an khanghpiak than tiah theih a si.

Thantlang ah umnak sakhan tuahtu SAC ralhrang ralkap nih mipi nih an kaltakmi inn chungah bauh in an lut, thilri an firpiak hna pinah mei an khanghpiak ruangah mipi vengtu CDF he atu le atu an i kap lengmangnak a si. SAC ralhrang ralkap i meikhanghnak ruangah Thantlang khuapi chungah a ummi inn a tam deuh cu mei nih a kaang dih cang. Credit: The Federal Times