Moebye Kahdohnak Ah SAC Ralkap Hriamngan Nih Anmah Ralkap Lila An Khen Ṭhan Hna Caah A Thi Mi An Um
==========
Shan ram thlanglei, Moebye khuachung ah a cang mi kahdohnak ah SAC ralkap nih an kah mi hriamngan nih anmah ralkap lila an khen hna caah a thi mi an um tiah MBPDF Eagle Company sin in thawng theih a si.
“Anmah kah mi hriamngan nih anmah ralkap lila an khen ṭhan hna. Kanmah dothlennak phu pawl kan umnak lawng an kap lo. Anmah ralkap pawl umnak zong an kah chih dih. Cucaah anmah lei a thi mi an tamnak hi a si” tiah Eagle Company rianngeitu nih Mizzima ah a chim.Kahdohnak chung ah SAC ralkap 20 nak tlawm lo an thi i PDF phufonh lei in 4 an nunnak a liam tiah MBPDF B1001 nih June 11 ah a rak thanh.
PDF phufonh lei in KNDF B03 hriamtlai 2, MBPDF hriamtlai 1 le URF hriamtlai 1 hna an nunnak a liam tiah an langhter. Moebye khuachung ah SAC ralkap nih Loikaw, Demoso, Pekon le Satdawyar tlang hna in hriamngan an kah i June 11 ni lawng ah SAC ralkap nih lamhlat a kap kho mi hriamngan lung 100 leng an hman tiah theih a si.
Ni 2 Chung Moebye le Pekon Kahdohnak Ah PDF Chungtel 6 An Nunnak A Liam; Kahdoh a fahnak Shan-Kayah ramri, Moebye le Pekon kahdohnak ah PDF chungtel 6 an nunnak a liam tiah MBPDF nih an thanh.
Moebye khuachung ah thazang tampi in a rak lut mi SAC ralkap le PDF phufonh hna karlak ah a luancia June 11 thawk in kahdohnak a fak tiah theih a si.
SAC ralkap lei nih hriamngan bawm in kahdohnak fak pi an tuah caah MBPDF hriamtlai 1, KNDF B03 hriamtlai 2 le URF hriamtlai 1 an nunnak a liam tiah MBPDF nih an langhter. SAC lei in 20 nak tlawm lo an thi kho tiah MBPDF nih an ruahdamh. Shan ram thlanglei, Pekon peng chung, Kaungih zong ah June 10 ah kahdohnak a chuak i Moebye PDF 2 in hriamtlai 2 hriamngan nih a khen hna caah an nunnak a liam tiah theih a si.
Sagaing Ramṭhen Telh In May Thla 1 Chung Kahdohnak ah SAC Ralkap 450 Hrawng An Thi Tiah NUG Nih A Thanh; The Chinland Post | 2023 June 13 — NUG, Ministry Of Defense kuttang PDF No. 1 kahdohnak hmunhma pawl a si mi Sagaing ramṭhen, Magway ramṭhen, Mandalay ramṭhen, Shan ram chaklei hna ah a luancia May thlakhat chung ah kahdohnak voi 500 a chuak tiah NUG MOG nih cathanh a chuah.
Kahdohnak pawl chung ah SAC chungtel 449 an thi i 681 nih hliam an tuar, mipi hriamtlai 41 nih ram le miphun caah an nunnak an pek i 113 hliam an tuar tiah an langhter. SAC ralkap sin in hriam phun 24 telh in kuanzen tampi an lak khawh tiah an thanh.
Kahdohnak voi 500 chung ah hmaitonh in kahdohnak hi voi 150, Mipi hriamtlai pawl nih kahdohnak voi 156, bomrap puah hnawhnak voi 100, Mipi hriamtlai phu nih drone in kahdohnak voi 71, vanlei kahdohnak voi 23 a um tiah an langhter. No. 1 kahdohnak hmunhma tang ah a um mi PDF, mipi runvengtu phu, tlangcung hriamtlai EROs hna bawm in SAC ralkap an doh hna hi a si. Crd; The Chinland Post