Zi-phyu-kone SAC Ralhrang Sakhan PDF Nih An Kah Caah Ralhrang Le Pyusawhti 20 Nak Tlawmlo An Thi
========
Sagaing ramthen, ShweBo peng Zi-phyu-kone khua um SAC ralhrang sakhan cu tualchung PDF hna nih an kah hna caah ralhrang le Pyusaw-hti 20 nak tlawm lo an thi tiah KLG PDF nih an langhter.
May 9 zinglei ah Kyuak-lone-kyi (KLG PDF) telh in tangti phu 7 nih an kah hna hi a si
Zinglei suimilam 4 in 6 tiang kahdohnak a chuak. Sakhan an lak lai teah a pawngkam khua 3 in ralhrang le Pyusaw-hti pawl bawmh dingin an rat caah PDF hna cu hnu an pil than. Suimilam 2 chung kahdohnak ah SAC ralhrang le Pyusaw-hti 20 nak tlawm lo an thi i PDF tangti phu in minung 4 hliam fak lo an tuar tiah KLG nih mipi sin ah theih ternak an tuah.
Myothar Palik Sakhan Drone Bomb Thlak Hnawhnak In Palik 5 An Thi; 4 Hliam An Tuar; Mandalay ramthen, Nga-zone peng Myothar palik sakhan cu PDF tangti phu nih Drone bomb an thlak hnawh hna caah palik 5 an thi i 4 hliam an tuar tiah NPDF tuanvo ngeitu pakhat nih a chim. May 7 zanlei suimilam 3 tluk ah Drone 2 in Bomb 6 an thlak hnawh hna hi a si. Hi kahdohnak cu suimilam 1 leng an rau.
“Hi palik sakhan um ralhrang hna nih gate hngah in khualtlawng mi sin ah tangka an hal lengmang hna caah a tubantuk in kan kah hna hi a si. Ralhrang kuttang palik 5 an thi i 4 hliam an tuar” tiah PDF Captain Lin-yung nih a chim. “Hi palik sakhan chungah ralhrang 20 tluk an um i a thi mi le hliam tuar mi hna cu Myothar le Nga-zone khua siizung ah then in an kal pi hna” tiah a cunglei upa nih a chim.
Hi kahdohnak cu PDF tangti phu 4 i bawm in minung 7 nih Drone bomb an va thlak hnawh hna hi a si. “Mah kahdohnak ruangah SAC ralhrang nih khuachung Market pawngkam tiang humhimnak an lak” tiah khuami pakhat nih a chim.
Thilcawk Ah Kal Mi SAC Ralhrang Kah An Ton Caah 1 A Thi; Meithal Zunkhat An Lak; Sagaing ramthen, Chaung-U peng hmun pakhat ah May 9 zinglei ah thilcawk a kal mi SAC ralhrang hna cu PDF nih an kah hna caah pakhat a thi i meithal zunkhat zong an lak piak hna tiah kan theih.,Chaung-u khua phungki sianginn pakhat ah umhmun khuar SAC ralhrang hna cu thil cawk an kal pah ah tualchung hrialtlai Pah-kah-phah le CHUPDF Battalion 2 hna nih an kah hna hi a si. Kahdohnak ah ralhrang pakhat a thih pin ah meithal zunkhat, kuanbawm le kuan 14 zong an lak piak chih hna.
Mah ni May 9 zanlei suimilam 5 tluk thiam ah PDF nih Chaung-U peng Nat-ye-kaan khua pawng umhmun khuar mi SAC ralhrang hna cu Bomb an puah hnawh hna, an himnak ding caah an cawh mi khur chung in arak chuak mi ralhrang pawl zong lampi ah Bom an puah hnawh than hna caah ralhrang a thi mi le hliam tuar an um kho tiah Pah-kah-phah nih an langh ter.
Shan Ramkulh Chaklei Ah Tektlaknak In Caw 15 An Thi; Shan ramkulh chaklei, Taungkyi peng Naung-kar khua ah thli le ruah a sur pin ah tek tlak hnawhnak in Caw 15 an thi tiah kan theih.,May 8 zanlei suimilam 5 tluk ah ruahpi fak ngai in a sur caah Caw run hna cu inn lei an tlunpi lio hna, inn phak lai ah a tu bantuk in Tek nih a tlak hna hi a si.
“Tek tlak hnawh mi Caw sa cu eiphung a si lo tiin khur kan cawh i kan phum dih hna, a sa zong kan ei loh, Caw kan phum lio zongah a ngeitu minung 4 an i tel ve. Mi pakhat caw cu 5 an thih caah a ngaichia ngai” tiah khua mi pakhat nih a chim. Aluan cia May 4 zongah Shan ramkulh chaklei Yua-ngan khua pawngah Caw leng pakhat a khalh pah in tek nih a tlak caah Caw pahnih an thi i a ngeitu pa zong hliam a tuar tiah kan theih. Credite;Lungmili Post